Hebrewte 6

1Tua ahikom Tapidaw mite tungah thu hil ciilnate, nung sangah nusia in, thuthuk kihil nate ah, mai sangah eite mainawt tawng! A mannung ngawl nasepna le ngaisutna te nusia in Pathian ih up tu ahi hi; 2baptize na nanamte ahizong, khut ngakna ahizong, tawntung thukhenna le a thi sate thaw kikna ahizong, kan suk kikik pheang nawn ba tawng. 3Eite mainawt tawng! Pathian in hong lungkim pui le, mainawt tu ahi hi.

4Banghangziam cile a upna uh a nusia sate sia a kisii kik natu in, kikaizawn kik thei nawn na ziam? Amate sia khatvei lai in Pathian ii khuavak sungah om ngei zo uh hi. Amate sia vantung tep ngei zo uh hi. Amate sia vantung letsong ahi Thaa Thiangtho zongh a saang ngei sa ahi uh hi. 5Pathian kammal pha hi ci in a tel sa, maisang a hong pai pheang tu, hun ii vaangletna zongh a he sa ahi uh hi. 6Tua zawkciang amate in a upna uh taisan uh hi! Amate sia a kisii kik tu sia suak thei nawn ngawl hi, banghangziam cile, amate in Pathian Tapa sia Thinglamte tungah kil kik a, mipi mai ah a maizum huai in a pholaak ahi uh hi.

7Lothote atu a limci ankungte a po sak, nguatui a dawn leitangh te ii tungah Pathian in thupha pia hi. 8Ahihang lopa le lingkungte a po sak a ahile, tua leitangh sia a mannung bua hi. Pathian ii haamsiat tu le, meikuangte taw halcip tu leitangh atu in lau huai hi. *

9Ahizong hi bangin ih pau hang, ki itpui lawmte awng, no atu sia ka lung muang hi. Note ii ngupna taw kizui thupha a phazawte na nei uh sia kong he uh hi. 10Pathian sia thutang ngawlin a khenpa ahi bua hi. Ama in na a sepnate ahizong, ama ii tungah itna na lakna uh ahi, Tapidawpui te ii tungah huna na piakte le na piapiak laite sia hong makngil sak ngawl tu hi. 11Dei sakna lianpi kong nei sakna uh sia, bangziam cile, na lamet uh thute hong tangtung takpi thei natu in, na lawpna uhte a tawp dong in, mihing sim in, na kepcing natu ahi hi. 12Na dathaam tu sia kong dei sak bua uh hi, Pathian ii kamciamte na nga natu in, a umte le a thinsaute bang na hi natu in kong deisak uh hi.

Pathian Kamciam a Tung Takpi tute

13Pathian in Abraham tungah kamciam a piak ciangin, a kamciam teng a taangtun natu ama in kiciamna vawt hi. Ama saang a lianzaw om nawn ngawl ahikom, ama ii min taw kiciam hi. 14Ama in “Thupha kong pia tu a, suan le paal tam mama kong pia tu hi ci in kamciam kong pia hi,” ci hi. * 15Abraham sia a thinsau ahikom Pathian ii kamciam teng sia saang hi. 16Mihing khat in ki ciamna a vawt ciangin, ama sangin a lianzaw khat ii min zangh a, tua in kinialna theampo bo sak hi. 17Ama ii kamciam a piakte, a saang tute tungah, Pathian in a tup a sawmna peal ngei ngawl hi, ci in thiang takin tel sak nuam ahikom a kamciamte sia, kiciam na taw in belap hi. 18Tua hi a, thu nam nii om hi, tuate sia kikheal thei ngawl a, Pathian in tua thute taw kisai in leeilot thei ngawl hi. Tua ahikom ama sungah thin muanna a ngate in, ih mai ah hong kikoi lametna sia kho takin ih let natu in nasia takin hanna ih nei hi. 19Hi lametna sia ih nuntakna atu in, thikluum kip bangin, ih nei hi. Tasia in, maanin, muan huai a, vantung biakinnpi a tawng bel kidalna puankhai sia pailet hi. * 20Ei taangin, Jesu in tua sungah ei mai ah pai khol zo hi. Taciang, Melchizedek thiampi sia taw a kinguizui in a lua, a tawntung atu in, thiampi saang hong suak hi. *

⇑

[Remove Footnotes]