JOHN

Laithak A thumna (The Third Letter of John)

Thupatna

John Laithak A thumna sia, “Pawlpi Upapa” ii, pawlpi lampui Gaius tungah a thaak ahi hi. Tapidaw dangte a huna hangin, hi lai atpa in Gaius pok a, taciang Diotrephes a kici pa huvau kidop natu in hil khol hi.

A kihel Thulute
Thupatna 1-4
Gauis Pokna 5-8
Diotrephes Kinialnamna 9-10
Demetrius Kinialnamna 11-12
Thukhupna 13-15

John Thumna 1

1Upa pa tung pan —

Ka it tatak ka lawm Gaius tungah lai kong thaak hi.

2Ka it ka lawmpa awng, thaa lam ah ki mangthei ci in kong heak bangma, na theampo ah na maa pai in na ciidam natu in thu ka ngen hi. 3Thumaan sungah a nungta tawntung na hi bangma in Tapidaw suapui pawlkhat hong theng a nang sia thumaan thu sungah takkha hi ci in hong son ahikom ka lungdam mama hi. 4Ka tate sia thumaan sungah nuntakna nei hi ci in ka zaak sangin, hong lungdam sak zaw thei a dang bangma a om bua hi.

Gaius Pokna

5Ka it ka lawmpa awng, Tapidaw mipui khualmi a hite tung ngangawn zongh ah thumaan takin na naseam hi. 6Na itna thu teng amate in hi sung pawlpi tungah hong ko uh hi. Amate khualhawna sungah Pathian dei bangin a paitan thei natu in na hu in. 7Banghangziam cile amate sia Christ atu naseam tu in khualhaw uh a, thu um ngawlte tung panin huna zongh saang ngawl uh hi. 8Tua ahikom ei Tapidawte in hi mihingte sia thumaan thu atu a sepna sungah ih seppui thei natu in, ih hu tu hi.

Diotrephes

9Pawlpi tungah laithak tomno khat ka at hi, ahihang amate ih lampui a suak nuam Diotrephes in kei ii ci bang sia hong thupi sim bua hi. 10Tua ahikom kong pai ciangin ama ngamtatna theampo ka phawk sak tu hi. Ko thu a cizaat huai a hong sonte le leeilot thu a sonte ka pholaak tu hi. Ahihang tateng bek sia ama atu in kicing sa ngawl lai a, Tapidaw suapuite hong pai ciangin saang nuam ngawl a tabang a saang nuam khat po a om ngangawn tho in biakinn pan hawlkeak lai hi.

11Ka it ka lawmpa awng, a pha ngawlte zui heak vun a, a phate zui tavun. Thupha vawtte sia Pathian neisa hi a, thusia vawtte sia Pathian a mu ngawlte ahi hi.

12Demetrius sia mihing theampo in phat son hi; thumaan thutak thu in ama phat son hi. Tua bek hi ngawlin ko zongh in tetti ka pang thua uh hi. Tua hi a thumaan son ka hi uh sia note zongh in na he uh hi.

A khakbel Kipaupuina

13Kong son nop tam mama om ahihang lai taw kong at nuam bua hi. 14No taw kimu pal tu in lametna ka nei a, tua hun ciangin maitang kisi in ih son tu hi.

15Thin nopna nga tavun.

Na ngualtamte theampo in paupuina kam hong thaak hi. Ko ii ngualtamte zongh maitang kisi in na paupui sak vun.

⇑

[Remove Footnotes]