COLOSSAETE

Tungah Paul ii Laithak (Paul's Letter to the Colossians)

Thupatna

Paul ii Colossian te tungah a laithak a kici bangma Asia Minor ngam Ephesus khua ii nisuana sangah a om Colossae khua pawlpi tungah a thaak ahi hi. Hi pawlpi sia Paul ii phu pawlpi hi ngawl hi, ahihang Paul ii et tu kilawm a sak ngamkuam sungah om a, Ephesus panin naseamte veu a pai sak, Asia ngamah Rome kumpite ii khuapi ahi hi. Colossae pawlpite sungah thuhil maan ngawl pawlkhat om hi ci in Paul in za a tua mite upna sia Pathian heakna tu le ngupna a cingin nga natu in mihingte in “Thaa lam ah a ukte le thunei te” biak kul tu hi ci uh hi. Tua tungsia ah, hi thuhilte in ngeina pawlkhat ahi, vunteap atna an neak lamsang le a dang ngeina te nasia tak zuina sungah ki aap kul tu hi ci uh hi.

Paul in hi thuhilnate sia a maan Tapidawte zui tu thute taw leedo natu in a at ahi hi. Ama zo kikna thubulpi sia Jesu Christ in ngupna a cing takin pia thei a tua upna le zuina dangte in ama kung panin, lam hong pial sak thei zaw hi ci in a at ahi hi. Pathian in Jesu Christ tungtawn in leitung bitphua a, taciangin ama tungtawn mama in tua leitung ama mama ii kungah then kik hi. Tua zawkciangin Paul in, thu umte nuntakna sungah hi kihilna lianpite a kizakzia teng at hi.

Colossae pawlpite tungah Paul laithak a puak sak pa Tychicus sia Onesimus a kici Philemon tung ama taangin Paul ii laithak taw a aap kik silapa in tonpui ahi hunlam sia teptee tuak thu khat ahi hi.

A kihel Thulute
Thupatna 1:1-8
Christ pianzia le a septe 1:9-2:19
Christ sungah nuntakna thak 2:20-4:6
Thukhupna 4:7-18

Colossaete 1

1Pathian deina taw Jesu Christ ii sawltak khat ahi Paul le ih suapuipa Timothy in–

2Colossae khua ah a om Christ taw pumkhat ahi a thumaan suapuile Pathian mite tungah lai kong thaak uh hi.

Ih Pa Pathian in thuthiamna le thinnopna hong pia tahen.

Lungdamko Thungetna

3No atu thu ka nget uh ciang ih Topa Jesu ii Pa ahi Pathian tungah lungdam ka ko tawntung uh hi. 4Banghangziam cile Jesu Christ na upna uh le Pathian mihingte theampo na itna uh ka za uh hi. 5Lungdamna Thupha a maan thuhilna no tungah hong theng masa a, tua ii hong piak lametna sia na za zo uh hi. Tua hang komin vantung ah no atu in hong kikoi sak na lametna uh sia ii tungah na upna le na itna uh, kingaa in om hi. 6Pathian ii thuthiamna in na zaak phit ni uh a, no tungah thupha hong puak in, no in a maan na heak tatak uh bangma in Lungdamna Thupha in, thupha puak a, leitung theampo ah zel hi. 7Pathian thuthiamna sia kote taangin Christ thumaan naseampa ka nasep pui Epaphras tung panin heakna na nga uh hi. * 8Ama in Thaa ii hong piak itna na neina uh ko tungah hong son zo hi.

9Tua ahikom note thu ka zaak pan kipan thu kong nget sak tawntung uh hi. Ama deina tel theina le a Thaa ii hong piak ciimna le heakna theampo taw note hong kidim sak natu in Pathian tungah ka ngen uh hi. 10Taciang Pathian heakna sungah khangto in nasep pha theampo Topa lungkim dong seam a, ama taw kiphu nuntakna na nei tu uh hi. 11Ama minthanna vaangletna in note hong thahat sakin a kiciangtan thei ngawl thinsauna le thin uaina sia lungpil tak a na zak thei natu thu kong nget sak uh hi. 12Khuavakna ngam sungah a mite ii lua tu uh ahi tel a lua tu a hong kilawm sak Pa tungah lungdam na ko tavun. 13Ama in khuazing vaangletna sung pan eite hong hun a, a it a Tapa ngamsung ah bit takin hong paipui hi. 14Ama hangin eite ih suakta a, mawna hong kimai sak zo hi. *

Christ ii Mihing A suana le A nasep

15Christ sia mu thei ngawl Pathian ii pianzia muna ahi hi. Ama sia bitphua sa theampo sung pan Tapa upa bel ahi hi. 16Banghangziam cile vantung leitung na theampo, a kimu thei le a kimu maw nate thaa taw kisai vaangletna, tote, ukte le thuneite theampo sia ama tungtawn in Pathian in bitphua hi. Pathian in ama tungtawn in simlei le vantung theampo ama atu in bitphua hi. 17Christ sia tuate theampo om maa in om a, ama taw kikop in a omna mun tu tek ah om uh hi. 18Ama in a pumpi ahi pawlpi lutang hi a, ama in pumpi ii nuntakna naak ahi hi. Ama in Tapa upabel hi a, na theampo sungah ama bek a masa phitbel ahi natu in thina panin tho kik sak zo hi. * 19Banghangziam cile Pathian ii khensatna om bangin Tapa in Pathian ii zia theampo a nei hi. 20Tua ahikom Tapa tungtawnin Pathian in vantung simlei sia ama kung a thet kik thei natu in khensat hi. Thinglamte tungah a Tapa ii kipum piak, biakpiak thina tungtawnin Pathian in kilemna piang sak a, leitung vantung ah a om, na theampo ama kungah then kik siat hi. *

21Hunkhat lai in note in Pathian taw na kikhuala uh a, ngitlo ngamtatna le ngitlo khua ngaisutna na nei uh manin a ngalte na hi uh hi. 22Ahihang tu in ama omna munah a thiangtho, a kidoituam, a sitbaang ngawlin hong thet thei natu in a Tapa pumpi thina hangin Pathian in a lawmte hong suak sak zo hi. 23A kho thu doppha tungah na thumaan tawntung vun a, lungdamna thupha na zak ciil uh lai a na nga uh lametna taw na kipeal nuam heak vun. Leitung mihing sim tungah a kihil hi Lungdamna Thupha hu in keima Paul sia naseam khat suak ka hi hi.

Pawlpi Naseam khat bang a Paul ii Nasepna

24Tu in no atu ka thuak nate tungtaang ah ka lungdam hi, banghangziam cile a pumpi ahi pawlpi atu Christ ii thuak tu a om laite a khuangkhim natu in keima in chi le sa taw ka thuak ciangin a hu ka hi hi. 25Taciangin kei sia Pawlpi naseam tu in Pathian in hong vawt hi a, note phat natu in hi nasep lian sia sep tu in hong kipia hi. Tua nasep lian sia ama thu a cing takin than sak natu hi a, 26tua thu in hun bo sa sungah mihing nam theampo te sung pan a kiseal, tuciangin ama mite tungah a kilak thukuu ahi hi. 27Pathian deina ahi, a tuanngen thukuu sia a mite ii heak natu le mihing theampo atu ahi hi. Tua thukuu in bang ziam cile Christ in note sungah om a tua hu in note in Pathian vaangletna na lua tu uh hi. 28Tua ahikom Christ sia mihing khat sim tungah ka hil uh hi. Pathian omna munah mihing khat sim in Christ taw kikop in, a khanthin natu in ciimna theampo taw hil in a kidop natu thu ka pia uh hi. 29Hi nasep a kizaw thei natu in ka sungah na hong seam Christ ii nasia tak a tha hong piakna zangh in diangin ka kisaan hi.

⇑

[Remove Footnotes]