PETER

Laithak A niina (The Second Letter from Peter)

Thupatna

Peter Laithak a niina sia Tapidaw a suakciil mihonte ii sim tu in a ki at ahi hi. A thu bulphu in thuhilna maan ngawl a zangh pawlkhatte le tabang hil khialna pan, a piang paktatnate do kik natu ahi hi. Hi buaina nate a bo thei natu sia Jesu mama mu in ama thuson a zate sonna hangin a kinga heaknate ahi hi. Pathian le Topa Jesu Christ a maan takin heak natu le lai atpa thinbot thu khat in Jesu hong pai kik nawn ngawl tu hi, ci in hilna huvau ahi hi. Pathian in, “mihing khat beak zongh a siat tu dei ngawl in, mihing theampo a mawna pan, a kisiik kik tu dei ahikom Christ hong pai kik hak tu hi,” ci in son hi.

A kihel Thulute

Thupatna 1:1-2
Tapidawte a kisapna 1:3-21
Sya maan ngawlte 2:1-22
Christ a khakbel hong pai natu 3:1-18

Peter Niina 1

1Jesu Christ sawltakpa le silapa Simon Peter in—

Pathian le Ngumpa Jesu Christ thumaan thutang tungtawn a, kote upna za in a manpha upna, a neite tungah lai kong thaak hi:

2Pathian le Jesu, ih Topa na heakna uh tungtawn in, thuthiamna le thin nopna kicing no aa, hi tahen.

Pathian Sapna le Tealna

3Pathian ii a thiangtho vaangletna in, ama minthanna le phatna nga tu a, hong sam pa ih heakna tungtawn in, Pathian thu sungah nop sakna a maan nuntakna ih neina tu in, a kitaangsam theampo ei tungah hong pia hi. 4Hi bangin hong kamciam sa ahi a lian mama le a manpha letsongte sia, leitung ah hong lalcip sak thei tu chi le sa deina pan suatakna na nga natu le ama pianziate na siim thei natu in hong pia hi. 5Hi thu hang mama in, na hi thei tawpin phatna sia upna tungah belap vun; na phatna tungah heakna belap vun; 6na heakna tungah pumpi ki ukzawkna belap vun; pumpi ki ukzawkna tungah thuak zawkna belap vun; na thuak zawkna tungah Pathian bang hina belap vun; 7Pathian bang hina tungah, u le nau ki itna belap vun, tua u le nau ki itna tungah a theampo it theina belap vun. 8Hi kicinnate sia, na kitaangsapte uh hi a, taciangin tuate a kicingin, na nei uh le, tuate in no sia ih Topa Jesu Christ heakna sungah a ding zo tan, a kizenpa hong suak sak tu hi. 9Ahihang hi kicinnate a nei ngawlte sia, a khua muna toi ahikom mu thei ngawlin, a mawna luite pan, kithiansua zo ahi hunlam mangil zo uh hi.

10Tua ahikom ka suapuite awng, Pathian hong sapna le, hong tealna sia a kip, na neisa a sua natu in, a nasia zaw kan in, hanciam in, tabangin na hi le na upna na nusia kik ngei batu uh hi. 11Hi bangin ih Topa le Ngumpa Jesu Christ ii tawntung Kumpi ngam sungah tum thei natu thu a cingin hong kipia tu hi.

12Hi thute sia na heak sa uh hi a, na saan sa thumaan sungah, kho takin a om sa na hita uh zong, kong phawk sak kikik nuam hi. 13Hi thute na tepteena, kong satsua sak kikik tu sia, ka nuntak lai teng kei atu in, a maan nasep hi ci in ka ngaisun hi. 14Ih Topa Jesu Christ ii a thiangtho tak a hong son sa bangin, hi a thi thei nuntakna sia suut pal tu cisia ka kihe hi. 15Tua ahikom, ka thi zawkciang, hi thute a tawntung in nateptee thei natu, lampi kong hon sak natu, ka hi thei tawpin ka vawt tu hi.

Christ Minthanna Mit taw A mute

16Ih Topa Jesu Christ vaangletna taw hong pai natu thu kong heak sak ciangin vawt tawm thute ka sisan bua hi. Ama vaangletna sia ka mit uh taw ka mu sa uh ahi hi. 17A vaanglianbel Pa in, “Hisia ka it ka Tapa hi a, dik ka sak pa ahi hi,” ci a, Pa Pathian in upatna le minthanna a piak laitak tua munah ka om uh hi. * 18Hi aw vantung panin hong pai lai in, kote mama mual thiangtho tungah ama taw ka om khawm uh a, tua aw ka za uh hi.

19Tua ahikom kamsangte son thute tungtaang ah thin muanna ka nei seseam uh hi. Tua thute na thupi ngaisut tu pha hi, banghangziam cile, tua Ni khua hong vak a, nikonghong na thin sungah hong taan mateng in, khuazingna munah meivak taang bang hi tu hi. 20Tua ahikom, thildang vaallai a, Laithiangtho sung a om kamsaanna thu khat papo sia kuama in ama thu in, a khiakna son thei ngawl a hina thu, ciamtee tavun. 21Banghangziam cile kamsaanna thute sia mihing deina taw hong pai hi ngawl a, ahihang Pathian kung pan hong pai thute a son ciangin, amate sia Thaa Thiangtho in uk hi.

⇑

[Remove Footnotes]