Hebrewte 11

Upna

1Upna nei ih ci sia, lametna ih neinate tungah thin muanna hi a, a kimu thei ngawl laite tungtaang ah muan ngamna ahi hi. Upna a nei hu in, taangh lai mihingte sia Pathian in diksa hi.

3Van le lei sia Pathian kammal taw kibitphua a, a kimu thei nate sia a kimu thei ngawl nate panin, kivawt hi ci in upna taw ih tel hi. *

4Upna taw Abel in Pathian tungah a biakpiakna sia Cain ii biakpiakna sangin pha zaw hi. Ama upna tungtawn in, ama sia Pathian in thutang hi ci in a saan pa hi a, banghangziam cile Pathian mama in a piakna saang hi. Abel thi zo ahihang ama in upna taw thu hong hil lai hi. *

5Upna in Enoch sia thina panin keam hi. A thi tu luangin, Pathian in ama la to a, kuama in ama mu zo ngawl hi. Laithiangtho sungah Enoch sia a kilaak to maa in, Pathian lungdam sak hi, ci hi. * 6Upna ngawl taw kuama in, Pathian lungdam sak thei ngawl hi, banghangziam cile Pathian kung a zuan peuma in, ama sia om takpi a, ama a zongte thaman pia hi, ci in, a up uh kul hi.

7A kimu thei ngawl maisang a, hong tung pheang tu nate huvau ah, Pathian ih kingintaak natu a son ciang, Noah ii a zaak thei sia upna hang ahi hi. Ama in Pathian thu ni a, teambaw vawtin, tua sungah ama le a innkuanpuite kisuatak hi.Tua hu in leitung bup sia puavawkna thuak a, taciang upna pan hong pai Pathian thutang sua sakna sia Noah in nga hi. *

8Pathian ii kamciam a piak sa ngam pai tu in, Abraham in Pathian ii samna a nit sia upna hang ahi hi. Ama in koisung pai tu ci in he ngawl pipi ma in, a ngam nusia hi. * 9Pathian ii ama tungah, kamciam a piakna ngamah ngamdang mi khatin a ten sia upna hang ahi hi. Ama in tuipuan buk sungah Pathian tung pan kamciamna ma a saang, Isaac le Jacob bangma in teang hi. * 10Abraham in Pathian ii ngealin a sak, a bul a kip top khuapi ngak nginge hi.

11Abraham sia huai mama zo a, a zi Sarah zongh ta nei thei ngawl khat hi napi upna in ama sia pa suak sak hi. Pathian in a kamciam sia tung sak tu hi, ci in muang hi. * 12Abraham sia a thithi ma hi zo napi, hi pasal khat ii sung panin, a suan le a paal sia van a aksi za le tuipi vaal ah a kisim zo ngawl senvui za ahi hi. *

13Hi mite theampo sia upna sungah thi uh hi. Amate in Pathian kamciamte saang man ngawl a, ngal et bang bek in, mu uh hi, ahitazong a lungkim in muak veve uh hi. Taciang amate in hi leitung ah ngamdang mi bang, ahi uh sia amate in son laak uh hi. * 14Tabang a sonlaakte in, amate aituam tu ngam khat lamen hi ci in kitel thiang sak hi. 15Amate in a nusiat sa ngam sia a ngaisusun nawn bua uh hi, ngaisun nuam le a heak kik natu hunpha om hi. 16Amate ii lungngul sia ngam pha zaw, vantung ngam hi zaw hi. Tua ahikom Pathian in amate ii Pathian hi a kici sia a mai a zum bua hi. Banghangziam cile ama in, amate atu khuapi khat vawt khol sa in koi sak hi.

17Pathian in Abraham a ze-et lai in, a tapa Isaac sia sangaw biakpiakna bangin a pia ngam sak sia upna ahi hi. Abraham sia Pathian ii kamciam a piakna pa hi napi ama in a tapa khat bek a nei sia sangaw biakpiakna in nei tu in kithoai hi. * 18Pathian in Abraham tungah, “Isaac tungtawn in kong kamciam sa suan le paalte na nei tu hi,” ci hi. * 19Abraham in Isaac sia Pathian in thina panin tho sak kik thei tu in um hi, tua ahiciang Abraham in Isaac sia thina panin nga kik— ci tu ahi hi.

20Isaac in Jacob le Esau ii maisang atu thupha a piak sia upna hang ahi hi. *

21Jacob in a thi mahiat in, Joseph tate ngeal thupha a piak sia upna hang ahi hi. Ama in a ciangkhut tungah kinga in Pathian bia hi. *

22Joseph in a thi dektak ciangin Israel mite Egypt ngam pan a, a pusua natu thu a son sia le ama luanghawm tungtaang ah a ngamtat natu uh a son teng sia upna hang ahi hi. *

23Moses a sua zawk tha thum ciang dong, a nu le a pa in, ama a sealcip uh sia, upna hang ahi hi. Amate in ama sia nauno hoi khat hi, ci in mu ahikom, kumpipa thupiakna a nit ngawl uh hang, a lau bua uh hi. *

24Moses hong khanthin tak ciang kumpipa tanu ii tapa a kici tu uuk ngawlin a nial sia upna hang ahi hi. * 25Tawmvei sung teng mawna sungah a nop sak tu sangin, Pathian mihingte taw a thuakkhop tu sia uuk zaw hi. 26Ama in Messiah hangin selnona a thuak tu sia, Egypt ngam ii hauna theampo sangin, kimanh zaw sa hi, banghangziam cile ama in maisang thaman a saan pheang lai tu te mitsuan hi.

27Moses in kumpipa thin uuk tu kiita ngawlin, Egypt ngam a nusiat sia upna hang ahi hi. A kimu thei ngawl Pathian sia a mu bang phetin, nungsang heak kik tu a uuk bua hi. * 28Mihing that vantung lalang in, Israel mite ta upabel theampo a thalup thaak ngawl natu in Paisan Poai piang sak a, kongkha tungah chisan a kinoina zongh upna hang ahi hi. *

29Upna in Israel mite San Tuipi leiko tung tot bangin, kantan sak a, Egypt mite in kantan tu in a kipat ciang, tuipi in amate valhlum siat hi. *

30Israel mite Jericho khua ni sali kiimkot in a pai zawkciang tua khua luphungte a cip thapna in upna hang ahi hi. * 31Pumpi zuak numei Rahab sia Pathian thu a ni ngawlte taw a kithalup khop ngawl natu in a kep sia upna ahi hi. Banghangziam cile ama in, Israelte ii ngalvilte zin do hi. *

32Ka son tato lai tu ziam? Gideon, Barak, Samson, Jephthah, David Samuel le kamsangte theampo ii thu ka son tu hun kicing ngawl hi. * 33Upna tungtawn in, amate in, ngambup khat sim uh a, zo uh hi. Amate in a maan nasepte seam uh a, taciang Pathian kamciamte saang uh hi. Amate in tawpite kam humcip uh a, * 34a kiitak huai meikuangte sumit in namsau taw thalup natu panin suakta uh hi. Amate sia thaneam kale thahatte suak uh hi; amate sia kidona sungah thahat a, ngamdang mi ngalkapte zothal uh hi. * 35Upna tungtawnin numeite in thina pan a nungta kik mealheakte nga kik uh hi. *

A dangte ahile, suatakna saan tu nial in, a phazaw nuntakna sungah a kithaw kik sak natu in, siatvawt zazan in thi uh hi. 36Pawlkhat sia kiselno in kivel a, pawlkhat sia thikkol kikhii in, thong sungah kikhum hi. * 37Amate suang taw kideang hi, tumh nii sua in ki attan a, namsau taw kithat hi. Amate tuuvun ahibale, kealvun silh in vak uh hi— zawngkhal in, kivawtsia a, ahi ngawl lalam in kivawt uh hi. * 38Leitung sia amate taw a kiphu bua hi! Amate in ngaltaite bangin, senneal ngamsung le mual tungah vakin, suanghawng leihawng sungah teang uh hi.

39Upna a nei hu in hi mite theampo sia bangza in teptee huai ziam! Ahihang amate in, Pathian kamciam a saang man bua uh hi, 40banghangziam cile Pathian in ei atu a phazaw tupna, hong nei sak hi. Ama tupna sia, ei taw ih kitholkhopna sung bek ah, amate cialcing pheang tu hi.

⇑

[Remove Footnotes]