THESSALONICATE

Tungah Paul ii Laithak A niina (Paul's Second Letter to the Thessalonians)

Thupatna

Christ hong pai kik natu muanmawkna ah Thessalonica Pawlpi sungah buaina om tan hi. Paul ii Thessalonicate tungah a laithak a niina sia in, Topa hong pai kik ni hong theng zo hi ci upna taw kizomin a at ahi hi. Paul in tua ngaisutna sia a puaphatna ah, Christ hong heak kik maa in, Christ ngalpa a kici khat ii lampuina taw ngitlona leh siatna sia a saangbel dong hong theng masa tu hi, tua "Ngilopa" in Christ langpan tu hi ci hi.

Sawltakpa in a laisimte sia haksatna le thuakna kawm pan a kipin a om natu, Paul le a nasep puite ii sep bangin nuntak natu na a sep natu, le thupha vawtna ah thinkiam ngawl natu thupi laak in, laithak at ahi hi.

A kihel Thulute
Thupatna 1:1-2
Pokna le phat vawtna 1:3-12
Christ hong pai tu huvau hilna 2:1-15
Tapidawte ngamtatzia Hanthotna 3:1-15
Thukhupna 3:16-18

2 Thessalonicate 1

1Paul, Silas le Timothy in—

Ih Pa Pathian le Topa Jesu Christ neisa Thessalonica pawlpi mite tungah lai kong thaak uh hi: *

2Ih Pa Pathian le Topa Jesu Christ in thuthiamna le thin nopna note tungah hong pia tahen.

Christ hong Pai kik ciang Thukhenna

3Suapuite awng, note atu in hun theampo ah Pathian ka pok uh kul hi. Tabang ka ngamtat tu uh sia maan hi, banghangziam cile na upna uh nasia khan mama a, taciang note midangte khat sim tungah na nei uh ki itna in lian seseam hi. 4Pathian pawlpite sungah no huvau ka kisuantaakna uh sia in hi thu hang ahi hi. Vawtsiatna le ngimna na thuak uh kawm panin, thuak tan zawkna le upna kizom suak a na nei uh hu in, kisuangtaak ka hi uh hi.

5Tu a na thuaknate hangin, Pathian Ngam sungah a om tu in, a kilawm mihingte suak na hi uh komin, Pathian thukhenna thumaan thutang a hina hong ki langh sak hi. 6Pathian in a maan bangin seam tu hi: note hong thuak sakte tungah thuakna tung sak tu a, 7taciang no a thuakte le ko zongh nop sakna hong pia tu hi. Topa Jesu vantung panin ama ii a thahat vantung lalangte taw, 8meikuang taw, Topa Jesu Lungdamna Thupha a ni nuam ngawlte le Pathian a nialte daan pia tu in hong pai ciangin ama in hisia seam tu hi. 9-10Ama mihing theampo le a thu um mihingte theampo hangin minthanna le vaang piakna a nga tu in, Topa hong pai Ni ciangin, Topa mai le vaanglet minthan na panin, amate kikhen tu a, tawntung lalcipna daan thuak tu hi. Note zongh, ko ii kong son thute um zo na hi uh ciangin tua thu um te sungah na kihel tu uh hi. *

11Note atu in a tawntung in thu kong nget sakna in hi thu hang ahi hi. Ama hong samna nuntakna sungah a kiphu a kilawm hong sua sak natu in, Pathian munah kong nget sak uh hi. Phat natu na deinate le upna nasepna khuangkhim thei natu in ama in a vaangletna taw hong tangtung sak tahen. 12Hi bangin ih Topa Jesu min in, note tung panin minthanna saang tu a, note zongh in Pathian le Topa Jesu Christ thuthiamna taw ama tung panin minthanna na saang tu uh hi.

⇑

[Remove Footnotes]