JOHN

Laithak A niina (The Second Letter of John)

Thupatna

John laithak a niina sia “Upa Khat” in “A it huai Nupi khat le a tate” tungah a at hi a, tualsung pawlpi khat le pawlpi mite a ci nopna hi tha tu hi. Hi laithak tomno ii deina sia khat le khat ki it natu le thuhil sya maan ngawlte le amate hilnate kidop natu ahi hi.

A kihel Thulute
Thupatna 1-3
Ki itna ii thupi zia 4-6
Upna bulpi maan ngawlte pan kidop natu 7-11
Thukhupna 12-13

John Niina 1

1Upa pa tung pan—

A it huai nupi le ka it tatak a tanote tungah lai kong thaak hi. Keima bek hi ngawlin thumaan thu a he theampo in note hong it hi. 2Banghangziam cile thumaan sia eite sungah om a, a tawntung in om top tu hi.

3Pa Pathian le Pa ii Tapa Jesu Christ in thuthiamna, hesuakna le thinnopna hong pia tahen; thumaan le ki itna sungah a om eite tungah tua thute hong tung tahen.

Thumaan le Ki itna

4Na tate pawlkhat sia, Pa ii dei bangin thumaan sungah om hi ci in ka mu ciangin ka lungdam mama hi. 5Tua ahikom, a it huai Nupi awng, nang tungah kong nget nop in: eite khat le khat ki it tawng ci thu hi. Hi kong at thu sia thupiak thak hi ngawl a, a kipat pan ih neisa thupiak sia ma ahi hi. * 6Tu a ka son kik itna ii khiakna sia Pathian thupiak zui in ih nungta tu hi ci nopna hi. A kipat pan na zaak sa uh bangma note theampo sia ki itna sungah na nungta tu uh hi, ci in thu hong kipia hi.

7Leitung theampo ah ngual theam theite tam mama pai zo a tua mite in Jesu Christ sia mihing in hong pai hi ci in saang nuam ngawl uh hi. Tua bang mihing khat sia ngual theampa hi a Christ ii Ngal ahi hi. 8Tua ahiciang ih sep sate taan ngawl a, na thaman a cingin na saan thei natu in, kikeam tavun.

9Christ hilna sungah om nuam ngawlin, a pai khialte in Pathian a nei bua hi. Hilna sungah a kipte in Pa le Tapa nei khawm hi. 10Tua ahikom khat po hong pai a, hi hilnate hong keng bua uh le na inn sungah tung sak heak vun a, “Thin nopna na nga tan,” zongh na ci heak vun. 11Banghangziam cile ama atu thin nopna a dei sak khat papo in ama ngitlo ngamtatna sungah kipawl khawm ahi hi.

Thukhupna

12Kong son tu tam mama om ahihang laithak taw hong son ngawlin, lungdamna a kicin natu keima tatak ma hong haw in maitang kisi a thuson thei natu ka lamen hi.

13Na it na Suapuinu ii tate in paupuina kam hong thaak hi.

⇑

[Remove Footnotes]