LUKE

Teptee bang Lungdamna Thu

Thupatna

Luke teptee bang Lungdamna Thupha in Jesu sia Israel minamte le minam theampo a ngum tu in hong kikamciam kholpa a hina thu son hi. A zawngte sungah Lungdamna Thupha a hil tu in, Topa Thaa Thiangtho in Jesu a sapna thu at hi. Tua Lungdamna Thupha sia kisapna nam tatuam a nei mihingte thintoi puina thu veu ahi hi. Hi laibu a kipatna sangah Jesu hong pai natu thu kison a, a tawpna sangah Jesu sia vantung a paina thu kison ahikom lungdam mama na thu hong kilangh sak hi. Jesu sia vantung a pai zawkciangin Tapidaw thu a khantona le a kizelhna thu, hi lai at pa in Sawltakte Tangthu Bu sungah na son hi.

A nuai a ki at a Tom laakna khen nii le khen lukna sungah hi laibu sung bek ah a om thu pawlkhat ki at a, tuate sia vantung lalangte la sakna thu le Jesu a sua laitakin tuucingte hawna thu, Jesu sia patang ahi laitakin, Biakinn sungah a omna thu, Samaria Mipha pa thu le tapa taimang thute ahi hi. Hi Laibu sungah thungetna thu, Thaa Thiangtho thu, Jesu nasepna sungah numeite panmun letna le Pathian ii mawna hong mai sakna thute pha takin kison hi.

A Kihel Thulute

Thupatna 1:1-4
Tuiphumpa John le Jesu suana le a no lai hun 1:5-2:52
Tuiphumpa John nasepna 3:1-20
Jesu Tuiphumna le ze-etna 3:21-4:13
Galilee ngamsung mihon sungah Jesu nasepna 4:14-9:50
Galilee ngam pan Jerusalem khua a khualhawna 9:51-19:27
A khakbel nipi le Jerusalem khua nai ah 19:28-23:56
Topa thawkikna, a kilangh nate le vantung kaana 24:1-53

Luke 1

Thupatna

1Ka it Theophilus awng:

Mihing tam mama in eite sungah thupiangteamate ii thiam thei za tekin at zo uh hi. 2A kipat pan in a mute le a thu a thang sakte ii hong son bang teng veu ma at uh hi. 3Tua ahiciang hi thute a kipat pan a, pha takpi in ka et thiang uh ahikom, a kipialcian in na heak natu in, phamaw hi ci in kong at hi. 4Nang tungah hong kihil a thute sia, a maan le a cingin na heak natu in kong at hi.

Tuiphumpa John Sua natu Sonkholna

5Judea ngamah Herod Kumpipa a maan laitakin, Zechariah a kici thiampi khat om a, ama sia thiampi Abijah ii pawlkhen sungah a kihel thiampi khat ahi hi. A zi min Elizabeth hi a, ama zongh thiampi Aaron suan ahi hi. * 6Amate ngeal sia Pathian mai ah nuntakna zia phate taw a nungtate hi a, Topa ii thukham le thupiaknate a zuite ahi uh hi. 7Amate in ta a nei bua uh hi, banghangziam cile Elizabeth sia ta nei thei ngawl a, Zechariah taw amate ngeal sia huai mama khawm zo uh hi.

8Ni khat Zechariah sia Biakinn sungah a thiampi nasep seam a, nisim biakpiakna hunzeakna sungah ama ii hun hong tung hi. 9Thiampite ngeina om bangin, ama sia biakna tau tungah ngimnamtui hal tu in, aisaanna taw a kisep ahi hi. Tua ahikomin Topa Biakinn sungah tum a, 10mipite in ngimnamtui hal hunsung theampo doipua panin thungen in ngak uh hi.

11Topa vantung lalang khat ama kungah hong kilak a, ngimnamtui halna biaktau ii ziat sangah ding hi. 12Zechariah in ama a mu ciangin, patau in lau hi. 13Ahihang vantung lalang in hi bangin ci hi, “Zechariah awng, lau heak in! Pathian in na thungetna hong za zo a, na zi Elizabeth in tapa khat hong hin pui tu hi. A min sia John ci in na phuak tu uh hi. 14Bangza ta in na lungdam in na thinnuam tu ziam? Midang tam mamate zongh ama hong sua ciangin, bangza ta in lungdam tu ziam! 15Ama sia Topa muna ah milian khat hong hi tu hi. Ama in sapitzu le zu ne ngawlin a om kul tu hi. A nu ngilsung pan kipan ama sia, Thaa Thiangtho taw kidim tu hi. * 16Taciangin ama in Israel mite tam mama amate Topa Pathian kungah zotpui kik tu hi. 17Ama in kamsangpa Elijah bangin, vaangletna le thahatna taw Topa maiah paikhol tu hi. Ama in pate le tate hong ngawmtua kik tu a, thu ni ngawl mihingte thutang ngaisut theina sungah hong kihei sak kik tu a, Topa atu a kivawt khol mihingte a pian natu in seam tu hi.” *

18Zechariah in vantung lalang tungah, “Tu a na son teng sia thutak hi ci in koibang tel thei tu khi ziam? Kei le pasal huai hi zo a, ka zi zongh huai zo hi,” ci hi.

19Vantung lalang in zo kik a, “Kei sia Gabriel ka hi hi. Pathian omna munah a om pa ka hi hi. Hi lungdamna thupha, nang kungah hong puak tu le nang taw ki paupui tu in, hong kisawlpa ka hi hi. * 20Ahihang kong thupuakte sia um ngawl ni hi, hi kale a hun hong tun tak ciang, ka ci bangin hong piang tu a, hong um ngawl na hikom, na pau thei nawn batu hi. Kong thuciam teng a tun mateng in, pau thei ngawlin thim om tu ni hi,” ci hi.

21Tua hun sung teng mipite in doipua panin ngak top uh a, Biakinn sungah ama ngei tapo hun a zak hu in, lamdang sa uh hi. 22Hong pusua kik tak ciangin, ama pau thei nawn ngawl hi, tua ahikom, Biakinn sungah ama in mu kholna mu hi ci in he uh hi. Kammal khat zongh huthe thei nawn ngawl ahikom khut taw lim lak hi.

23Biakinn sungah nasep tu teng a man zawkciang in, Zechariah sia a inn ah cia hi. 24Tua zawk tawmvei ciangin, a zi Elizabeth sia naungil om a, tha nga sung puapial nawn ngawl hi. 25“Tu petma ciang ahile Topa in hong hu zo hi, ngual mai ah ka maizum ka min paanna teng ama in hong vawk sak zo hi!” ci hi.

Jesu Sua natu Kisonkhol

26Elizabeth naungil a om zawk tha luk a cin ciangin vantung lalang Gabriel sia Galilee ngam Nazareth a kici khua khat ah Pathian in pai sak hi. 27Kumpipa David suan Joseph a kici khat taw kiteang tu, kiciamna a vawt sa ngaknu khat atu in, thupuak tu in a kisawl ahi hi. Ngaknu nu ii min sia Mary ahi hi. * 28Vantung lalang in ama kungah pai in, “Thin nopna na nga ta in! Topa sia nang taw hong omkhawm a, nasia takin thupha hong pia hi!” ci hi. 29Mary sia vantung lalang ii thupuak huvau in, nasia takin thin ngim a, ama kammalte ii khiaknate ngaisusun hi. 30Vantung lalang in, “Mary awng, lau heak in. Nang tungah Pathian hong thuthiam mama zo hi. 31Nangma in nau na paai tu a, a sua ciang a min Jesu ci in na phuak tu hi. * 32Ama sia hong thupi tu a, a Saang Bel Pathian ii Tapa kici tu hi. Topa Pathian in a pu David bangma in kumpipa suak sak tu hi. * 33Taciangin ama sia Jacob ii suan, a tawntung a maang kumpi hong hi tu a, ama ngam sia bo hun nei ngawl tu hi,” ci hi.

34Mary in vantung lalang tungah, “Keima in, ngaknu thiangtho ka hi hi, koi bangin tu a na son bangin suak thei tu ziam?” ci hi.

35Vantung lalang in, “Nang tungah Thaa Thiangtho hong om tu a, Pathian vaangletna in nang hong uap tu hi. Hi thu hu in, patang thiangtho sia Pathian Tapa kici tu hi. 36Na be nu Elizabeth sia ngaisun ka po in, ngual in ama sia ta nei thei ngawl tu in a see sa hi, ahizong a huai mama kawm panin, tu in naungil a om zawk tha luk pha zo hi. 37Banghangziam cile Pathian in na khat beak vawt mawk a nei bua hi,” ci hi. *

38“Kei sia Topa naseam nu khi hi, hong ci babang in, kei tungah hong tung tahen,” Mary in a ci zawkciang vantung lalang in nusia hi.

Elizabeth kungah Mary Haw

39Tua zawk hiat ciangin Mary sia kithoai cingteng in Judea ngam mualtung khua khat ah manlang takin pai hi. 40Ama in Zechariah inn sungah tum in Elizabeth biakpui hi. 41Mary biapuina aw a zaak ciangin Elizabeth sung a om nauno lungdam in tungh hi. Elizabeth sia Thaa Thiangtho taw kidim a, 42aw nging tak taw hi bangin ci hi. “Nang sia numei a minpiang thupha a saangbel nu na hi hi, na hin tu nauno in, thupha nga tahen! 43Ka Topa ii nu takpi kei kung a hong haw natu dongin, banghangin hi bangza a thupi thu hong piang ziam? 44Banghangin tabangin ci khi ziam cile nong paupuina aw ka zaak po ciang, ka sung a nauno lungdam in kilawn hi. 45Topa ii hong thupuakte hong piang tatak tu ci a, na up thei hu in, thupha saang na hi hi!” ci hi.

Mary ii Pokna La

46Mary in ci a,

47Pathian ka Hunpa hangin ka thaa lungdam hi. 48Banghangziam cile ama in kei a niam a naseam nu hong phawk hi. * Tu a kipan mihingte in, thupha saangnu hi hong ci tu hi. 49Banghangziam cile Vaanglian Pathian in kei tungah nasep lian hong sep hu ahi hi. Ama min thiangtho hi; 50khang khat pan khang khat, Ama a patoaite tungah hesuakna pia hi. 51A thahatna baan hong vaan a, 52Ama in kumpi liante sia a tokhum uh panin khiasuk a, a niamte laamto hi. * 53A ngilkialte neakpha taw vaak a, 54Ama in ih pute tungah a thuciamte kholet a, 55Ama in Abraham tungah hesuakna a piak tu in a ciam sate,

56Mary sia tha thum bang Elizabeth kungah taam a,

Tuiphumpa John ii Suana

57Elizabeth sia a nau sua tu hun hong cing a, tapa khat hing hi. 58Topa sia ama tungah thuthiam mama hi ci in a innpaamte le a mealheakte in za uh a, lungdam pui tek uh hi. 59Nausen sia nipi khat a phak ciangin, a vunteap attan sak tu in, hong pai uh a, a pa min la in, “Zechariah” ci in phuak uh hi. * 60Ahihang a nu in, “Hi ngawl hi! A min sia John hi tu hi.’ ci hi.

61“No phung sungah min tabang om ngawl hi,” a ngualte in ci uh hi. 62Tasia ciangin a pa tungah bang min phuak tu hi ziam ci in lim taw dongh uh hi.

63Zechariah in lai atna thingpheak ngen a, “Amin sia John hi,” ci in at hi. Amate in lamdang sa mama uh hi. 64Tua hun lian laitakin, Zechariah sia hong pau thei kik a, Pathian pok hi. 65A innpaamte patau siat uh a, taciang hi thute Judea ngam mualtung tengah kizel hi. 66A zate theampo in, “Hi nausen sia bangbang mi hong suak tu ziam,” ci in ngaisutna le thudokna sia a thinsung tek ah om hi, banghangziam cile Topa vaang sia ama tungah om hi, ci in thiangtho takin kitel hi.

Zechariah ii Kamsaanna Thu

67John ii pa Zechariah sia Thaa Thiangtho taw kidim a, taciang ama in Pathian kam a saan teng son hi:

68“Israel Pathian Topa pok tek tawng! 69Ama in a vaanglian Ngumpa khat hong pia a, 70Taangh lai in a kamsang thiangthote tungah, 71ih ngalte pan le hong ensante theampo ii thahatna pan hong hun tu in hong kamciam zo hi. 72Ama in ih pute tungah hesuakna hong lak tu in, hong ciam zo a, ama kamciam thiangtho phawk kik tu in hong khaam zo hi. 73-74Ih pu Abraham tungah a ciliap huai kamciam taw 75Tua ahikom ama mai ah eite thiangtho in, thutang in, ih nuntak lai theampo ih om thei natu ahi hi. 76Nang, ka tapa sia a Saang Bel Pathian kamsangpa hi hong kici tu hi. Nang in Topa mai ah na paikhol tu a, a lampi na sial sak khol tu hi. * 77Ama mihingte tungah mawna kimai sakna taw ngupna piang tu hi, ci in na son tu hi. 78Ih Pathian sia hesuak thiam a, thinneam hi. 79taciangin thina khuazing lim sungah a teangte tungah vantung panin hong taang tu a, thin nopna lampi tung, ih kalsuanna ah hong lampui tu hi.” *

80Nausen sia pumpi le thaa lam ah hong khangto hi. Ama sia Israel mipite mai ah a kilak hun dong senneal ngamsung ah teang hi.

⇑

[Remove Footnotes]