PETER

Laithak A khatna (The First Letter from Peter)

Thupatna

Peter Laithak A khatna sia “Pathian teal sa mihingte” a kici Asia Minor saksang ngam theampo ah, a kithethaang Tapidawte tungah a thaak ahi hi. A laithak ii deina bulpi in upna hangin vawtsiatna le ngimna a thuakte hanthot natu ahi hi. Lai atpa in laisimte sia Jesu Christ Lungdamna Thupha ahi, a thina, a thaw kikna le hong pai kik natu a kamciamte phawk sak kik a, tua taw lametna a nei natu in, hanthawn hi. Tua hi a, amate upna a maan takpina a kiheak natu in, sinna hi ci in phawk a, “Jesu Christ hong kilak Ni ciangin” thamaan a nga natu muanna taw hi bang haksatna te a thuak tu le a saan tu ma ahi hi.

Ngim nga hun sung a, a hanthot kawmin Christ ii neisa mite bangin lai a simte nuntak natu in, lai atpa in sawl hi.

A kihel Thulute

Thupatna 1:1-2
Pathian ngupna phaw sak kikna 1:3-12
A thiangtho nuntak zia hanthotna 1:13-2:10
Haksat hunsung Tapidawte tavuan 2:11-4:19
Tapidawte kiniamkhiakna le sepna 5:1-11
Thukhupna 5:12-14

Peter Khatna 1

1Jesu Christ ii sawltak Peter in—

Pontus, Galatia, Cappadocia, Asia le Bithynia ngamte ah ngaltai a a kithethaang Pathian teal sa mite tungah lai kong thaak hi. 2No sia Pa Pathian tupna taw Jesu Christ thu a ni tu le a chisan taw a kithiansua tu in, ama Thaa taw hong teal sa a thiangtho minam a suak sate na hi uh hi.

Thuthiamna le thinnopna note sungah hong dim tahen.

A nungta Lametna

3Topa Jesu Christ ii Pa le Pathian tungah lungdamna ko tawng! A lian hong hesuakna hangin, Jesu Christ a thaw sak kikna tungtawn in nuntakna thak eite hong pia hi. Hi in a nungta lametna taw hong dim a, 4tua ahikom a mite atu, ih Pathian ii a koi a thupha tam mamate, ih lua natu in, ih lamen hi. Ama in note atu tua thuphate vantung ah koi a tua munah tuate in muat thei ngawl, lal thei ngawl le vul thei ngawlin om hi. 5Hun tawpkhak ni ciang kilak tu a kinging sa in a om, upna tungtawn in ngupna a nga tu in Pathian vaang taw hong kepcing note atu, tuate hong kikoi sak hi.

6Tu laitak hun tawm vei no sung khuangaina na thuak uh kul hi kale hi thute ah lungdam vun. 7Tua haksatna thuakna ii tupna in na upna uh a maan ziam ci in a kilak natu ahi hi. A kisia sak thei kham ngangawn zongh meisa taw kisit lai hi. Tua ahikom kham sangin tam mama in a manh nei zaw na upna uh sia a kip natu in hong kisit tu hi. Tua hile Jesu Christ hong kilak Ni tak ciangin pokna minthanna le vaang piakna na saang tu uh hi. 8Ama mu ngawl na hi uh hang na it uh a, tu in ama mu ngawl na hi uh hang ama na um uh hi. Tua ahikomin, kam taw a kison zo ngawl dongin nasia takin na lungdam uh hi. 9Banghangziam cile ama na upna uh hangin thaa ngupna na saang uh a, tasia in na upna uh ii a tupna bulpi ahi hi.

10Kamsangte ii a zon le a kat in hi ngupna hi a, Pathian ii no tung hong piak tu huvau amate in, son khol zo hi. 11Amate in tua thu sia bang hun ciang tung tu a, bangbangin hong pai tu ziam, cisia heak tu in, hanciam uh hi. Christ in ngim thuak tu a, tua zawkciang minthanna taw kizom tu hi ci in amate sungah a om Christ Thaa ii a son kholna in tu hun ahi hi. 12Vantung panin Thaa Thiangtho ii vaang taw a sawl, Lungdamna Thupha a thang sak tu, thupuakte na zaak tu huvau Pathian in hi kamsangte tungah a sonlaak ciangin amate atu a son hi ngawlin, noma phat tuam natu in, seam hizaw hi. Hi thu sia vantung lalangte dong ii heak nop uh thu ahi hi.

A thiangtho Nuntakna tu Sapna

13Tua ahikom a diang tu in, kingin kholna khua ngaisutna nei tavun. Jesu Christ hong kilangh ciangin, note hong piak tu thuphate tungah lametna a cingin, nei tavun, na kipilvang sak tavun. 14Pathian thu ni vun. Taciang na heak ngawl lai uh bang hi ngawlin, na nuntakna uh sia chi le sa deina in uk sak heak vun. 15Tua hi ngawl zaw in, na sep na vawt theampo sungah note hong sam Pathian a thiantho bangma in thiangtho vun. 16Laithiangtho in, “Kei thiangtho ka hikom no zongh thiangtho vun,” ci hi. *

17Mihing theampo ii sep sa tungah a kibang khaikhin taw thu a khen Pathian tungah thu na nget uh ciangin, Pa awng, na ci uh hi; tua ahiciang hi leitung ah nungta in na om uh laiteng ama zakta tavun. 18Na pu na pate pan na luasuk uh, a mannung ngawl nuntakzia panin, na suatak natu in, note bang taw hong kilei ci thu na he uh hi. Ngun le kham bangin a kisia sakthei thilte taw hong kilei ngawl hi; 19tuuno sitbaang ngawl khat bangin, a mealhem ngawl a manpha mama Christ chisan taw hong tan a hina he tavun. 20Ama sia simlei a kibitphua maa in, Pathian teal kholsa hi a, hi ni tawpkhak sang hunte sungah no atu hong kilak ahi hi. 21Ama tungtawn in, ama sia thina pan tho sak kikin, minthanna a pia Pathian na um uh hi. Taciang note upna le lametna sia Pathian tungah kibul hi.

22Tu in thumaan thutakte na nit uh hu in, noma le noma na kithiansua zo uh a, na thu up pui mihingte na it takpi uh hi. Na thin theampo taw khat le khat nasia takin ki it tavun. 23Banghangziam cile a nungta tawntung a kip Pathian kammal tungtawn in, a thi thei hi ngawl, a thi maw nu le pa sung pan, tate bangin, na piang kik zo uh hi. 24Laithiangtho in,

25Ahihang Topa kammalte sia a tawntung in kip hi,” ci hi.
Hi kammal in Lungdamna Thupha a kici no tung a hong kithang sak sia ahi hi.
⇑

[Remove Footnotes]