MARK

Teptee bang Lungdamna Thu

Thupatna

Mark teptee bang Lungdamna Thupha sia “Pathian Tapa Jesu Christ ii Lungdamna Thupha hi,” ci in pan masa hi. Jesu sia thunei naseampa khat a hina lak hi. Ama thuneina huvau sia, a hilna pan, doaite tungah vaang a neina le, mihingte ii mawna ama ii mai sakna panin kihe hi. Jesu in ama le ama sia Mihing Tapa kici a, mihingte sia mawna panin suatak thei natu in a nuntakna pia tu hong pai hi, ci in ama in son hi.

Mark in Jesu tangthu sia zoai son ngawlin, a tangtan in son a, ama sonnate sangin a sepnate a cing takin son zaw hi. Thupatna in, tuiphumpa John ii thu le Jesu ii tuiphumna le ze-et a thuaknate a tomin a son zawkciang, Jesu ii ciinate dam sakna le a hilnate son to paih hi. Hunte a babo zawkciang, Jesu ii nungzuite in ama sia thiangtel zaw uh a, ahihang Jesu ii ngalte ahile ama sia a langpan seseam uh hi. A tawpna sangah Jesu ii a leitung nuntakna, a khakbel nipi khat sung thinglamte tung a thina le a thawkikna thute ki at hi.e

Lungdamna Thupha tawpna a doino sungah a ki at teng sia mihing a tamzaw ii ngaisutna ah Mark ii at hi ngawlin, ngualdang ii at hi tu in um hi.

A Kihel Thulute

Lungdamna Thupha kipatna 1:1-13
Galilee ah Jesu ii mipi tung a nasepna 1:14-9:50
Galilee pan Jerusalem ah 10:1-52
Jerusalem le a paam ah nipi khakbel 11:1-15:47
Jesu ii Thawkikna 16:1-8
A thokik Topa a kilak kikna le a van kaana 16:9-20

Mark 1

Tuiphumpa John Thuhilna

(Matthew 3:1-12; Luke 3:1-18; John 1:19-28)

1Hi thu in Pathian Tapa Jesu Christ Lungdamna Thupha ahi hi. 2Kamsangpa Isaiah at sa bangin kipan hi. *

3Senneal ngam sungah mihing khat hong au a, ‘Topa atu in lampi puakhol vun;

4Tabangin John sia senneal ngam sungah hong kilak a, ama in thuhil in baptize hi. “Na mawna pan kisiik kik vun a, ki baptize vun, tua hile Pathian in na mawna hong mai sak tu hi,” mipite tungah ci hi. 5Judea ngam pan le Jerusalem khua panin John thuson ngai tu in mihing tam mama pai uh hi. Amate in a mawna pualaak uh a, tua zawkciang Jordan Ngun sungah, ama in baptize hi.

6John sia kalauh mul taw a kitak puan silh a, savun kawngkhau thua in, a anneak sia khaumaw le ngam khuaitui ahi hi. * 7Mihingte ii munah, ama in, “Kei nung pan hong pai lai tu pa sia kei sangin lianzaw pek hi. Kun in a peangdap khau suut tu zongh in ka kilawm bua hi. 8Note sia tuidam taw tui kong phum hi, ahihang ama in Thaa Thiangtho taw hong baptize tu hi,” ci in taangko hi.

Jesu ii Kibaptize na le Ze-et A Thuakna

(Matthew 3:13-4:11; Luke 3:21-22; 4:1-13)

9Tua zawk ngei ngawlin Jesu sia Galilee ngam Nazareth khua panin hong pai a Jordan ah John in baptize hi. 10Tuisung pan Jesu hong thawto po ciangin, van kihong a, Thaa sia ama tungah ngam vakhu bangin hong tuaksuk mu hi. 11Vantung pan in aw khat hong nging a, “Nang sia ka it ka Tapa na hi hi. Nang tungah ka lungkim hi,” ci hi. *

12Thakhat in Thaa in ama sia senneal ngam sungah pai sak hi. 13Tua munah Satan in ama ni sawm li sung ze-et hi. Tua munah ngamsate zongh om a, ahizong, vantung lalangte hong pai in ama hu hi.

Jesu in Ngasa Paai Mihing Li Sam

(Matthew 4:12-22; Luke 4:14-15; 5:1-11)

14John thong sungah a kikhum zawkciang, Jesu sia Galilee ngam ah pai a, Pathian Lungdamna thupha hil hi. 15“A hun hong tung zo hi, Pathian Ngam hong nai zo hi. Na mawna uh pan kisiik vun a, Lungdamna Thupha um vun!” ci hi. *

16Jesu sia Galilee tuili hui ah a va laitakin, ngasa paai mihing nii, Simon le a suapuipa Andrew ngeen taw ngasa man in om mu hi. 17Jesu in, “Hong pai tavun, mihing mante kong suak sak tu hi,” ci hi. 18Thakhat in amate in, a ngeen uh nusia in ama zui uh hi.

19Ama in mai sangah tawm a pai ciang, Zebedee ii tapate James le Johnte unau mu hi. Amate a ngeen uh khui in ngunkuang sungah om uh hi. 20Jesu in a mu po ciangin sam hi; amate in a pa uh Zebedee le a cial sa naseamte ngunkuang sungah nusia in Jesu zui uh hi.

Doaivei Pasal Khat

(Luke 4:31-37)

21Jesu le a nungzuite Capernaum khua hong theng a, Sabbath kik ni ciangin, Jesu in Jewte ii synagogue ah pai in hilna nei tu in kipan hi. 22A thuhilna a za mihingte in ama thuhil zia sia lamdang sa uh hi, banghangziam cile, Thukhaam hil syate bang hi ngawlin, ama in thuneina taw thuhil hi. *

23Tua zawk hiat ciangin doaivei pasal khat synagogue sungah tumin hong cik au hi. 24“Nazareth mi Jesu awng, kote bang hong nuammaw ni ziam? Ko hong lalcip sak tu in hi sungah hong pai na hi ziam? Nang sia akua na hi hunlam hong he khu hi— Nang sia Pathian kamtai thiangthopa ni hi,” ci hi.

25Jesu in doai munah, “Pau heak in, pasalpa sung pan hong pusuak tan!” ci in thupia hi.

26Doai in pasalpa sia ngawk zazan a, a nging in cik-au a, tua zawkciang pasalpa sung pan pusuak hi. 27Mihingte theampo in lamdang mama sa uh a, “Bangbang thu hi thong ziam? Tu a sia kihilna thak khat ahi ziam? Hisia pa in doaite tungah thunei a, thu a piak ciangin doai in a thu ni hi!” ci in khat le khat kikum uh hi.

28Tabangin Jesu huvau thuthakte Galilee ngam mun theampo ah manlang takin kizel hi.

Jesu in Mihing Tam mama Dam sak

(Matthew 8:14-17; Luke 4:38-41)

29Jesu in a nungzuite taw synagogue nusia in Simon le Andrewte inn ah paisuak uh hi. Nungzui James le John zongh kihel hi. 30Simon sunghnu sia ciina in lum a, suuk hi. Taciang Jesu hong thet po ciangin, tua thu ama tungah son hi. 31Ama in nupinu kungah pai in a khut pan kaito in tho sak hi. A suuk natna thai a, amate zin do hi.

32Ni tumin nitak hun a thet ciang, mihingte in Jesu kungah, ciinate le doaiveite paipui uh hi. 33Khuapi sung pan mihing theampote innmai ah hong kikhawm uh hi. 34Jesu in natna satna namcin taw a na theampo dam sakin, doaivei tam mama a doai nawkeak sak hi. Ama in doaite ii pau tu khaam hi, banghangziam cile amate in Jesu sia akua ziam ci in he uh hi.

Jesu in Galilee ah Thuhil

(Luke 4:42-44)

35Zingtuung khuavak maa in, Jesu tho in tua inn nusia hi. Khuapi puasang a ngamkhingna mun khat ah pai in thungen hi. 36Ahihang Simon le a kitholpuite in ama zong tu in pai uh hi. 37Taciang ama a mu uh ciangin, “A kuama po in nang hong zong hi,” ci uh hi.

38Ahihang Jesu in, “Hi sung kiim le khua paam khuanote sung zongh ah ih pai kul tu hi. Tua munte zongh ah thu ka hil kul tu hi, banghangziam cile, tua nasep ma seam tu in hong pai ka hi hi,” ci hi.

39Tua hi a, ama sia Galilee ngambup synagoguete ah thuhil in doaite not hi. *

Jesu in Pasal Khat Dam sak

(Matthew 8:1-4; Luke 5:12-16)

40A phaak khat Jesu kungah hong pai a, khupdin in hu ngen hi. “Hong dam sak nuam po lete hong dam sak thei tu ni hi,” ci hi.

41Jesu in ama sia khuangai huai sa in, a khut vaan in tham hi. “Hong dam sak nuam khi hi, dam tan, ” ci in zo kik hi. 42Thakhat in a natna in nusia a pasalpa damthiang hi. 43Tua zawkciang Jesu in ama tungah nasia tak son in, thakhat in pai sak a, 44“En in, hi thu kuama munah son heak in, thiampipa kungah paisuk tan a, ama in, veal sak tan,” ci in nasia tak a sawl zawkciang, “Mihing theampo tungah na thianthona a kilangh tu in, Moses sawl bangin, sangaw biakpiakna vawt tan,” ci hi. *

45Ahihang pasalpa pai in mun theampo ah hi thuthak son kakoai hi. Pasalpa in nasia takin son ahikom Jesu sia khuapi khat papo ah, mipite ii mu tangin, a tum ngam nawnbua hi. A ngamkhingna munte ah ama om a, mihingte in mun theampo panin ama kungah zuan uh hi.

⇑

[Remove Footnotes]