JOHN

Laithak A khatna (The First Letter of John)

Thupatna

John laithak khatna sia in tupna bulpi nii nei hi: a lai simte in, Pathian le a Tapa Jesu Christ taw kipawlkhat in a nuntak thei natu, taciang hi kipawl khat na a susia thei kihil khialnate pan kidop natu ahi hi. Hi kihil khialnate sia bang kidoppha ziam cile hi leitung taw kizopna in siatna piang sak hi ci in upna om hi. Tua ahikom Jesu, Pathian Tapa sia mihing tatak hi ngei ngawl tu hi, ci thu ahi hi. Hi thuhilsya maan ngawlte in, ngupna nga ih ci ciangin, hi leitung nuntak thin nop mawkna pan suatakna hi, ngupna ih ci sia ngamtat phatna le ih mihingpuite itna taw bangma kisai ngawl hi ci hi.

Hi kihilna taw kingalsai in lai atpa in a thiangtho takin Jesu Christ sia mihing tatak hi a, taciang Jesu a um theampo le Pathian a it theampo in khat le khat ki it tu ahi hi, ci in a thupi in son hi.

A kihel Thulute

Thupatna 1:1-4
Khuavak le khuazing 1:5-2:29
Pathian tate le Doaimangpa tate 3:1-24
Thumaan le thukhial 4:1-6
Ki itna ii sep tute 4:7-21
A zo upna 5:1-21

John Khatna 1

Nuntakna Kammal

1A kipat pan a om sa, nuntakna Kammal huvau note tungah lai kong thaak hi. Tua thu ka zazo uh a, ka mit taw ka mu zo uh hi; hi hi, mu zo khu hi, ka khut uh taw tham zo khu hi. * 2Hi nuntakna hong kilangh a, kote in ka mu zo uh hi; tua ahikom kote heak tu a hong kihil Pa taw a omkhawm tua tawntung nuntakna thu ka sason uh a, na tung zongh ah kong son hi. * 3Pa le a Tapa Jesu Christ taw ka kipawl khat theina sungah nong pop thei natu in, ka mu uhte ka zaak uhte no tungah kong phuang uh hi. 4Kote lungdamna a pawlcing thei natu in hi lai kong at uh hi.

Pathian sia Khuavak

5Tu in a Tapa tung pan ka zaak thu le kong zaak sak uh thu in hi thu ahi hi. Pathian in khuavak hi a, ama sungah khuazing a om bua hi. 6Tua ahikom ama taw kipawl khat hi hing ci napi khuazing sungah ih om le ih kampauna le ih ngamtatna taw a leeilot te ih hi hi. 7Ama sia khuavak ahi bangma in— khuavak sungah ih nungta le eite khat le khat kipawl theina a neite ih hi a, tasia ciangin a Tapa Jesu chisan in ih mawna theampo panin hong thiansua hi.

8Mawna nei bua hing ih cile eima le eima kitheam ih hi a, ih sungah thumaan om ngawl ahi hi. 9Ahihang ih mawnate Pathian tungah ih pualaak le ama sia a kamciamte keam tu a, thumaan thutangte vawt ahikom ih mawnate hong mai sak tu a, ih ngamtat khialna theampo pan hong thiansua tu hi. 10Maw ngei bua hing ih cile Pathian sia a leeilot pa ih suak sak a, ama kammal sia eite sungah a om bua hi.

⇑

[Remove Footnotes]