CORINTHTE

Tungah Paul ii Laithak A Khatna (Paul's First Letter to the Corinthians)

Thupatna

Paul ii Corinth khua mite tung laithak masa sia, ama ii phu sa Corinth pawlpi sungah Tapidaw nuntakna le upna thu taw kisai buaina a om hu in a at ahi hi. Tua laitakin Corinth sia Greek ngam sungah mi namcin ii teenna khuapi lian mama khat hi a, Roman kumpite ukna sungah a om Achaia ngam sungah khuapi lianbel ahi hi. Tua khuapi sia, sum vawtna, ngeina thupi vawtna, paktat ngamtat nate le biakna namcin a omna te hangin minthang hi.

Sawltakpa ii thinbot bel thute sia pawlpi sungah pawl kikhenna, paktatna nu le pa mawna vai le nupa kiteenna huvau thudoknate, biakna kithasun theina thute, pawlpi kalsuan zia, Thaa Thiangtho letsongte le thawkikna taw kisai buaina te ahi hi. Ama in thuthuk a muna taw hi dokna tatuamte taw kisai in Lungdamna Thu phatak son in lak hi.

A lian 13 sungah Pathian in a mite tungah hong piak letsongte sung pan itna sia a lianbel a hina thu lak a, hi laibu sung pan a kihe bel thu hi thei tu hi.

A kihel Thulute

Thupatna 1:1-9
Pawlpi sung pawl kikhenna 1:10-4:21
Nu le pa paktatna le innkuan nuntakzia 5:1-7:40
Tapidawte le lawkite 8:1-11:1
Pawlpi sung nuntakna le biakna 11:2-14:40
Christ thaw kikna le thu umte thaw kikna 15:1-58
Judaea ngam a Tapidaw te atu piakna 16:1-4
Aituam thu le thukhupna 16:5-24

Corinthte Khatna 1

1Pathian deina taw Jesu Christ sawltak tu in a kisam Paul le ih suapuipa Sosthenes in—

2Corinth khua ah a om Pathian pawlpi tung le Pathian ii mi thiangthote suak tu in a kisam sa, Jesu Christ taw kipumkhatna a, ama neisa a suak mite, mun theampo ah ih Topa Jesu Christ a biate theampo tungah lai kong thaak hi. *

3Ih Pa Pathian le ih Topa Jesu Christ in thuthiamna le thinnopna hong pia tahen.

Christ sungah Thuphate

4Jesu Christ tungtawn a thuthiamna hong piak hu in note atu in, Pathian tungah lungdam ka ko tawntung hi. 5Banghangziam cile Christ taw na kipumkhat uh hu in, kampauna le heakna pan kipan na theampo sungah a hau na suak zo uh hi. 6Christ ii ngupna thute no sungah kip takin kiphut zo ahikom, 7ih Topa Jesu Christ kilangh tu ngakin na om kawmin, thupha khat beak zongh na taan bua uh hi. 8Topa Jesu Christ ii Ni hong thet ni ciang, na pauban ngawl natu in ama in a tawpna dong kip takin hong keam sii tu hi. 9Ih Topa a Tapa Jesu Christ taw kithawl khawm tu a, note hong sam Pathian sia muan tu Pathian ahi hi.

Pawlpi sungah Kikhennate

10Ih Topa Jesu Christ thuneina taw, ka suapui note theampo tungah kong mangkaa hi, note sungah kikhenna a om ngawl natu in, na ci uh papo ki thukim vadiam vun. Ngaisutna khat le tupna khat bek taw na kipawl khawm vun. 11Banghangziam cile, ka suapuite awng, Chloe ii innkuanpui pawlkhatte in note sungah kihauna om hi ci in thiang takin hong son zo hi. 12Hi bangin kong ci nuam hi, note khat sim in thu tatuam he nu hi. Khat in “Kei sia Paul nungzui ka hi hi,” ci in, a dang khat in, “Kei sia Apollos nungzui ka hi hi,” ci, a dangkhat in, “Kei sia Peter nungzui ka hi hi,” ci, a dangkhat in, “Kei sia Christ nungzui ka hi hi,” na ci uh hi. * 13Christ sia pawl tatuam in na khentham uh hi. No atu in thinglamte tungah a thi sia in Paul ahi ziam? Paul nungzui tu in na ki baptize uh ziam?

14Crispus le Gaius sim ngawl, note kuama kong baptize ngawl hu in, Pathian tungah lungdam ka ko hi. * 15Tua ahikom kuama in note sia kei nungzui suak tu in ki baptize hi hong ci thei ngawl tu hi. 16(Stephanas le a innkuanpuite zongh baptize na ka pia hi. Tua ngawl po kuama dang ka baptize le ka baptize ngawl ciamtee ngawl khi hi.) * 17Christ in baptize nasepna seam tu in kei hong sam bua hi. Ama in Lungdamna Thupha son tu in, hong sam a, Christ thinglamte tungah a thina ii vaangletna a bo ngawl natu in, mihing ciimna kammalte zangh ngawlin son tu in hong sawl hi.

Christ sia Pathian Vaangletna le Ciimna

18Banghangziam cile a mangthang mihingte atu in thinglamte tungah Christ ii a thina thu in, luithathong thu ahi hi, ahizongin ngupna a nga eite atu in Pathian vaangletna ahi hi. 19Laithiangtho in,

20Tua ahile mihing ciimte, mihing pilte le hi leitung ah thu kinial a thiamte sia bang suak tu ziam? Hi leitung ii ciimna sia mawmawtna hi ci in Pathian in lak zo hi! *

21Pathian in ama pilna hong zangh a, mihingte in amate pilna taw Pathian a heak zawk ngawl natu in vawt hi. “Mawmawt” thu hi a kici kote thuhilna taw, Pathian in a umte ngum tu in khensat zaw hi. 22A up thei natu in Jewte in na lamdang lakna ngen uh a, Greekte in ciimna zong uh hi. 23Eite atu in a kithat Christ thu ka thang sak uh a, tua thu sia Jewte atu in a maktaak huai thu le Gentilete atu in a luithathong thu ahi hi; 24ahizong Pathian ii sap sa Jewte le Gentilete atu in hi thu in Pathian vaangletna le Pathian ciimna ahi Christ ahi hi. 25Banghangziam cile Pathian mawmawtna in mihingte ciimna sangin ciimzaw lai a, taciangin Pathian thazawmna in mihingte thahatna sangin hat zaw lai hi.

26Suapuite awng, Pathian in note hong sap laitakin, na omzia uh ngaisun vun. Mihingte hong muna ah note ciim in vaanglian a, na thupi uh hi. 27Pathian in mihing ciimte maizum sak natu in, leitung mite ii mawmaw a sakte teal a, mihing thahatte a maizum sak natu in, leitung mite ii thazawm a sakte teal hi. 28Leitung ii thupi a sakte, a suksiat natu in leitung ii a nomu, a zawnsak, bangma in a ngaisut ngawlte teal hi. 29Tua ahikom Pathian mai ah a kisa thei tu kuama a om bua hi. 30Ahihang, Pathian in note Christ Jesu taw hong kipumkhat sak zo a; Pathian in Christ sia eite ii ciimna suak sak zo hi. Ama hangin Pathian mai ah thutang hong suak sak a; Pathian neisa a thiangtho mihingte suak in, hong suakta sak hi. 31Tua ahiciangin Laithiangtho in, “A kisa thei nuamte in, Topa vawtsate tungah kisa thei tahen,” a ci bangma ahi hi. *

⇑

[Remove Footnotes]