THESSALONICATE

Tungah Paul ii Laithak A khatna (Paul's First Letter to the Thessalonians)

Thupatna

Thessalonica khua sia Rome kumpi uksung Macedonia ngam khuapi ahi hi. Paul in Philippi a nusiat zawkciangin tua khua ah Pawlpi khat phut hi. Ahihang hai ngawlin Jewte pawlkhat in langpan hi, banghangziam cile Jew ahi ngawl mihing pawlkhat in Tapidawte thuhil zaaknop huai sa in, Paul ii amate tungah a thuhilna in maa paina nei ahikomin eang uh hi. Paul sia Thessalonica panin kinot a Berea khua zuan hi. Tua zawkciang Paul sia Corinth khua hong theng a, tua munah a kitholpui le a naseppui Timothy in Thessalonica pawlpi sungah thupiang teng sia maitang kisi in ko hi.

Paul ii Thessalonica pawlpi tungah a laithak masa sia in tua mun a Tapidawte hanthotna le thinmuan natu in a at ahi hi. Ama in amate upna le ki itna huvau thupha a zaakte hu in lungdamkona nei hi, amate taw Paul a om lai a, a nuntakziate phawk sak a, taciang Christ hong pai kik natu huvau, Pawlpi sung thupiang doknate zo hi: Christ hong pai kik maa in, a thite in ama hong heak kik ciang hong ken tu, nuntak tawntungna nga thei tu ziam? Christ sia banghun ciang hong pai kik tu ziam? Paul in hi a hun nga sia zangh in, Christ hong pai kik tu muanmawkna sungah dai takin ngakin, naseam vun ci in son hi.

A kihel Thulute

Thupatna 1:1
Lungdamkona le Pokna 1:2-3:13
Tapidaw ngamtat zia tu hanthotna 4:1-12
Christ hong pai tu hilnate 4:13-5:11
A khakbel hanthotnate 5:12-22
Thukhupna 5:23-28

1 Thessalonicate 1

1Paul, Silas le Timothy in Pa Pathian le Topa Jesu Christ ii neisa ahi Thessalonica pawlpi mite tungah lai kong thaak uh hi:

Thuthiamna le thin nopna sia no aa hi tahen. *

Thessalonicate Nuntakna le Upna

2Note atu in Pathian tungah lungdam ka ko tawntung a, taciang thungetna sungah na min kong lo tawntung uh hi. 3Na upna uh na zakzia uh le, itna na nei uh hu a, nasia takin na nasepna uh, ih Topa Jesu Christ sungah na lametna uh a kipzia sia ih Pa Pathian mai ah kong phawk uh hi. 4Ka suapuite awng, Pathian in note hong it a, ama atu in hong teal sa na hi uh sia ka he uh hi. 5Banghangziam cile Lungdamna Thupha sia, kammal nguak taw hi ngawlin, vaangletna le Thaa Thiangtho taw le a thumaanna up takpina taw no kungah kong puak uh hi. Note taw ka om uh lai in bangbangin nungta khu ziam ci in nong he uh hi; tuate in noma ii phat natu ahi hi. 6Topa le kote ngamtat bangin nong zui uh hi; nasia takin thuak na hi ta uhzong, Thaa Thiangtho kung pan hong pai lungdamna taw a thu na saang zo uh hi. * 7Tua ahikom note sia Macedonia le Achaia ah thu umte theampo atu in ettee tu khat na suak uh hi. 8Bangbangziam cile Topa thu in no tung pan Macedonia le Achaia kantan in pai a, tua bek dom ngawlin, Pathian na upna uh sia mun theampo ah thengin thang hi. Tua ahikom thudang bangma ka son tuan tu om ngawl hi. 9Tua mihing theampote in kong haw uh lai a, nong saan zia uh te son tek a, milim biakna pan Pathian sangah na kiheakna uh, a maan le a nungta Pathian atu sep sak tu le, 10taciang Pathian thin uukna hong tung tu sia pan hong suatak, ama ii thina pan a thaw sak kik, vantung pan hong pai tu Topa Jesu ngak tu in na om uh thute son hi.

⇑

[Remove Footnotes]