JUDE

Tung pan Laithak (The Letter from Jude)

Thupatna

Jude laithak a ki atna sia thu um bang a, a kivawttawm hil khialna a nei syate huvau kidop natu in a at hi. 2 Peter taw a kibang hi laithak tomno sia sungah, lai atpa in, laithak a simte tungah hi bangin hanthawn hi, “Pathian in a mihingte tungah a tawntung atu khatvei a piak upna, huvau a, ngal a do suak natu” ahi hi.

A kihel Thulute
Thupatna 1-2
Thuhil maan ngawl Syate ngamtat zia, a hilna le amate lal natu 3-16
Upna kho tak a let natu hilna 17-23
Thupha piakna 24-25

Jude 1

1Jesu Christ naseam, James ii suapuipa Jude in—

Pa Pathian itna sungah a nungtate le Jesu Christ atu a kikeamcing Pathian ii sap sa te tungah lai kong thaak hi.

2Hesuakna, thinnopna, ki itna a kicingin note aa hi tahen.

Thuhilsya Maan ngawlte

3Ka it lawmte awng, ih nei khop tek ngupna huvau hong at nuam ing, ka ci laitakin, Pathian mihingte tungah a tawntung a tu khatvei a piak upna atu ngal ih do kul lai hi, ci in hanthot nopna ka thin sungah thakhat in hong suak hi. 4Banghangziam cile Pathian a nei ngawl mihing pawlkhatte, ei sungah hong tum kuu a, amate ii pheangtat thei natu, kam zonna in, Pathian thuthiamna thute koaivawt in, eima bek ii, Topa ahi Jesu Christ sia nial uh hi. Ngeitawng lai in Laithiangtho in amate puavawkna a thuakna thute son khol zo hi.

5Na heak sa uh ahitazong, Topa in Israelte sia Egypt ngam pan suatak napi, a thu um ngawlte sia a khak sang ciangin, susiacip hi. * 6Amate thu neina taciang sungah om po ngawl a, amate tenna a nusia vantung lalangte ngaisun tavun: amate sia tawntung kikhii na thikkhau taw kikhii a, leinuai khuazingna ah, amate tungah, a thu a kitan ni hun, Pathian ii Ni lianpi ni dong atu Pathian in koi hi. 7Sodom, Gomorrah le a kiim khuapite zongh phawk tavun, numei le pa mawna a vawt vantung lalangte bangma in ngamta uh a, amate sia mihing theampo ii a kidop thei natu in, tawntung meikuang sungah daan a thuak uh hi. *

8Tasia bangma in hi mihingte in amate pumpi tungah, a khial natu in mu kholna nei a; amate in Pathian thu neina zawngsak in, tung sangah a minthangte nunau uh hi. 9Vantung lalangte sung pan a lianbel Michael zonghin hi bangin ngamta ngawl hi. Moses luanghawm sia Doaimangpa taw a kitu laitakin, Michael in Doaimangpa sia kamsia taw na lang ngawl a, “ Topa in nang hong tei tahen,” na ci bek hi. * 10Ahihang hi mite in a heak ngawl nate sia nunau in, lang uh hi; taciang nganhing bangin, amate ii a pianpui thinsung uh taw a heak thei nate in amate lal sak uh hi. 11Amate atu in bangza in lau huai ziam! Amate in Cain ii lampi tawn uh hi. Balaam khial bangma in, amate in sum huvau in puk uh hi. Korah ii tualngal taw a leedo bangin, amate zongh in, hong leedo uh a, ama bangma in lalna kithuak sak hi. * 12Amate sia cii le sa deinate taw maizum maw in om a, na ki itna poai uh hong mealhem sakte ahi hi. Amate kaangsung atu bek kin hi. Amate sia vui ii seam nguatui a paai ngawl meeikaaite taw kibang hi. Tangngam hun dongin a nga mama a nga ngawl thingkungte le a kizunglok a thicip sa thingkungte taw kibang hi. 13Amate sia tuipi sung a, tui kihualte taw kibang a, amate maizumna ngamtatnate sia, tuiphuante bangin kilangh hi. Amate sia khuazing cip belna sung, a tawntung a om natu mun Pathian ii a koi khol sak, aksi vakthap taw kibang hi.

14Adam suan a khang lukna, Enoch in hi bangin, amate huvau son khol hi. “ Topa sia a vantung lalang thiangtho tul tam mama te taw hong pai tu a, * 15mihingte theampo tungah thutanna vawt tu le, Pathian awlmawk ngawl ngamtatnate le Pathian sel mawneite tungah, a lau huai kam pauna te, tungah puavawkna vawt tu hi,” ci hi.

16Hi mihingte in a tawntung in, phunin ngual veu mawsiat uh hi, amate in amate ii ngitlo nopnate zui uh hi; amate le amate kisuangin, a dei uh a nga thei natu in, ngualdangte sialpok uh hi.

Kidop natu Hilna le Thupiakna

17Ahihang lawmte awng, ih Topa Jesu Christ sawltakte ii a bo sa hunsung a hong son thute na phawk tavun. 18Amate in “Ni tawpkhak ni hong thet ciangin, note hong selno tu mihing hong piang tu a, tua mihingte in amate Pathian selte deinate hong zui tu uh hi,” hong ci hi. * 19Hi mihingte in kikhenna a piangsakte hi a, cii le sa deina in amate uk a, Thaa a nei bua uh hi. 20Ahihang no, ka lawmte awng, a thiangtho na upna tungah ki kip sak seseam vun. Thaa Thiangtho vaangletna sungah thungen tavun. 21Taciang noma le noma sia Pathian itna sungah kikeamcing tavun, ih Topa Jesu Christ hesuakna taw nuntak tawntungna hong piak tu ngakin, na om uh laitak, tabangin na ngamta vun.

22A um zo ngawlte tungah hesuakna na lak tavun; 23midangte sia meikuang sung pan dokin, ngum tavun; a dangte tungah hesuakna le kiitakna kihelin, na lak tavun, ahihang amate cii le sa lungngulna taw nin a baang sa puante mama na ensan tavun.

Pokna Thungetna

24Tu in na liik ngawl natu in, hong keam thei a, ama minthanna mai ah a sitbaang ngawl le lungdamna lianpi taw hong then thei— 25ama bek Pathian ahi Ngumpa tungah ih Topa Jesu Christ tungtawn in, minthanna, vaangletna, thahatna le thuneina sia, a bo sa hun theampo sung, tu hun le a tawntung in om tahen! Amen.

⇑

[Remove Footnotes]