TIMOTHY

Tungah Paul ii Laithak A niina (Paul's Second Letter to Timothy)

Thupatna

Paul ii Timothy tungah a laithak a niina sia a khangmoi zaw naseppui le khutdawnpa ahi Timothy tungah aituam in ngaisutpha a piakna lai ahi hi. A deina bulpi in thuak zawkna tu thu ahi hi. Timothy sia Christ tungah thumaan takin tetti a pan tawntung thei natu in Lungdamna Thupha hilna a maante a kholet natu, Lai Thiangtho lui hilnate zongh a kipin a let natu, thupha puak Sya khat le a hil Sya khat bangin, thuakna le langpanna kawm pan a, a sep tute a sep natu, ngaisutna pha piakna le hansuana ahi hi.

A tuanin “A mawmawt huai le heakna kihel ngawl kinialnate” pan kidop natu, tuate in phatna piang sak ngawl a, a za mihingte tungah siatna bek piangsak ahikom, tuate sungah a kihel ngawl natu in, kidopna tu thu Timothy tungah a piakna ahi hi.

Hite theampo sungah Timothy sia lai atpa in, ama nuntak ziate ettee in a nei natu le nuntakna ii tupnate phawkin, a upna, a thinsauna, ki itna a neina, a thuakzawkna le siatvawtna sungah a thuaknate phawk sak hi.

A kihel Thulute
Thupatna 1:1-2
Pokna le hanthotna 1:3-2:13
Ngaisut piakna le kidop natu piakna 2:14-4:5
Paul ii omzia 4:6-18
Thukhupna 4:19-22

Timothy niina 1

1Christ Jesu taw kikop a, ih nei hong kikamciam nuntakna a thang sak tu in Pathian deina taw a kisawl Christ Jesu sawltakpa Paul in,

2Ka it ka tapa Timothy tungah lai kong thaak hi: *

Ih Pa Pathian le ih Topa Jesu Christ in thuthiamna, hesuakna le thinnopna hong pia tahen.

Lungdamkona le Hanthotna

3Ka pute ka pate sep bangin thinsung thiangtho taw a na ka sep sak Pathian tungah lungdamkona ka pia hi. Sun taw zan taw ka thungetna sungah nang kong phawk a, ama tungah lungdam ka ko hi. 4Na thituite ka phawk a, tua ahikom, ka lungdamna a kicin natu in, nang kong mu nuam mama hi. 5Na pi Lois le na nu Eunice te zongh ii a nei bang a na nei thintak upna na nei sia ka phawk hi. Nang zongh tabang ma in nei tu ni hi ci in kong muang tatak hi. * 6Hithu hu in, na tungah khut kong ngak ciang Pathian hong piak tel sia na nuntak sak natu in kong phawk sak hi. 7Banghangziam cile Pathian hong piak thaa in eite hong lauthau sak bua hi; tua hizaw ngawlin, a Thaa in vaangletna, itna le eima le eima ki uk zawkna taw hong kidim sak hi.

8Tua ahikom, Topa atu tetti panna ah maizum heak in, Christ atu in thongtaakpa kei atu zonghin maizum heak in. Tua hi zaw ngawlin Pathian nasep natu thahatna hong piak bangin, Lungdamna Thupha atu thuakna sungah na kihel in. 9Ama in eite hong hun a, ama mihingte ih sua natu in hong sam hi, eite ii sepnate hang hi ngawlin, ama tupna le thuthiamna hangin hong sam hi. Hun kipatma in ama in Christ Jesu tungtawn in hi thuthiamna hong pia hi, 10ahihang tu in ih Hunpa Christ Jesu hong paina tungtawn in tua thu hong kilak hi. Ama in thina vaangletna bo sak zo a, tabangin Lungdamna Thupha tungtawn in thi mawk nuntakna hong lak zo hi.

11Lungdamna Thupha a thang sak tu le a hil tu in, Pathian in sawltak nasep kei hong suan a, * 12taciangin hi thu hu in hite ka thuak hi. Ahihang thin muanna taw ka kidim nginge lai hi. Banghangziam cile ka uppa ka he a, ama in kei hong muang a hong aap sa teng sia tua Ni dong ama in hong kepcing sak thei tu ci in ka he hi. 13Thumaan kammal kong hilte na kholet in a, na zui tu etteena in nei in, taciangin Christ Jesu taw kikopna sungah, eite aa ahi upna le ki itna sungah na kip in. 14Ih sungah hong teang Thaa Thiangtho vaangletna tungtawn in, nang tungah, hong kimuang a hong ki aap na phate keamcing in.

15Phygelus le Hermogenes kihel in, Asia ngam mihing theampo ii kei hong taisat siat sia na he hi. 16Topa in Onesiphorus innkuan sungah hesuakna tung sak tahen, banghangziam cile tamvei ma ka thin hong nuam sak hi. 17Thonginn sungah ka om, ama in hong maizumpui ngawl a, Rome khua hong thet po ciangin hong mu dadong hong zong hi. 18Tua Ni ciangin Topa in ama tungah hesuakna pia tahen. Ephesus khua ah zongh, kei atu in ama in bangza in hong seam ci sia na heak mama ahi hi.

⇑

[Remove Footnotes]