1 TIMOTHY

Tungah Paul ii Laithak A khatna (Paul's First Letter to Timothy)

Thupatna

Asia Minor ngam pan a Tapidaw khangmoi Timothy sia a nu Jewte hi a, a pa Greek te ahi hi. Ama in Paul ii ngamkeak nasepna sungah a khutdawn pa le a kitholpuipa suak hi. Paul ii Timothy tungah a laithak masa sia thu nam thum bulphu hi.

A masa phitbel in Pawlpi sungah hilna maan ngawlte huvau kidop natu hil kholna ahi hi. Hi kihil khialna in Jewte le Jew hi ngawlte ngaisutna a kingawm hi a, hi leitung in, sia mama ahikom ngupna sia heakna thukuu pawlkhat hang, an pawlkhat tenna hang le zi nei ngawl pasal nei ngawl a omna hang bek in kinga thei hi ci in upna kidoppha ahi hi. Laithak sungah pawlpi ki ukzia le biakpiakna hilna kihel a, pawlpi lampuite le pawlpi upate nuntakzia tu hilna hisi hi. Akhakbel in Timothy in Jesu Christ ii naseam pha a sua natu le thu um pawl tatuam sungah ama sep tu a nei thute a hilna ahi hi.

A kihel Thulute
Thupatna 1:1-2
Pawlpi le a sungah lampui naseamte hilna 1:3-3:16
Timothy nasepna tungtaang ah hilna 4:1-6:21

Timothy khatna 1

1Jesu Christ sawltak khat ahi Paul in, eite hong Hunpa Pathian le eite lametna Jesu Christ thupiak na bangin— *

2upna sungah ka tapa tatak ahi Timothy tungah lai kong thaak hi.

Pa Pathian le Topa Jesu Christ in, thuthiamna, hesuakna le thinnopna nang hong pia tahen.

Kihilna Maan ngawlte pan Kidop natu

3Macedonia ah ka pai lai kong sawl sa bangma in Ephesus ah na taam tu uh sia kong dei sak hi. Tua munah mihing pawlkhat in upna bulpi maan ngawl hil hi, amate sia tabang hilna pan a tawp natu in, thu na pia ta in. 4Kinialna a piang sak tangthute le khang tepteena saute a vawk natu in na son in; tuate in upna bek taw a piang Pathian tupna tangtut natu in kizangh ngawl hi. 5Hi thupiakna ii tupna sia, lungtang thiangtho, thinsung thiangtho le upna tatak panin hong piang ki itna a khanto thei natu deina hi. 6Mihing pawlkhat in hite panin lampial in a mawmawt huai kam kikupnate sungah ngammang uh hi. 7Amate in Pathian thukham hil syate suak nuam ahihang, amate kammal tatak ma ahizong kimuan tatakna taw a son uh thute ahizong a tel bua uh hi.

8A kizak tu bangin a kizangh na le Thukham sia pha hi ci in ih he hi. 9Ih phawk tu a kul thu sia, thukhamte in mihing phate atu kipia ngawlin, thukham paltante le mihing a khialte, Pathian selte le a mawte, biakna kin ngawl le thaa mi ahi ngawlte, pate, nute a thatlumte, mihing thatte, 10numei le pasal huvau a paktatte, nupa ngeina ngawlin pumpi a zanghte, mihing a ngute, leeilot in thumaan ngawl tetti a pangte tua ahibale a pha a kho upna bulpi taw a kileebul in ngamtatna a neite atu in a kipia ahi hi. 11Tabang hilna sia ka than sak tu in hong ki aap, a minthang, thupha toai Pathian kung pan hong pai Lungdamna Thupha sungah kimu hi.

Pathian Hesuakna hu in Lungdam kona

12Ka nasep natu in thangui thatang hong pia Jesu Christ ih Topa tungah lungdam ka ko hi. Ama na seam tu in nasep piak tu kilawm hong sak hu in, a tungah ka lungdam hi, 13hun bo sa sungah ama ngensia in, siatvawt in lang zazan ngei hi ka leng, upna ka nei maa, heak ngawl manin a ngamta ka hikom Pathian in kei hong hesuak hi. * 14Taciangin ih Topa in a thuthiamna a kicing takin hong buak a, Jesu Christ taw kikopna sungah eite neisa ahi upna leh ki itna kei tungah hong pia hi. 15Jesu Christ in maw neite hun tu in leitung ah hong pai hi cisia thumaan hi: a cing takin up tu le saan tu ahi hi. Tua a mawte sung pan keima in a mawbelpa ka hi hi. 16Ahihang nungsang ciangin ama um in nuntak tawntungna a saang tute ettee tu in, kei a mawbelpa tungah Jesu Christ in thinsauna a cingin hong lak thei natu in, Pathian in kei hong hesuak hi. 17Tawntung Kumpipa, a thi thei ngawl, a kimu thei ngawl, ama bek Pathian tungah upatna le minthanna a tawntung in hong om tahen! Amen.

18Ka ta Timothy awng, nangma huvau a hun bo sa sungah kamsaan sonkholna a om bangin hi thupiakna sia na khut sungah muangin kong aap hi. Ngal pha tak na do thei natu in hi kammalte ngalhiam in zangh in a, 19na upna kholet in, thinsung thiangtho na nei tan. Mihing pawlkhat a thinsung uh pan, a piang thute um ngawlin upna lal sak uh hi. 20Tuate sungah, daan ka piakna in Satan vaangletna sungah ka aapte ahi, Hymenaeus le Alexander te kihel uh hi; amate ii Pathian min a dai sakna uh pan a kheal natu in hi bang ka vawtna in hil tu hi.

⇑

[Remove Footnotes]