JOHN

Teptee bang Lungdamna Thu

Thupatna

John ii tepte bang Lungdamna thupha in Jesu sia a tawntung a om Pathian Kammal, “Mihing hong suak a ei sungah hong theang sia hi,” ci hi. A laibu ii ama le ama a kici bangin, (20:31) hi lungdamna thupha sia banghangin ki at ziam cile, a simte in Jesu sia kamciam hong ki pia sa, Hunpa, Pathian Tapa hi a, ama upna tungtawn in, amate in, tawntung nuntakna a nga natu hi, ci hi.

A tawntung a om Pathian Kammal sia le, Jesu sia thukhat a hina teng thupatna in a nei zawkciang, Lungdamna thupha sia Jesu in na lamdang lakna tatuamte taw ama sia hong kikamciam sa Hunpa, Pathian Tapa hi ci in lak hi. Tua na lamdang laknate sia bang thu lak ziam ci in hil ciannate taw zom to hi. Hi lai santak aki atna a laibu sia mihing pawlkhat in, Jesu sia um a, a nungzui suak a, a dangte in nial a, um ngawl hi, ci thu son hi. A khaan lian 13-17 na, Jesu sia a nungzuite taw nai tak a kitholna, a kimat tu ni zan a, a ngamtatna uh, a cingin lak a, a nungzuite tungah ama sia thinglamte tungah kithalup natu huvau kinging sa a om thei natu hil a, a hanthotna taw kizom hi. A khaksang a ki atte sungah Jesu kimatna, a thusitna, thinglamte tung a kithalupna le a thaw kikna, a thaw kik zawkciang a nungzuite tungah a kilangh na thute ki at hi.

Nupa palngul mawna a vawt numei a kiman (8:1-11) laimal doituamna sungah kikoi hi; banghangziam cile Laithiangtho aki at ciilte le a kiphen ciilte tam mama sungah kihel ngawl hi. Taciang a dangte in, mundang ah koi uh hi.

John in tawntung nuntakna piakna thu sia thupi son a, tua thu sia Christ tungtawn in kinga a, tua letsong sia tu pan kipan nga a, Jesu sia thuman lampi le nuntakna hi ci in a saangte tungah kipia hi ci hi. John laibu ii lamdanna sia nisim a, a kizangh a kimu nate ma la in thaa lam a thuthukte sonteena in nei hi. Tui, anluum, khuavak, tuucingpa, le a tuute, sapitngui le a ngate ci bangte ahi hi.

A kihel Thulute

Thupatna 1:1-18
Tuiphumpa John le nungzui masate 1:19-51
Mihonpi tung a Jesu nasepna 2:1-12:50
Jerusalem khua sung le a nai le a khakbel hunte 13:1-19:42
Topa thaw kikna le a kilanghna 20:1-31
Thukhupna: Galilee ngamah a kilanghna 21:1-25

John 1

Nuntakna Kammal

1Simlei a kibitphua maa in, Kammal sia na om khol zo hi; ama sia Pathian taw om a, ama mama in Pathian ahi hi. 2A kipat phit hun ma in Kammal sia Pathian taw a om sa ahi hi. 3Ama tungtawn in Pathian in na theampo bitphua hi; bitphua a minpiang ama ngawl taw a kivawt na khat beak a om bua hi. 4Kammal sia nuntakna ii naak ahi hi. Taciang hi nuntakna in mihing nam theampo atu in khuavak hong puak hi. 5Khuavak sia khuazing sungah tang a, khuazing in sumit zo ngawl hi.

6Pathian in John a kici kamtaipa hong paisak a, * 7tua thu mihing theampo in za a, a up thei natu in, tua khuavak thu mihingte tungah son tu in, hong pai ahi hi. 8Ama tatak ahile khuavak hi ngawl hi. Khuavak ii thu son tu in hong pai ahi hi. 9Hi khuavak sia khuavak tatak hi a— mihing nam theampo ii tungah a taang tu in leitung ah hong pai hi.

10Kammal sia leitung ah om a, Pathian in leitung sia ama tungtawn in vawt hi napi, leitung in ama sia a he bua hi. 11Ama sia ama ii ngamsung ma a hong pai ahihang amite in ama a saang bua uh hi. 12Ahizong pawlkhat in ama saangin um uh hi. Tasia ciangin ama in tuate tungah Pathian tate sua thei natu thu pia hi. 13Amate sia leitung ngeina taw Pathian tate a suak hi ngawl hi, cinopna in, pate ii hin tate bangin a piang ahi bua hi. Pathian mama sia amate ii Pa ahi hi.

14Kammal sia mihing hong suak a, thuthiamna le thumaanna taw kidim a, ei sungah hong teang hi. Ama vaangletna ih mu hi. Pa ii Tapa khat a hina taw a saan vaangletna ih mu hi.

15John in ama huvau son hi. Ama in hi bangin au hi. “Hisia pa sia ka sason pa hi a, ‘Kei nung pan hong pai hi, ahihang kei sangin lianzaw hi, banghangziam cile kei ii pian maa in ama om zo hi,’ ka ci sia ahi hi,” ci hi.

16A kidim a om, ama thuthiamna panin, ei theampo sia thupha hong pia a, thupha khat zawkciang khat, hong pia hi. 17Pathian in Moses tungtawn in Thukham pia hi. Ahihang thuthiamna le thumaanna thu sia Jesu Christ tungtawn in hong pai hi. 18Kuama in Pathian sia mu ngei ngawl hi. Pathian ma ahi, Pa kungah a om, Tapa khat bek in Pathian hong he sak hi.

Tuiphumpa John ii Thupuak

(Mt 3:1-12; Mk 1:1-8; Lk 3:1-18)

19Jew thuneite in Jerusalem khua, John kungah thiampite le Levite pai sak a, “Nang sia akua ni ziam?” ci in dongh sak uh hi.

20John in a zo tu a nial bua a, phualseal nei ngawl le thiangtho takin hi bangin son hi. “Kei sia Messiah hi ngawl khi hi,” ci hi.

21“Tua ahile akua ni ziam? Elijah ni ziam?” ci in dongh uh hi.

“Hi ngawl khi hi,” ci in John in zo kik hi.

“Kamsangpa ni ziam?” ci in dongh uh hi.

“Hi ngawl khi hi,” ci in ama in zo kik hi. *

22“Tua ahile hong son tan, a kua ni ziam?” ci uh hi. “Ko hong sawlte munah thu ka puak kik uh kul hi. Nangma le nangma sia bang kici ni ziam?” ci uh hi.

23Isaiah kamsangpa ii sonna teng sia son sawn in, John in hi bangin a zo hi.

24Phariseete ii kamtaite in, 25John munah, “Nang sia Messiah le hi ngawl, Elijah le hi ngawl, Kamsangpa le hi ngawl na hile, banghangin baptize ni ziam,” ci in dongh uh hi.

26“Kei in tuidam taw kong baptize hi, ahihang no sungah na heak ngawl uh pa khat om hi. 27Ama sia kei nung panin hong pai hi, ahihang ama peangdap suut tu in, zongh ka kilawm bua hi,” ci in John in zo kik hi.

28John ii baptize na Jordan ngun ii nisuana sangah a om Bethany khua ah, hi thu theampo piang hi.

Pathian Tuuno

29Azing ciangin John in Jesu sia ama kungah hong pai a mu ciangin, “Leitung buppi ii mawna a lakeak Pathian Tuuno, zia sungah om hi! 30‘Mihing khat kei nung panin hong pai tu a, ama in kei pian maa in om khol zo ahikom, kei sangin ama lianzaw hi,’ ci in ka sason sia ahi hi. 31Ama sia akua hi tu ziam, ci in ka he bua hi, ahihang Israel mite ii ama a heak natu in kei sia tuidam taw baptize tu in kong pai hi,” ci hi.

32Taciang in John in hi bangin tetti pang hi. “Thaa sia vantung pan in ngam vakhu bangin hong tuaksuk a, ama tungah hong tu ka mu hi. 33Ama ahi hunlam sia telcian tatak ngawlin ka om lai hi, ahihang Pathian in tuidam taw baptize a hong sawl lai in, ‘Thaa sia hong paisuk in mihing khat ii tungah, hong tuak na mu tu hi; ama sia Thaa Thiangtho taw baptize tu pa hi,’ ci in hong son hi. 34Tasia mu zo khi hi. Taciangin ama sia Pathian Tapa hi ci in hong son khi hi,” John in ci hi.

Jesu Nungzui Phitbel teng

35Azing ciangin John sia tua munah a nungzuite nii taw a dinkhop laitak in, 36Jesu hong pai mu hi, “Pathian Tuuno sia zia sia hi!” ci hi.

37Nungzuite nii in hi bangin a son sia za uh a, taciangin Jesu taw ton uh hi. 38Jesu sia kingeilee a, amate in a nung a zui a mu ciang, “Bang zong nu ziam?” ci in dongh hi.

Amate in, “Koisung a teang ni ziam, Rabbi awng,” (Syapa a ci nopna) ci in dongh uh hi.

39“Hong pai in hong en tavun,” ci hi. (A hun sia nitak nai li bang saat tu hi) Tua ahikom amate sia ama taw paikhawm a, a tenna a mu uh hi. Ama taw nitum dong hunzangh uh hi.

40Tuate sung pan khat sia Simon Peter ii suapui Andrew ahi hi. 41Thakhat in a suapuipa mu in hi thu ko hi. “Messiah mu zo khi hi,” (Hi kammal sia Christ a cinopna hi). 42Tua zawkciang ama in Simon sia Jesu kungah paipui hi.

Jesu in ama en in, “Na min sia John ii tapa Simon hi, ahihang nang sia Cephas hong kici tu hi,” ci hi. (Cephas ii khiakna sia Peter taw ma kibang a suangpi a ci nopna hi.)

Jesu in Philip le Nathanael Sam

43A zing ciangin Jesu in, Galilee ngamah pai tu in, khensat hi. Ama in Philip mu a,“Hong zui tan,” ci hi. 44(Philip sia Andrew le Peter te ii tenna Bethsaida khua pan ahi hi.) 45Philip in Nathanael munah, “Moses thukham laibu sungah a ki at pa le, kamsangte zongh ii a thu a at pa ka mu zo uh hi,” ci in son hi. “Ama sia Nazareth pan Joseph tapa Jesu hi,” ci hi. 46“Nazareth panin na pha piang thei thong tu ziam,” ci in Nathanael in dongh hi.

“Hong pai in hong en tan,” ci in Philip in zo kik hi.

47Jesu in Nathanael sia ama kungah hong pai a mu ciangin, ama thu hi bangin son hi. “Hi sungah, Israel mi tatak khat om hi. Ngual theam nopna thin a nei ngawl pa hi, en vun!” ci hi.

48Nathanael in, “Bangbangin hong he ni ziam,” ci in dongh hi.

“Philip ii hong sam maa theikung nuai ah na om lai in, kong mu zo hi,” ci in Jesu in zo kik hi.

49Nathanael in, “Syapa awng, nang sia Pathian Tapa na hi hi! Israel Kumpipa na hi hi!” ci hi.

50Jesu in, “Theikung nuai ah na om lai in, kong mu zo hi kong ci hu bek in, um ni ziam? Hisia sangin a thupi zaw, na tam mama na mu tu hi!” ci hi. 51Taciang in amate tungah, “Thumaan hong son khi hi; vantung kihong na mu tu a, Mihing Tapa tungah Pathian ii vantung lalangte sia a tuaksuk a kaato kithale in om na mu tu hi,” ci hi. *

⇑

[Remove Footnotes]