Hebrewte 7

Thiampi Melchizedek

1Hi Melchizedek sia Salem kumpipa hi a, a Saangbel Pathian ii thiampipa ahi hi. Abraham sia kumpi li taw kisim in, ngalzo a hong cia ciang, Melchizedek taw kisi a Melchizedek in thupha pia hi. * 2Taciang Abraham in ngalte ii neisa a laak theampo tung pan see sawm sua see khat ama pia hi. (Melchizedek min ii khiakna masa sia “Thutang Kumpipa,” cina hi a, taciang, ama sia Salem kumpipa zongh kici si ahikom, “Kilemna Kumpipa,” zongh kici si hi.) 3Melchizedek ii pa ahizong a nu ahizong a pute a pate min ahizong a kiciamtee mun om ngawl hi. A suana ahizong a thina ahizong tepteena om ngawl hi. Ama sia Pathian Tapa bang ahi hi. Ama in a tawntung in thiampi hi top hi.

4Tua ahikom ama sia bangza in lian ziam ci in na ngaisun thei uh hi. A minthang ih pupi ahi Abraham zongh in, ngal kisim na phual pan a, a nga vanhte sung pan see sawm sua see khat ama pia hi. 5Taciang, Levi suan thiampite sia Thukham in see sawm sua see khat, Israel mite tung panin, a laak natu thu pia hi. Tuate in, a minampuite hi a, tua a minampuite sia Abraham suante ma ahi hi. * 6Melchizedek sia Levi suan hi ngawl hi. Ahihang Abraham tung panin see sawm sua see khat la in, Pathian kamciam a saang Abraham sia thupha pia hi. 7Thupha a pia pa in, thupha a saang sia sangin, lianzaw ahi hunlam tel laak om ngawl hi. 8Thiampite tungtaang a, see sawm sua see khat sia, a thi mihingte in la hi. Ahihang Melchizedek ahile, Laithiangtho son bangma in, see sawm sua see khat sia a nungta pa in la hi. 9Bang ci nuam hi ziam cile, Abraham in see sawm sua see khat a piak ciangin Levi in zongh a pia suak hi. (A suan a paalte in saang ahikom) 10A tatak in ci leang, Levi sia piang ngawl lai hi. Ahihang Melchizedek in, Abraham taw a kimu lai in Levi sia a pu Abraham pumpi sungah om hi.

11Israel mite tungah Thukham a kipiakna sia Levi thiampite bulphu in, a kipia ahi hi. Tu in Levi thiampite nasepna sia cialcing hile thiampi namdang khat a pian kul ngawl tu hi. Aaron za laih hi ngawlin, Melchizedek za laih tu a kul sia hi thu hang ahi hi. 12Banghangziam cile thiampi huvau ah kikhealna a om ciang, thukham zongh a kikheal kul hi. 13Tu a ih son teng huvau in, ih Topa sia phung dang pan hi a, ama be le phung sungah, thiampi a seam ngei kuama a om bua hi. 14Ama sia Judah minam a piang ahi hunlam sia a kuama po ii heak ahi hi. Taciang thiampite huvau a son ciangin Moses in Judah min a lo ngei bua hi.

Melchizedek bang Thiampi Dangkhat

15A thu paizia sia thiang va-ial hi. Thiampi tuam dangkhat hong khang hi. Tua pa sia Melchizedek bang ahi hi. 16Ama sia thiampi kisuak sak hi. Mihingte ngeina le thu vawt taw hi ngawlin mong nei ngawl nuntakna nam khat ii vaang taw kisuak sak hi. 17Banghangziam cile Laithiangtho in, “Nang sia a tawntung in thiampi khat na hi tu hi. Melchizedek taw ki nguizui thiampi za lua pa na hi hi,” ci hi. * 18Tua ahikom ngeina lui sia, kiheam hi. Banghangziam cile tua in thaneam a, a mannung bua hi. 19Banghangziam cile Moses thukham in bangma cialcin sakna a nei zo bua hi. Taciangin Pathian ih nai thei natu lametna pha zaw khat hong kipia hi.

20Tua ban ah, Pathian kiciamna zongh om si hi. Midangte thiampi in a kivawt lai in, tabang kiciamna a om bua hi. 21Ahihang Jesu sia thiampi a sua natu in Pathian in,

22Tua ahikom hi a lamdanna in, Jesu sia a phazaw thuciamna a kip sak pa suak sak hi.

23A kilamdanna dang khat zongh om lai hi: thiampi dang sia tam mama a om hi, banghangziam cile amate sia thithi a, a nasep uh a zomto thei bua hi. 24Ahihang Jesu sia nungta tawntung ahikom ama ii thiampi nasep sia ngualdang ii laih a kul bua hi. 25Tua ahikom ama in, tu pan le a tawntung in, ama tungtawn in, Pathian kung a zuante sia hun thei hi, banghangziam cile ama in amate atu Pathian munah thu nget sak tu in, a nungta tawntung hi.

26Tua ahikom Jesu sia ih kisapnate hong kicing sak thei, Thiampi Saang ahi hi. Ama thiangtho a; ama in mawna ahizong, kicin laakna ahizong, ama sungah a nei bua hi; ama sia mawneite sung panin, kidoi tuam a, van sangin a saang zaw in kilaamto hi. 27Ama sia thiampi saang dangte taw kibang ngawl hi; nisim a masa phitbel in, ama mawna atu le midangte mawna atu in, sangaw biakna vawt kul ngawl hi. Ama le ama a kipiak ciangin, a tawntung atu in, sangaw biakpiakna khat a vawt zo hi. * 28Moses Thukham in thiampi saang seam tu sia a cialcing ngawl mihingte sep hi; ahihang Thukham zawkciang hong piang, Pathian ii kiciamna taw a vawt kamciam in, a tawntung atu in, a cialcing Tapa sia Thiampi suak sak hi.

⇑

[Remove Footnotes]