CORINTHTE

Tungah Paul Laithak A Niina (Paul's Second Letter to the Corinthians)

Thupatna

Paul ii Corinthte tungah a nii veina laithak sia Corinth Pawlpi taw a kizopna sungah hun haksa khat laitakin a at ahi hi. Pawlpi mite pawlkhat in Paul sia nasia takin el hi tuak a, ahizong Paul in amate taw kilem kikna sia dei mama ahi hunlam son a, tua kilem kikna a pian ciangin, a lungdam mama na thu at hi.

Laithak, a masa sang ah, Paul in Corinth Pawlpi taw kizopna at hi. Pawlpi sungah kilanna, ki elna thute hangin nasia takin a zo kikna thu ahizong, tua in, kisiina le kilemna piang sak kik ahikom a lungdamna thute at hi. Tua zawkciang, Judea ngam a om Tapidawte a cimawte atu ngo takin piak natu a ngetna thu at hi. A khakbel sangah Corinth khua ah sawltak maan ka hi uh a kicite ii Paul sia sawltak maan hi ngawl hi a cina teng sia ama le ama a kihukna thu at hi.

A kihel Thulute

Thupatna 1:1-11
Paul le Corinth khua pawlpi 1:12-7:16
Judea ngam a Tapidawte atu sumpi khon natu huvau 8:1-9:15
Paul in sawltak khat a hina ama le ama a kihukna 10:1-13:10
Thukhupna 13:11-14

Corinthte Niina 1

1Pathian deina taw Christ Jesu ii sawltakpa ahi Paul le ih suapuipa Timothy in—

Corinth khua ah Pathian pawlpi le Achaia ngambup ah Pathian mihingte theampo tungah lai kong thaak uh hi: *

2Ih Pa Pathian le ih Topa Jesu Christ in thuthiamna le thinnopna hong pia tahen.

Paul in Pathian tungah Lungdamko

3Ih Topa Jesu Christ ii Pathian le Pa, hesuak thiam Pa, huna theampo hong paina Pathian tungah lungdamko tawng! 4Pathian tung pan ih saan hunate zangh in ngimna namcin a thuakte ih hu thei natu in, ama in ih ngimna theampo sungah hong hu hi. 5Christ thuakna tam mama sungah ih kihel bangin Christ tungtawn in Pathian huna tam mama ih nga hi. 6Ka thuak uh le note atu in, huna le ngupna na nga natu uh hi a, kote hong kihu le note zongh hong kihu a, kote ii thuakte na thuak zawk natu in thin sauna le thahatna hong kipia ahi hi. 7Tua ahikom note sungah ka lametna uh sia ngawk zo ngei ngawl hi; ko thuaknate nong thuak pui uh bangma in, huna ka nga uhte sungah note zongh na kihel uh sia ka he uh hi.

8Suapuite awng Asia ngamkhen sungah ngim ka ngana uh te kong phawk sak nuam hi. Kote tungah hong kisuan vanhte lian lei a ngit lei ahikom, nungta tu zong ka ki um ngam bua uh hi. * 9Kote tungah thi daan hong kipia bangza in ka ngaisun uh hi. Ahihang hi thu ah, koma le koma kisuang ngawlin, a thite a tho sak kik, Pathian khat bek ka suan thei natu uh in a piang ahi hi. 10Tabang a kiitak huai thi thei natu panin, ama in hong ngum zo a, hong ngum lai tu hi; mai sang zongh ah ama in hong ngum lalai tu hi, ci in lametna ama tungah ka koi zo uh a, 11kote nong panpui na uh taw thu nong nget sakna uh hang ahi hi. Tua ahikom kote atu thu tam mama hong ki nget sakte hong kizo tu a, Pathian in ko sia thupha hong pia tu hi; taciang mihing tam mama in, kote atu nasia takin lungdamkona nei thei tu uh hi.

Paul ii Tupna Kikheal kikna

12Hi leitung ah ka nuntakna uh le note taw ka kizopna uh sia Pathian piak sa thin mamna, citakna le Pathian thuthiamna ii vaangletna hang hi a, mihingte pilna hang hi ngawl hi, ci in ka kiphasak uh hi. 13-14Na sim thei tu le na tel thei tu teng bek kong at uh hi. Ahizong tu in a lalang bek hong tel tu na hi uh hang, ih Topa Jesu Ni hong thet ciang hong tel thiang tu kong lametna thu panin, note hu in ka kiphat sak uh bangma kote hu in na kiphasak thei tu uh hi.

15Hite theampo thumaan hi ci in ka he a, thupha nii vei na nga thei natu in note kungah haw tu in ka ngeal hi. 16Judea ngam ah ka khualhaw natu taw kisai note tung pan huna dei ka hikom Macedonia ka pai lam le ka cia lam in note kungah hong baang tu in tupna ka nei hi. * 17Hi bangin tupna ka nei ciangin telmeal om ngawl bang hi nong sa uh ziam? Hi bangin tupna ka nei ciangin keima deina bek ngaisun in, “Hi hi,” ci sii a, “Hi bo,” ci sii ka hi ziam? 18Pathian ii thumaan a son bangin, note tungah kong kamciamna sia “Hi hi” cile “Hi bo” ci thu hi ngawl hi. 19Banghangziam cile Silas, Timothy le keima kong hil Pathian Tapa Jesu Christ in “Hi hi” cile “Hi bo” ci thu hi zaw ngawl a, ama sia Pathian ii “Hi hi” a ci pa ahi hi. * 20Banghangziam cile, Pathian kamciam theampo tungah “Hi hi” a ci pa ahi hi. Hi thu hangin Jesu Christ tungtawn a, Pathian minthan nate “Amen” ka ci uh hi. 21Note taw kibangin kote Christ taw kipawl khawm a, ih nuntakna hong kip sak in Pathian hi a; eite hong tuam koi Pathian sia ama mama hi a, 22ama neisa ka hina uh kote tungah tepteena hong koi zo a, eite atu hong koikhol sak na theampote hu a, ih thinmuan natu in eite thin sungah Thaa Thiangtho hong pia sia in ama ahi hi.

23Corinth khua ah kong pai ngawlna sia note kong dopna hi zaw hi. Hi thu taw kisai ka thinsung hong heakpui ka tetti in— Pathian ahi hi! 24Na up tu uh thu sia zawthawk thu taw kong sawl bua uh a, na upna uh kip hi ci in kong he uh hi. Noma lungdam natu in note taw na a seamkhawm ka hi zaw uh hi.

⇑

[Remove Footnotes]