Corinthte Khatna 3

Pathian ii Naseamte

1Suapuite awng, a tatak in ci leang, Thaa taw kidim mihingte tungah ka pau bangin note tungah kong pau thei bua hi; leitung mite le Tapidaw upna sungah patang a hite bangin note tungah kong pau kul hi. 2No sia noaitui bek taw kong vaak a, antak kong pia bua hi, banghangziam cile antak ne thei tu na hi balai uh hi. Tu mama in antak a ne thei tu hi ngawl lai nu hi, * 3banghangziam cile note in hi leitung mihingte nuntak zia taw ma in na nungta lai uh hi. Note sungah ki eenna om a, khat le khat na kihau uh ciangin, hithu in note leitung neisa na hi na uh le leitung om zia taw nungta na hina uh hong lak hi ngawl ziam? 4Note sung pan khat in, ‘Kei Paul nung ka zui hi,’ a dang khat in, ‘Kei Apollos nung kazui hi,’ na ci uh ciang leitung mihingte bangin a ngamta hi ngawl nu ziam? *

5A tatakin Apollos sia akua ziam? Taciang Paul sia akua ziam? Kote in Pathian naseamte hi lel khu hi, note up thei tu in hong lampuite hi bek khu hi. Topa hong piak bangin khat sim in a seamte ka hi uh hi. 6Kei in thaicii poai a, Apollos in, a kung tuibuak a, ahihang a khanto natu a vawt sia in Pathian ahi hi. * 7A poaipa le tui a buakpa sia thupi tatak ngawl hi. A thupi sia in Pathian ahi hi. Banghangziam cile ama in a kung khang sak hi. 8A poaipa le tui a buakpa in kilamdang ngawl hi. Pathian in amate sep babangin tel pia tek tu hi. 9Banghangziam cile kote sia Pathian taw kipawl khawm a naseamte hi a, note in Pathian lo na hi uh hi.

Note in Pathian inn na hi sii uh hi. 10Pathian hong piak tel zangh in, innsa thiampa nasep teng ka seam a, a phungkawng ka phaa sak hi. Taciangin ngualdang khat in tua ii tungah sa to hi. Ahihang mihing sim in, bangbangin inn sa ziam, ci in a kidop kul hi. 11Banghangziam cile Pathian in Jesu sia a thupibel le khat bek ahi phungkawng tu in phaa zo a, a dang phungkawng a kiphaa thei nawn batu hi. 12Pawlkhatte in kham ahibale ngun ahibale suangmanpha sia phungkawng tungah inn sakna vanh in nei tu hi; a dangte in thing ahibale lopa ahibale taangphaw zangh tu uh hi. 13Taciang mihing khat sim ii nasep phat le phat ngawl sia Christ Ni in a pholaak ciangin kimu tu hi. Banghangziam cile tua Ni in meikuang in mihing sim ii nasepte kilangh sak tu hi. Meikuang in tua nasepnate a zia en tu a, a phatna le a siatna lak thiang tu hi. 14Phungkawng tungah a kisa sia meikuang in a kaang sak zo bale, innsapa in tel nga tu hi. 15Ahihang khat po nasepna sia a kaangtum le, a nasep teng sumh tu hi; ahihang ama ahile kaangmei sung pan a suakta khat bangin ngupna nga tu hi.

16A tatak ma in note in Pathian biakinn na hi uh a, note sungah Pathian Thaa hong teang nginge ahi sia na he uh hi! * 17Tua ahikom khat po in Pathian biakinn a susia le, Pathian in ama sia a susia tu hi. Banghangziam cile Pathian biakinn sia thiangtho a, note mama in ama biakinn na hi uh hi.

18Kuama in ama le ama kitheam heak hen. Note sungah khat po in ama le ama sia, leitung zia taw etna in, ciim a kisa le a ciim takpi natu in a mawmawt phot kul tu hi. 19Banghangziam cile hi leitung ii ciimna hi ci in a ngaisutte sia Pathian muna ah luithathong ahi hi. Laithiangtho in, “Pathian in a ciimte sia amate pilna sungah awk sak hi,” ci hi; * 20taciang Laithiangtho dangkhat in, “Topa in a ciimte ngaisutna sia mannung ngawl hi, ci in he hi,” ci hi. * 21Tua ahikom kuama in mihingte vawt thei thute sungah kisuangtaak heak hen. A tatakin na theampo note neisa ahi hi: 22Paul, Apollos le Peter, hi leitung nuntakna le thina, tu hun le maisang hun tu— hite theampo in note aa ahi hi, 23taciangin note in Christ neisa hi a, Christ in Pathian neisa ahi hi.

⇑

[Remove Footnotes]