EPHESUSTE

Tungah Paul Laithaak (Paul's Letter to the Ephesians)

Thupatna

Paul ii Ephesuste tung a laithaak na ah a thinbot a masa phitbel thu in “Vantung le leitung a om a bitphua sa theampo kaikhawm in a Lutang tu in Christ koi tu sia Pathian tupna hi,” ci thu hi.(1:10). Jesu Christ taw pumkhat hina tungtawn in, mihing theampo kilomkhat thei natu hi tupna bang a, nuntak thei natu, Pathian mihingte tungah thuumna hi sii hi.

Ephesus laithaak a khen masa sungah laithaak at pa in, Pa Pathian ii a mihingte a tealna zia, a Tapa Jesu Christ hangin a mawna uh kimai sakin, mawna panin a kisuatak sakna Pathian ii a lian kamciamte Thaa Thiangtho ii a kip sakna thu le pumkhat hina thu son hi. A khak sangah laithaak a simte nuntakna sungah Christ taw kipumkhatna a taksua thei natu, a nuntak natu in a thuumna ahi hi.

Pathian mihingte in Christ taw pumkhat a hina a lak natu in sonteena kammal tam mama zangh hi: Pawlpi sia pumpi bang hi a, Christ in a lutang ahi hi; tua ahibale inn bang hi a, Christ sia phungkawng suang ahi hi; tua ahibale pawlpi sia zi bangin sontee a, Christ sia a pasal bangin sontee hi. Lai atpa in Christ sungah Pathian thuthiamna a ngaisut ciang, a saang mama kammal zangh hi. Na theampo sia Christ itna, ki pumpiakna, mawmai sakna, thuthiamna le thianthonate taw et tu in at hi.

A kihel Thulute

Thupatna 1:1-2
Christ le pawlpi 1:33:21
Christ sungah nuntakna thak 4:16:20
Thukhupna 6:21-24

Ephesuste 1

1Pathian deina taw Christ Jesu sawltak khat ahi Paul in— Jesu taw kipumkhat nuntakna sungah a thumaan Ephesus khua Pathian mihingte tungah lai kong thaak hi; *

2Ih Pa Pathian le Christ Jesu in thuthiamna le thin nopna hong pia tahen.

Christ sungah Thaa lam Thuphate

3Ih Topa Jesu Christ ii Pa le Pathian tungah lungdam ko tawng! Banghangziam cile Christ taw kipumkhatna sungah ama in eite sia vantung ngam taw kisai thupha theampo hong pia hi. 4Christ taw kipumkhatna tungtawn in, ama mai ah sit baang ngawl le ih thiantho natu in, Pathian in leitung a vawt maa ngangawn in eite hong teal zo hi. Hong itna hangin, 5Pathian in Jesu Christ tungtawn in a tate hong sua sak natu in a khensat sa hi a— hi thu in ama diksak le tupna ahi hi. 6A minthang a thuthiamna hu le a it a Tapa sungah eite a thathongin hong piak letsong hu in, Pathian pok tawng. 7Banghangziam cile Christ ii kipum piak thina hangin eite kisuatak a, tua thu in ih mawna kimai sak hi, ci nopna hi. Pathian thuthiamna bangza in lian ziam, 8tua in, hi za ta a lian mama eite hong piak a thuthiamna ahi hi. *

Ama ciimna theampo le mu khol theina taw, 9Pathian in a tupna sa bangin vawt a, a pawlcing in a khensat sa ama tupna thukuu sia Christ zangh in, eite hong he sak hi. 10A hun hong tun ciang a khuangkhim tu dong a, Pathian vawt tu hi tupna sia, vantung leitung ah bitphua sa theampo kaitua khop natu le, amate ii lutang sia Christ ahi natu ahi hi.

11Na theampo sia Pathian tupna le khensatna bangin kivawt a; Pathian in a kipatciil pan mama in a khensat sa thu bulphu in, ama tupna hu in eite Christ taw kipumkhat a, ama aituam mihingte ih sua natu in hong teal hi. 12Tua ahikom Christ sungah lametna a nei phit eite in, Pathian minthanna pok tawng!

13Ngupna sungah hong then Lungdamna Thupha, thumaan thu na zaak uh ciang, note zongh Pathian mihingte na suak uh hi. Note in Christ na um uh a, taciang Pathian in hong kamciam sa Thaa Thiangtho hong piakna taw ama neisa na hina uh kitelna in tepteena hong khen hi. 14Tua Thaa in Pathian ii mihingte hong kamciam sate ih nga natu kip sakna hi a, ama neisa ahite tungah suatakna a cingin Pathian in hong pia tu hi ci in hong lungmuang sak hi. Ama minthanna pok tawng!

Paul ii Thungetna

15Hi thu hu in, Pathian mihingte na itna uh le Topa Jesu na upna uhte ka zaak a kipan, 16note atu in Pathian tungah lungdam kona ka tawlnga ngei bua hi. Ka thungetnate sungah kong phawk a, 17ih Topa Jesu Christ in Pathian, a vaanglian Pa tungah, nang hong ciim sak natu, ama na heak natu in Pathian hong lak natu, Thaa hong piak natu ka ngen hi. 18Bang lametna atu in note hong sam a, a mite a piak tu a, a kamciam thuphate bangza in nasia, ci in na heak natu in na thinsung uh hong kihon sak a, a khuavak na mu thei natu in kong nget sak hi, 19taciangin ei a umte sungah ama vaangletna sia bangza in lian ziam, ci in na heak natu kong nget sak hi. Eite sungah na hong seam hi vaangletna in, 20Christ thina pan tho sak kik a, vantung ama tokhum ziatsang ah a to sak vaangletna sia ma ahi hi. * 21Christ in tua munah vantung ukpite, thuneite, vaangletna neite, tote theampo ii tung panin uk hi; ama in hi leitung ah ahizong hong pai pheang tu leitung ah ahizong, thuneina zaneite theampo sangin a lianzaw min le za nei hi. * 22Pathian in na theampo sia Christ peangnuai ah koi a, na theampo ah pawlpi lutang tu in ama a pia hi. * 23Pawlpi in Christ pumpi hi a, ki cinna ahi ama mama in na theampo kicing sak kakoai hi.

⇑

[Remove Footnotes]