JAMES

Tung pan Laithak (The Letter from James)

Thupatna

James tung pan a, Laithak sia zak tawm papai thei tu kihilna thu tatuam hi a, “Leitung theampo ah a kithethaang Pathian mite” atu ahi hi. Lai atpa in, a kitel vaset sonteena te sia, Tapidaw ngamtat natu le luheak zia tu, lamlakna a zak thei tu, ciimnate son hi. Hauna le zawnna, ze-etna, ngamtat phatna, mihing doidanna huvau, upna le sepna, leei zakna, ciimna, kihauna, kiphatsakna, kiniam khiakna, midangte itna, kisuantaakna, thinsauna le thunget nate ahi hi.

Hi laithak in, Tapidawte biakna zakzia sungah sepna sia upna taw a tonkhop tu, a thupi zia, a tuanin lak hi.

A kihel Thulute

Thupatna 1:1
Upna le ciimna 1:2-8
Zawnna le hauna 1:9-11
Hong kisinna le ze-etna 1:12-18
Zakna le sepnate 1:19-27
Kidoidanna kidop natu 2:1-13
Upna le sepnate 2:14-26
Tapidawte le a leei 3:1-18
Tapidawte le leitung 4:15:6
Kihilna a tatuamte 5:7-20

James 1

1Pathian le Topa Jesu Christ ii naseampa James in:

leitung theampo ah a kithethaang Pathian mite kong paupui hi. *

Upna le Ciimna

2Ka suapuite awng, ze-etnate na thuak ciangin hampha in na kituat tavun, 3banghangziam cile, na upna uh taw tabang ze-etnate, na zaw zawk uh ciang, thuak zawkna piang hi, ci in na he uh hi. 4Note sia a kicing, a khuangkhim, bangma a kitaangsamh ngawlte na hi natu in na thuak zawkna uhte in note, puk ngawlin a tawntung hong kip sak tahen. 5Ahihang note khat po in, ciimna na kisamh uh le, ama in a pia tu pa, Pathian tungah thu ngen tahen; banghangziam cile Pathian in ngo tatak le thuthiam takin, a vekpi tungah pia hi. 6Ahihang thu na nget uh ciangin, na up tu kul a, up laakna na nei ngawl het tu uh kisamh hi. Up laakna a nei khat papo sia, tuipi tungah vui ii seam kakoai tuihual taw kibang hi. 7-8Tabang mihing khat, a sepna po ah a thin a khensat thei ngawl khat sia in, Topa tung pan bangma nga tu in ki ngaisun heak hen.

Zawnna le Hauna

9Tapidaw khat a zawnna pan Pathian in a lapto ciangin a lungdam tu hi a, 10taciangin a hau Tapidaw khat zongh Pathian in a khiasuk le a lungdam veve tu ahi hi. Banghangziam cile a haute sia ngam lopa paakte bangin bo tu hi. * 11Ni hong suak a, nisa in a kung hal a, a paak pul in a hoina teng kilal cip sak hi. Tasia bangma in sumhaupa sia a nasepna ah, a komlaak laitakin kisusia tu hi.

Hong Sinna le Ze-etna

12Ze-etna a thuak zote in a lungdam mihing ahi hi, banghangziam cile tabang a kisin sak nate a zaw ciangin, ama a itte tungah Pathian ii a kamciam sa nuntakna telte saang tu hi. 13Mihing khat sia tabang haksatnate taw ze-etna a thuak le, “Hi ze-etna sia, Pathian kung panin hong pai hi,” ci heak hen. Banghangziam cile Pathian sia siatna in ze-et thei ngawl a, ama mama in zongh kuama zia en ngawl hi. 14Ahihang mihing khat sia, ama ii a pha ngawl thangainate in kai a, a awk zawkciang, ze-etna thuak hi. 15Tasia ciangin ama ii a pha ngawl thangainate in mawna piang sak hi; taciang, mawna sia hong khanthin tak ciangin thina piang sak hi.

16Ka it suapuite awng, theamna um heak vun! 17A pha tel le ziakte theampo vantung panin hong pai hi a; vantung khuavakte, a bitphua Pathian kung pan hong paisuk ahikom ama kikheal ngei ngawl a, kihei in khua le zing sak ngawl hi. 18Ama pian saknate theampo sung pan a upa bel ih sua thei natu in, thumaan kammal tungtawn in, ama deina om babang in, eite hong piang sak hi.

Zakna le Sepna

19Ka it suapuite awng, hi thu ciamtee tavun, mihing khat simin thu ngai natu sungah manlang tu a, ahizong pau natu le thin uuk natu ah uai tu hi. 20Mihingte thin uukna in, Pathian sep tu thuphate tangtung sak ngawl hi. 21Tua ahikom kiihuai zongsang nate le ngitlonate theampo vawk siat vun. Pathian tungah ki aap vun a, na thin sungah hong kikoi a kammalte na saang vun, tua in note hong ngum thei hi.

22Ama kammalte ngaina bek taw noma le noma kitheam heak vun a, tua thute bangin ngamta zaw vun. 23A kuama po kammal ngai a, a zangh ngawlte sia, limlangh sung ki en a, ama le ama ahi babang in a kimu mihing khat taw kibang hi. 24Ama le ama pha takin ki en in, tua zawkciangin pusuak a, ama meal sia bangbang hi ziam cisia mangil pai hi. 25Ahihang a kuama po a suakta sak a kicing thukham sia pha takin a et zawkciang ciliap tawntung a, a zaak sia mangil kik pai ngawlin, zangh in a nuntak puite sia Pathian in a sepna ah thupha pia tu hi.

26Khat po in ama sia biakna kin mihing khat hi ing ci in a kingaisun ziam? Ama in a leei a uk bale ama ii a biakna sia a luithathong suak a, ama le ama kitheam ahi hi. 27Pa Pathian ii a thiangtho biakna tatak hi ci in, a ngaisut sia hi teng hi: tangate le meingongte thuakna sungah khoina le leitung siatna panin eima le eima kikepna ahi hi.

⇑

[Remove Footnotes]