Hebrewte 4

1Tu in Pathian in, ama son sa tawlngak nuam sia ei nga thei natu in kamciam hong pia hi. Tua ahiciang eite khat zongh in, tua tawlngak nuam sia saang ngawlin ih om thaak ngawl tu kidawm tek tawng. 2Banghangziam cile eite zongh amate bangma in lungdamna thu ih za zo hi. Amate ahile tua thu za napi amate atu a phatuam bua hi. Banghangziam cile amate in a zaak uh ciangin upna taw a saang bua uh hi. 3Tua hi a, ei a umte in, Pathian hong kamciam sa tawlngak nuam sia ih saang hi.

4Banghangziam cile Laithiangtho sung mun khat ah ni sali ni huvau hi bangin kici hi: “Pathian sia a nasepna theampo pan a ni sali ni in tawlnga hi.” * 5Hi thu a kison kik leleau na ah, “Amate in tawlngakna ka piak natu ngamah a tum ngei batu hi.” ci hi. * 6Lungdamna Thu a za phit te in tua tawlngak nuam sia a saang bua uh hi. Banghangziam cile amate in a um bua uh hi. Tua ahikom a saang tu a a kidei sak midang om hi. 7Hi thu sia koi bangin kilak ziam cile Pathian in, “Tuni,” a kici ni dang khat koi hi. Tua zawk kum tam mama ciangin, a kison sa Laithiangtho khaante sungah a om bangma in Pathian in David tungtawn in, tua thute hi bangin son hi:

8Pathian kamciam tawlngak nuam sia Joshua in mihingte tungah pia zo hi thong le, Pathian in nungsang ciang nidang khat huvau son nawn ngawl tu hi. * 9Tua ahikom Pathian sia ni sali ni in a tawlngak bangma in, Pathian mite atu in tawlngak nuam khat om lai hi. 10Banghangziam cile tua Pathian kamciam a piak tawlngak nuam sungah a tawlnga peuma in, Pathian tawlngak bangma in, ama nasepna pan a tawlnga tu uh hi. * 11Tua ahikom, amate upna kisap hu in a nga zawk ngawl bang ih sua ngawl natu in, ei zongh tua tawlngak nuam sia ih saan thei natu in, nasia takin hanciam tawng.

12Pathian kammal in nungta a, thahat in, a lang le a lang hiam namsau sangin hiam zaw hi. Ama in thaa le thinsung kisik tuana mun ahizong, ngu le taang ngungeak kipee na mun ahizong saattan hi. Ama in mihing lungtang deina le ngaisutna tungah thu khen hi. 13Pathian mai ah bangma a kiseal a om thei bua hi; bitphua sa na theampo sia ama mai ah kipualaak siat hi. Taciangin ih sep ih vawt sa theampo tungah thu hong sit tu sia ama ahi hi.

Jesu sia Thiampi Saang Lianbel

14Tua ahikom ih upna ih pualaak sate ii tungtaang ah eite kip tek tawng. Banghangziam cile eite in Thiampi Saang Lianbel khat ih nei a, ama in Pathian omna tatak ah pai zo a, tua pa in— Pathian Tapa Jesu ahi hi. 15Ih Thiampi Saang in ei tha zawmna hong khuangai pui thei ngawlpa ahi bua hi. Tabang hi ngawl zaw in, Thiampi Saang in, eima bangma in ze-etna namcin na thuak a, ahizong a khial ngei bua hi. 16Tua ahikom, thuthiamna a omna mun Pathian kumpi tokhum kung hangsan takin zuan tawng. Tua munah hesuakna ih saang tu a, ih kitaangsap laitak hong hu tu in, thuthiamna ih mu tu hi.

⇑

[Remove Footnotes]