SAWLTAKTE

Ngamtatna (Acts of the Apostles)

Thupatna

Sawltakte ii Ngamtatna sia Luke at Lungdamna Thupha taw a kizom to ahi hi. Tupna le sawmna thu bulpi pan, Jesu nungzui ciilte in ama ii Lungdamna Thupha sia Thaa Thiangtho ii lampuina taw, Jerusalem, Judea ngam bup Samaria le leimong dongin, bangbangin kizel sak ziam ci thu ahi hi. (1:8). Tua in Tapidawte kalsuan zia hi a, bangbangin Jewte tung pan, kipan phot a, tua zawkciangin, leitung bup ii upna a suana thu ahi hi. Lai atpa in, laisimte tungah Tapidawte sia Rome kumpite ii langpangte hi ngawl hi ci thu zongh pualaak nuam hi. Taciangin Tapidawte upna sia Jewte biakna a cialcingna hi ci in lak hi.

Sawltakte sia khen thum in kikhen thei hi. Jesu huvau Lungdamna Thupha a zai va-ial a, a kizelna le pawlpite a kiphuna hi a, (1) Jesu van kaa zawkciang Tapidawte ii Jerusalem ah a tukna a dianna, (2) Palestine ngam mundang ah tua thu a kikeau zia le (3) Mediterranian ngam Rome dongin a kikeauna thu hi.

Sawltakte sung a thupi khat sia Pentecost ni in Jerusalem khua ah thu umte tungah hong pai Thaa Thiangtho ii nasepna hi a, tua Tua Thiangtho in pawlpi le a lampuite ii hi laibu sungah a ki at thu le la te theampo sungah, lampui in tha a piakna thu ahi hi. Tapidawte thu sia thuhilna pawlkhat sungah kitom son a, taciang Sawltak sungah a kikhum thute in, a umte ii nuntakna sung le, kipawlna sungah thahatna om hi ci thu lak hi.

A kihel Thulute

Tetti pan natu a kithoai kholna 1:1-26
a. Jesu ii a khakbel a thupiakna le a kamciam 1:1-14
b. Judas a laih pa ii thu 1:15-26
Jerusalem ah tetti panna 2:1-8:3.
Judea le Samaria a tetti panna 8:4-12:25
Paul ii Pathian nasepna 13:1-28:31
a. Thupha puak khualhaw masak phitbelna thu 13:1-14:28
b. Jerusalem ah kikhopna 15:1-35
c. A nii vei thuphapuak khualhawna 15:36-18:22
d. A thum vei thupha puak khualhawna 18:23-21:16
e. Jerusalem, Caesarea le Rome ah Paul ii thongtaakna 21:17-28:31

Sawltakte 1

1Theophilus awng:
Ka laibu masa sia sungah Jesu nasep a kipat pan a, kipan a sepna le hilnate theampo kong at zo a, * 2Ama ii van kaa ni dong, huam hi. A kilaak to maa in, sawltak tu a tealte tungah Thaa Thiangtho vaang taw thupiakna nei hi. 3A thi zawk ni sawm li sungah amate tungah tamveima kilak a, ama sia nungta nginge ahi hunlam up laak om ngawl tu in, a nanam in kilak hi. Ama sia sawltakte in mu uh a, Pathian Ngam thu ama in sonpui hi. 4Amate hong kikhoptua uh ciangin, hi bang thupia hi: “Jerusalem nusia heak vun, no tungah kong son sa Pa ii kamciam hong piak sa letsong sia, na ngak vun, * 5John in tuidam taw baptize hi, ahihang ni tawmvei no sungin, note Thaa Thiangtho taw na ki baptize tu uh hi. *

Jesu Van ah Kilato

6Sawltakte in Jesu taw a kisik uh ciangin, “Topa awng, Israel mite tungah a Ngam na pia kik tu ziam?” ci in dongh uh hi.

7Jesu in, “Hunte le thunei theinate sia ka Pa zeak hi a, bang hun ciang hi tu cisia no heak tu thu hi ngawl hi. 8Ahihang Thaa Thiangtho note tungah hong pai ciang, vaangletna taw na kidim tu uh a, Jerusalem pan kipan Judea ngambup le Samaria ngam le leimong dongin, ka tetti na hi tu uh hi,” ci hi. * 9Hi teng a ci zawkciang, amate mu tangin, van ah ama kilato a, meeikaai in lia hi. *

10Ama paina san vantung salh in, a om uh laitakin, puankaang silh pasal nii sia amate kungah hong ding a, 11amate in, “Galilee mite awng, van ento in banghangin tua munah ding top nu ziam? Hi Jesu sia note kung pan vantung ah a kilaak to na mu uh bangma in, tabang tatak ma in hong pai kik tu hi,” ci uh hi.

Judas Iscariot Laih pa

12Tua zawkciang Sawltakte in Olive Mual panin, Jerusalem ah cia kik uh a, tua mual sia khuapi panin, tai lang bang khuala hi. 13Amate Jerusalem khua sungah tumin, a taam ngeina mun inn tung dawl sungah om uh hi. Amate teng sia Peter, John, James le Andrew, Philip le Thomas, Bartholomew le Matthew, Alphaeus, ii tapa James, Minam it Simon, le James ii tapa Judas ahi uh hi. * 14Jesu suapui pate, a nu Mary le numei dangte taw amate pawlkhat, thungen tu in kikhawmtua nithi uh hi.

15Ni tawmvei zawkciang in, thu um teng kikhopna khat om a, mihing za le kul bang pha uh hi. Taciang Peter sia thuson tu in, ding hi. 16“Ka suapuite awng, Thaa Thiangtho in David tungtawn in, Jesu a man tute, lam a lak Judas huvau a son kholna Laithiangtho kammalte a taangtut kul hi. 17Judas sia koma ii pawl mi khat ahi hi, banghangziam cile ko nasepna sungah, ama zongh nasep khat nei tu in, a kiteal pa ahi hi.”

18(Judas in ama ngitlo ngamtatna taw a nga sum taw lo khat lei a, tua sungah pukvawk in thi hi; ama sia puaktham in, a sungkua theampo kikhuakeak hi. * 19Jerusalem ah a teang mihing theampo in tua thu za ahikom, tua lo sia, amate kam in Akeldama, a khiakna sia “Chisan Lo” ci in min phuak uh hi.)

20“Banghangziam cile Psalm late ii sungah ki at a,

21“Tua ahikom, Topa Jesu thaw kikna tetti in a pang tu mihing khat kote sungah hong kibelap kul hi. 22Ama sia bangbang mihingte hi tu ziam cile, John ii a ki baptize na huvau a hil hun pan kipan Jesu van ah a kilaak to dong a kilaklaw teng, Jesu khualhawna theampo sung, ko pawl sungah hong kihel top khat ahi kul hi,” ci hi. *

23Tua ahikom amate in, mihing nii ii min aap uh hi. Barsabbas a kici Joseph (Justus zongh kici si) khat le, Matthias ahi uh hi. 24Tua zawkciang amate in, “Topa awng, mihing theampo ii thinsung na he hi. Tua ahiciang, Topa awng, hite nii sung pan koisia teal ni ziam hong lak tan. 25Judas in a zot natu zuanin a nusiat sawltak za a awng sia dip natu in hong he sak tan” ci in thungen uh hi. 26Tua zawkciangin amate in, tua mite nii sung pan, a kiteal natu in, lai aisaan a, Matthias kiteal ahikom, ama sawltak sawm le khatte ii pawl sungah kibelap hi.

⇑

[Remove Footnotes]