Hebrewte 12

Ih Pa Pathian

1Ei ih hi le, ih kiimkot ah hiza a tam mihonpi tetti ih nei hi. Tua ahikom ih mai hong khak thei na theampo le hong lencip thei mawnate vawkin, ih mai ah tai natu om a, tai kidemna sungah thin takkhana taw tai tek tawng. 2A kipatna pan a tawp dong upna a piang sak pa, a kicing sakpa Jesu mitsuan tawng. Ama sia thinglamte hangin thinkiam ngawl hi! Tabang hi ngawl zawin, ama a ngak nginge lungdamna hangin, thinglamte tungah maizum thina sia pha maw sa ngawl a, tu in Pathian tokhum ziatsang ah to hi.

3Ama thuakna teng ngaisun vun; Maw neite etsatna bangza in thuak ziam! Tua ahikom note zongh thinkiam heak vun, hanciam vun. 4Banghangziam cile mawna taw na kidona sungah thalup thuak tu dongin, na do uh kul ngawl lai buang hi. 5Pathian in a tate na hina uh taw hanthotna kam hong paute mangil zo nu ziam? *

6Banghangziam cile Topa in a itte theampo hil a, 7Pa ii daan hong piakte na thuak vun. Pathian in a tate tungah, a ngamtat tu bangin hong ta hi ci in tua na thuakna in, kician sak hi. A pa ii daan a piak ngei ngawl tapa a om ngei ziam? 8A tate theampo a piak bangin daan hong pia ngei bua ahile, ta tatak hi ngawlin, lamlak ta na hi uh hunlam kilangh hi. 9Ih leitung pate tungtaang ahile amate in daan hong pia a, eite zongh in zatakna ih pia hi. Tua ahile ih thaa lam ah, Pa tungah bangza in ki aap zaw tu a, nungta zaw tu hi ziam! 10Ih leitung pate in, pha a sak uh ciaciang, huntomno khat sungah, daan hong pia hi; ahihang Pathian in, ahile, ama thianthona ih nga natu le eima phattuam natu a vawt ahi hi. 11Eite daan hong kipiak ciangin, tua hun laitak ih lungdam natu hi ngawlin, ih hee natu hong pia hile kilawm hi. Ahihang nungsang ciangin, tabang daan a thuakte in thumaan thutang nuntakna thaman nga uh hi.

Hilna le Kidop natu

12Tua ahikom na khut uh a kha le laamto vun a, a huang vadil na khupte uh hat sak vun. * 13Na peang a bai na sang a liam thua ngawl natu le a dam natu in, lamzin tang tawn tan tavun. *

14Mihing theampo taw na kilem tu hanciam vun a, a thiangtho nuntakna taw nuntak tu hanciam tavun, banghangziam cile tua ngawl taw kuama in, Topa a mu batu hi. 15Pathian thuthiamna pan na heak kik ngawl natu kidal tavun. Lopa khaa khang a, a ngu taw lalna tam mama a piang sak bang na hi heak vun. * 16Kuama paktatna le thaa lam a, zawngkhalna sia Esau bangin nei heak vun, ama in ta uzaw hi napi a nga tu hamphatnate theampo anneak khat taw theak hi. * 17Tua zawkciang in, na heak uh bangma, ama in a pa ii thupha saang nuam hi; ahihang ama kinolh hi, banghangziam cile ama in ama ii vawt sate a kheal kik thei nawn bua a, thitui taak liangin zong kik hi kale zong a nga nawn bua hi.

18Note in Israel mite Sinai mual a zot uh bangin chi le sa ii phaw theinate taw nong pai bua uh hi, meikuang ahizong, khuazinna le khuangial ahizong, vuipi suangval, * 19lemle awnging ahizong, tuate kung nong zuan bua uh hi. Israel mihingte in awnging khat a zaak uh ciangin, kamdang a zaak ngawl natu in, ngen uh hi. 20Banghangziam cile amate in, “Nganhing khat po in tua mual a thutha le suangtum taw a kihua lup kul hi,” ci in thupiakna sia a thuak zo bua uh hi. * 21A mu sia lauhuai leilam hi tana, Moses in “Lau in ka liing vadil hi!” ci hi. *

22Note Zion Mual le a nungta Pathian khuapi, vantung Jerusalem, vantung lalang tul tam mamate omna ah nong pai zaw uh hi. 23Note in Pathian tapa upabel, vantung ah a min a kikhumte lungdam tak a, a kikhopna ah nong pai uh hi. Note in mihing theampo thukhenpa Pathian kung le mihingpha a kicialcing sakte thaa omna munah nong pai uh hi. 24Thuciam thak a vawtpa Jesu kungah nong pai uh a, Abel chi sang a phazaw, nate hong kamciam a kithe chi kungah nong zuan uh hi. *

25Tua ahikom kidawm vun a, a paupa sia ngai nuam ngawlin, nial heak vun. Pathian thu leitung ah a son pa ngai nuam ngawl a, a nialte in, a suakta batu hi. Vantung pan hong paupa na thudon bua ahile bangza in suakta la seseam tu hi ziam! * 26Ama aw in tua hun laitakin, leitung liing sak a, ahihang tu in ama in, “Khatvei leitung bek hi ngawlin, vantung zongh ka liing sak lai tu hi,” ci hi. * 27Kammal “khat vei” sia in bitphua sa nate sia ngawk zazan tu a, kikhiin tu hi, a kingawk sak thei ngawl teng bek taang lai tu hi.

28Tua ahiciang, lungdam tawng, banghangziam cile eite in, a kingawk thei ngawl ngam ih nga hi. Ama lungkim tu bangin, mihingte in Pathian tungah lungdam ko in, thasiana le kiitakna taw ama bia tawng; 29banghangziam cile ih Pathian sia hong kaangtum thei meikuang ahi hi. *

⇑

[Remove Footnotes]