Hebrewte 9

Leitung le Vantung ii Biakpiakzia

1Thuciam masa sia in biakpiakna ngeina le mihingte vawt biakna mun nei hi. 2Tuipuan buk khat kisa a, a puanung sia Thiangtho Mun kici hi. Tua sungah mei detna khuam le Pathian tungah a piak anluum a kikoi sabuai om hi. * 3Kidalna puankhak a niina sia ii nung sangah Thiangtho Bel Mun a kici buk khat om hi. * 4Tua sungah sathau namtui halna, kham biaktau le, kham taw a kituamcip Thukham Thingkuang om a, a sungah manna an kikoina kham uum le a teeno a suak Aaron ciangkhut le thukhamte a ki atna suangpheak niite om uh hi. * 5Tuate tungah Pathian ompuina lim a lak, tha nei vantung mite limte om a, maw kimai sakna mun ii tung panin a tha uh taw siin uh hi. Ahihang tu lai tak sia tua nate theampo a vaikhua in son tu hun ahi bua hi. *

6Hite sepzia sia hi bang ahi hi. Thiampite in nisim in buk puanung sungah tumin a sep tute seam uh hi, * 7ahihang a sungnung doituam sungah, Thiampi Saang bek kumkhat in khatvei tum hi. Ama ii mawna le a mihingte ii a heak ngawl mawnate atu in, chisan la in, Pathian bia hi. * 8Buk puanung sia a kip in a om laitengin Thiangtho Bel Mun kihong ngawllai hi, ci in Thaa Thiangtho in thiang takin hil hi. 9Hisia in tu hun a kawk lakna lim khat ahi hi. Pathian tungah a kipia biakpiakna le, nganno taw biakpiakna in, a biate thinsung cialcing sak thei ngawl hi ci thu kimu hi, 10banghangziam cile tuate in an, neak le dawn kithiansuana tatuamte hi bek hi. Hite sia a puatham zui tu ngeinate hi a, Pathian ngeina thak a piak sia a kip sak mateng atu hi bek hi.

11Ahihang Christ sia hi lai a, a om sa na phate theampo ii Thiampi Saang tu in hong pai zo hi. Ama thiampi sepna buk sia lianzaw a, cialcing zaw hi; tasia in mihingte ii vawt hi ngawl, hi simlei taw a kibitphua khawm ahi bua hi. 12Christ in Thiangtho Bel Mun ah khatvei a tum zawkciang, ama in, kealte le khuitalte ii chi sia biakpiakna tu in a keng bua hi. Ama chisan piazaw in, ei atu tawntung ngupna hong nga sak hi. 13Kealte le khuitalte chi le khuino a kihalte ii a vam sia biakna huvau a, a thiangtho ngawl mite thiangtho sak hi. * 14Hisia ahi teng ma hi ahikom, Christ chisan in bangza in seam zo zaw seseam tu ziam! Tawntung Thaa tungtawnin, ama in Pathian tungah ama le ama a cialcing biakpiak natu in, kipia zo hi. Ama chisan in a mannung ngawl biakna huvau panin, ih thinsung hong thiang sak tu hi.

15Tawntung thupha Pathian kamciamte a saan thei natu in, Pathian sap sa mihingte atu, Christ in thuciam thak khat hong vawt sakna in, hisia hang ahi hi. Hisia kipiang sak thei hi, banghangziam cile thina thu khat om a thuciam masa sia kip nginge lai ma in, mihingte a mawna panin tua thina in suakta sak hi.

16Neisa lua thei natu lai a ki atte tungtaang ah a lai atpa sia thi zo ci in a lak thei tu kisamh hi, 17banghangziam cile thi zawkciang atu in a ki at lai sia, a at pa thi mateng, kizangh thei ngawl a, a at pa thi zawk ciang bekin kizangh pheang hi. 18Tua hi a, thuciam masa sia zongh chisan zakna bek taw thu suak thei hi. 19A masa phitbel in Moses in, Thukham sungah a thupiak theampo mihingte tungah sonthiang phot hi. Tua zawkciangin khuitalte le kealte chi la in tui taw a hel zawkciang, hyssop baak le tuu mulsan pawlkhat zangh in, Thukham laibu tung le mihingte tungah the hi. * 20Ama in “Hi chi in Pathian ii ih zui tu a, hong thupiak thuciamna a kip sak sia ahi hi,” ci hi. 21Tasia bangma in Moses in Thuciamna Buk tung le biakna ah a kizangh nate theampo tungah chi the hi. * 22Thukham ci bang hile na theampo phial ma chisan in thiansua a, chisan a buak ciang bekin mawna te kimai sak hi. *

Christ Kipiakna in Mawnate Mai sak

23Vantung ah a om nate lim sia tabangin kithiansua hi. Ahihang vantung nate in a phazaw biakpiaknate kul sak hi. 24Banghangziam cile Christ in mihingte vawt, a tatakin vantung ah a om sia ii lim ahi, Thiangtho Mun sungah a tum bua hi. Ama in vantung tatak ma ah tumin Pathian mai ah eite luangin, a na kilak tawntung hi. 25Jewte Thiampi Saang in Thiangtho Bel Mun ah kumsim in nganno chi taw tum hi. Ahihang Christ in ama le ama kipia tu in, tamvei mama a tum bua hi, 26tabang hi thong le, simlei a kibitphua pan kipan tamvei mama na thuak zo tu hi. Tu in hun theampo a tawp natu hong nai ciangin, ama le ama a kipiakna taw mawnate kithiansua natu in, ama in a tawntung atu, khat vei hong kilak zo hi. 27Mihing theampo khat vei tek thi tu a, tua zawkciang Pathian in amate tungah thukhen tu hi. 28Tasia bangma in, Christ zongh mihing tam mamate mawna a laak sak tu in, khatvei a kipia ahi hi. Ama sia a nii veina hong kilangh tu a, mawna taw kipekan tu hi nawn ngawlin, ama ngak nginge in a omte hun tu ahi hi. *

⇑

[Remove Footnotes]