MATTHEW

Teptee bang Lungdamna Thu

Thupatna

Matthew teptee bang Lungdamna Thupha sia Thuciam Lui sungah Pathian ii a mihingte tungah kamciam a piak sate a tangtung sak Hunpa Jesu thu a ki at ahi hi. Hi thupha in, Jesu suana a mipui Jewte atu bek hi ngawlin, leitung buppi atu zongh hong piang ahi hi.

Matthew laibu sia belcing takin a kingual ahi hi. Jesu suana panin pan a, a tuikiphumna le ze-et a thuaknate ki at a, a zom in Galilee ngamah thuhilna le ciinate a dam sakna thute ki at hi. Tua zawkciang hi Lungdamna Thupha in, Jesu Galilee ngam pan Jerusalem ah a khualhawna, Jesu a nuntak nipi khakbel sung thu, a kithalupna thu le a thaw kikna thute ki at hi.

Hi Lungdamna Thupha in “Jesu sia a lianbel Sya hi a, Pathian thukham phen thei natu thunei pa, Pathian ukna-ngam huvau a hilpa hi,” ci in lak hi. Ama ii hilnate thu nam nga in kitawm a, (1) Mualtung thuhilna, Vantungngam mite ii nuntak zia, a nasep, a hamphatna le a thetna mun tu thute hi a (a lian 5-7); (2 )Nungzui sawm le nii teng nasep zia tu hilna (a lian 10); (3) Vantungngam omzia thusonteena (a lian 13); (4) Nungzuina zia hilna (a lian 18); le (5) Hun bo kuan thu le hong pai tu Pathian Ukna-ngam thute hilna (a lian 24-25).

A kihel Thulute

Tuiphumpa John nasepna 3:1-12
Jesu tuikiphumna le ze-et a thuakna 3:13-4:11
Galilee ngam mipite tungah Jesu nasepna 4:12-18:35
Galilee ngam pan Jerusalem ah khualhawna 19:1-20:34
A khakbel nipi sung le Jerusalem khuapaam 21:1-27:66
Topa thawkikna le a kilang kakoaina 28:1-20

Matthew 1

Jesu Christ ii Pute pate

(Luke 3:23-38)

1Abraham ii suan, David ii tu le ta ahi, Jesu Christ ii pute pate ii min sazian sia hi bang hi a,

Abraham pan David kumpipa dong, a pute pate ii min sia a nuai a bang ahi hi. 2Abraham ta Isaac, Isaac ta Jacob, Jacob ta Judah le a suapuite ahi hi. 3Judah in a zi Tamar taw Perez le Zerah hing a, Perez ta Hezron, Hezron ta Ram, 4Ram ta Amminadab, Amminadab ta Nahshon, Nahshon ta Salmon, 5Salmon ta Boaz hi. Boaz ii nu sia Rahab ahi hi. Boaz in a zi Ruth taw Obed hing a Obed ta Jesse hi.

6Jesse ta sia David Kumpipa ahi hi. David pan Babylon khua ah Israel mite salin a kimat hun dong, a nuai a bangin khang kiciamtee hi. David in Uriah zi taw Solomon hing a, 7Solomon ta Rehoboam, Rehoboam ta Abijah, Abijah ta Asa, 8Asa ta Jehoshaphat, Jehoshaphat ta Jehoram, Jehoram ta Uzziah 9Uzziah ta Jotham, Jotham ta Ahaz, Ahaz ta Hezekiah, 10Hezekiah ta Manasseh, Manasseh ta Amon, 11Amon ta Josiah, Josiah ta Jehoiachin le a suapuite ahi uh hi. * 12Babylon ah salin a kiciapui pan kipan Jesu khang dong a nuai a bangin khang kiciamtee hi. Jehoiachin ta Shealtiel, Shealtiel ta Zerrubabel, 13Zerrubabel ta Abiud, Abiud ta Eliakim, Eliakim ta Azor, 14Azor ta Zadok, Zadok ta Achim, Achim ta Eliud, 15Eliud ta Eleazar, Eleazar ta Matthan, Matthan ta Jacob, 16Jacob ta Joseph hi a, Christ kici Jesu Nu Mary pasal ahi hi.

17Tua ahikom Abraham khang panin David khang dong khang sawm le khang li hi a, David khang pan Babylon ah salin a ki paipui uh dong sia khang sawm le khang li, Babylon te mat hun pan Messiah sua dong khang sawm le khang li ahi hi.

Jesu Christ Suana

(Luke 2:1-7)

18Jesu Christ suana sia hi bang ahi hi. A nu Mary sia Joseph taw teang tu in a kidongh sa ahi hi. Ahihang a kiten uh ma in, ama sia Tha Thiangtho taw naungil om hi. * 19Joseph sia thumaan a ngamta tawntung pa khat hi a, ahizong ngual mai ah Mary maimawl sak nuam ngawl ahikom amate nii bek vaihawm in kikhen sawm hi. 20Tabangin a ngaisut laitak in, Vantung lalang khat a mang sungah hong kilak a “David ii suan Joseph awng, Mary sia na zi tu in tenpui kiita heak in. Banghangziam cile ama sia Tha Thiangtho in ngai sak hi. 21Ama in tapa khat hong hing tu a, ta ciangin a min sia Jesu ci in na phuak tu hi. Banghangziam cile ama in a mite mawna pan a hun tu hi,” ci hi. *

22“Tu in hite theampo a pianna sia Topa kamsangpa sonkhol teng a khuangkhim natu ahi hi. 23Ngaknu thiangtho khat naungil om tu a, tapa khat hing tu hi, ta ciangin a min sia Immanuel kiphuak tu hi.” (Tua in eite taw Pathian om khawm hi,’ a ci nopna hi.) *

24Joseph khanglo in vantung lalang sawl bangma in Mary tenpui hi. 25Ahihang taciil nau a sua dong a zi ompui ngawl hi. Taciang Joseph in nau min sia Jesu ci in phuak hi. *

⇑

[Remove Footnotes]