GALATIATE

Tungah Paul Laithak (Paul's Letter to the Galatians)

Thupatna

Jew ahi ngawl minamte tungah Jesu huvau Lungdamna Thupha kihil a, a kisaan thei tak ciangin mihing khat in Tapidaw a sua natu in Moses Thukhamte ma zui kul lai ziam ci in dokna piang hi. Paul in hisia kul ngawl hi ci in nial a, Christ sungah nuntak natu in a kibulphu thu sia upna hi a, tua tungtawn in mihing theampo Pathian mai ah thutang kisuak hi ci hi. Ahizong Romete uk Asia Minor sung ngam khat ahi Galatia pawlpite sungah mihing pawlkhat hong pai a, Paul langpan in mihing khat in Pathian taw ahi tu bangin a kizom nuamle Moses Thukhamte a tan kul hi ci uh hi.

Paul ii Galatiante tungah, a laithak in hi kihil khialna taw a pial mite sia upna le zuina maan taw khoi kik natu in at hi. Ama ii ci vaven thu pan, ama sia Jesu Christ sawltak a hina taw ama le ama a kihun zawkciang, tua sawltak nasep natu zongh Jew mi ahi ngawlte tungah seam tu a hina thu lak hi. Tua zawkciang ama ii nialna bulpi pan Pathian mai ah thutang suana sia upna khat bek tung pan hi ci hi.

A thukhupna ah Paul in Tapidaw mite ngamtatzia sia Christ ih upna tungtawin hong pai itna tung panin ama thuthu in hong luang hi ci hi.

A kihel Thulute

Thupatna 1:1-10
Sawltak khat a hina taw Paul thuneina 1:1-2:21
Pathian thuthiamna ii lungdamna thupha 3:1-4:31
Tapidawte suatakna le sep tu 5:1-6:10
Thukhupna 6:11-18

Galatiate 1

1Mihingte ii sap hi ngawl, mihingte ii vawt zongh hi ngawl, thina pan a tho kik sak Pa Pathian le Jesu Christ kung pan hong pai sawltak tu in sapna a nga keima Paul ii kung pan ahi hi. 2Hi sungah a om keima taw a kizom suapuite theampo in Galatia ngam pawlpite tungah lai kong thaak uh hi.

3Ih Pa Pathian le Topa Jesu Christ in thuthiamna le thinnopna hong pia tahen.

4Tu a hun pha ngawl sia panin ih suaktakna tu in ih Pa Pathian deina a nitna taw, Christ in ama le ama eite mawna atu in hong kipia hi. 5Pathian tungah minthanna om tawntung tahen! Amen.

Lungdamna Thupha Khat

6Note lamdang kong sa hi! Hun tawmvei no sungin Christ thuthiamna taw note hong sam pa, na taisan siat uh a, taciang lungdamna thupha a dang khat na saang uh hi. 7A tatakin, “Lungdamna Thupha a dang” om tuan ngawl hi. Ahihang hi bang a kong ci theina in mihing pawlkhat in Christ Lungdamna Thupha laih tu in hanciam uh a, na thin uh hong nawngkaai sak hi. 8Ahihang kote ka hi uh zong, ahibale vantung lalang khat keak ahizong note tungah kong hil sa Lungdamna Thupha taw a kitumdangin hong hil, a omle tua mi sia hell khuk sungah kivawk tahen! 9Tu masia zonghin kong cizo uh hi, tu zonghin kong ci kik hi. Khat po in na saan sa uh Lungdamna Thupha sia taw a kitumdang khat hong hil a, ahile tua pa in hell khuk sungah vawkna thuak tahen!

10Hi bang a ka pau sia mihingte dik sak tu deina awsua hi na sa uh ziam? Hi ngawl het hi! Pathian dik sak tu bek ka deina hi! Mihingte tung pan maipha nga nuam a hanciam ka hi ziam? Tabang hanciam lai ka hile Christ naseam khat ka hi batu hi.

Paul Sawltak A Suana

11Ka suapuite awng, kong son tu hi, ka hil Lungdamna Thupha in mihing tung pan a piang thu hi ngawl hi ci in kong son hi. 12Mihing khat papo tung panin ka nga zongh hi ngawl hi, kuama ii hong hil ahi bua hi. Kei tungah hong lak sia Jesu Christ ama mama ahi hi.

13Jewte biakna sungah ka kipiak laitakin kei, bangbangin a nungta mi ka hi hunlam na zaak sa uh ahi hi. Pathian pawlpi hesuakna nei ngawlin ka siatvawt a, ka lalcip sak natu in ka hanciam hi. * 14Jewte biakna ka zui sungteng in ka khanngualte lampuipa ka hi a, ih pute ii taangh ngeina nasia mama in a lenpa khat ka hi hi. *

15Ahitazong Pathian in ka pian maa in a thuthiamna taw hong tealpa ka hi a, ama na sep sak tu in hong sam hi. A khensatna hun hong cing a, * 16Gentilete tungah Lungdamna Thupha ka hil thei natu in a Tapa kei tungah hong lak ciangin, ngaisutna pha ngenin kuama kungah ka pai bua a, 17kei mai a, sawltak a seamte taw kimu tu zonghin Jerusalem ah ka pai bua hi. Tua taangin, Arabia ah thakhatin ka pai a taciangin Damascus ah ka heak kik hi. 18Tua zawk kum thum ciangin Peter tung pan thu za tu in Jerusalem ah ka pai a, nipi nii sung, ama kungah ka taam hi. * 19Topa suapuipa James sim ngawl sawltak dangte ka mu bua hi.

20Kong at teng thumaan hi. Leeilot ngawl ka hi sia Pathian in hong he hi!

21Tua zawkciangin Syria le Cilicia ngam mun tatuam ah ka pai hi. 22Tua hun laitakin Judea ah a om Pawlpite in kei hong he bua hi. 23Midangte ii hi bang a, a pau teng bekma a he uh hi: “Eite hong siatvawt mipa in khatvei lai in lal sak nuam a, a hanciam upna sia, tu in thuhilna in nei hi.” 24Tabangin kei hu in amate in Pathian pok uh hi.

⇑

[Remove Footnotes]