PHILEMON

Tungah Paul ii Laithak (Paul's Letter to Philemon)

Thupatna

Philemon sia Tapidaw thupi khat hi a, Colossae pawlpi mi khat hi tuakin, Onesimus a kici sila khat a neipa ahi hi. Hi sila pa sia a topa kung panin, taikuu a taciangin tua laitak thongsung a om Paul taw kimu luilam hi. Paul tungtawn in Onesimus sia Tapidaw hong suak hi. Paul in Philemon tungah a laithak na thu sia Paul ii a puak kik a sila pa taw a kilem kik natu Philemon tungah a nget sakna hi a, maw a kimai sak sila pa khat bang bek hi ngawlin, Tapidaw unau khat bang a kisaan kik natu nget sakna lai ahi hi.

A kihel Thulute
Thupatna 1-3
Philemon pokna 4-7
Onesimus atu nget sakna 8-22
Thukhupna 23-25

Philemon 1

1Christ Jesu atu a, thong a taak Paul le ih suapuipa Timothy in—

ih ngualtam le ih nasep puipa Philemon tungah, 2Philemon le na inn ah a kikhawm pawlpi le ih suapuinu Apphia le ngalkap bang a, ih seppui Archippus tungah lai kong thaak hi.

3Ih Pa Pathian le ih Topa Jesu Christ in thuthiamna le thin nopna hong pia tahen.

Philemon ii Itna le Upna

4Suapui Philemon awng, thu ka nget simin na min kong lo a, ka Pathian tungah lungdam ka ko hi. 5Banghangziam cile, Pathian mihing a kici peuma na itna le Topa Jesu sungah upna na neina thute ka za hi. 6Ka thu ngetna in, thu umte ih hina taw ih kipawl khopna sia Christ taw kikop a, ih nuntakna sungah ih nei thuphate theampo a thuk zaw in ih tel thei natu, a pian natu ahi hi. 7Suapui awng, nong itna in, kei atu lungdamna lian mama le hanthotna nasia takin, hong pia hi. Pathian mihingte theampo ii thin nong nuam sak hi.

Onesimus atu Nget sakna

8Hi thu hu in, Christ sungah na suapui khat ka hina taw, sep tu a kul khat sia hangsan takin kong sawl ngam hi. 9Ahihang nang hong it ka hikomin, kong thuum vawt zaw hi. Keima Paul sia Christ Jesu ii tongciin hi a, ama hu a, tu laitak mama in thongtaak hi napi, hi bangin thuumna kong zangh zaw hi. 10Tua ahikom, Onesimus atu nget sakna khat kong nei hi. Ama sia Christ sungah ka tapa hi zo hi; banghangziam cile thong sungah ka om khop panin, thaa lam ah ama ii a pa ka suak zo hi. 11Hunkhat lai in ahile ama sia nang atu in, bangma mannung ngawl hi. Ahihang tu in, ama sia nang le kei atu in a kimangthei khat hong suak hi.

12Keima pumpi za in ngaisutna taw, tu in nang kung ama kong puak kik hi. 13Lungdamna thupha hu in, luangta in ka om laitakin, nangma nong hu tu luangin, kei hong hu tu in, ama sia hi sungah ka keam nuam hi. 14Ahitazong tabangin, hu kong ngen hamtang nuam bua hi; tua sangin, nangma thu in na ngamtat tu kong dei zaw hi. Tua ahikom, na thukim ngawl po bangma ka vawt batu hi.

15Onesimus sia nang kung panin, tawm vei sung a tai sia, a tawntung na om khop tu hang hi zaw thei tu hi. 16Tu in ama sia sila khat lel po hi nawn ngawlin, sila tungsia dinmun ah om zo hi: ama sia Christ sungah ih it suapuipa hi zo ta hi. Ama sia kei atu in bang za in, manpha ziam! Nang atu zonghin, sila khat ahina le, Topa sungah suapuipa khat a hina taw bangza in manpha ziam!

17Tua ahikom naseppui bangin, nong ngaisun ahile, keima nong saan tu bangin, ama na saang kik in. 18Nang tungah ngamtat khialna hong nei a, leiba hong nei le zong, keima kong bat bangin na ciamtee in. 19Hi sungah keima khut tatak taw ma in lai hong at khi hi. Keima Paul in, kong lo kik vatei tu hi. (A tatak in ci leang, nangma nuntakna mama zongh kei tungah hong ba nginge na hi sia, kong phaw sak tu kul ngawl hi.) 20Tua ahikom suapui awng, Topa hu in, Christ sungah suapui khat hina taw thupha khat hong seam tan a, ka thin hong nuam sak tan!

21Lai hi sia kong at laitakin, nang tungah bang lungmuanna nei khi ziam cile— kong sawl bangin ngamta bek dom ngawlin, a dik zaw le a pha zaw in seam tu ci in kong he hi. 22Taciang kei atu in inn doituam khat, pua khol sa in na koi sak in, banghangziam cile note theampo ii thu ngetna sia, Pathian in hong saang tu a, note kung hong zuan sak kik tu hi, ci in lametna ka nei hi.

A khakbel Vaithakna

23Christ Jesu sungah ka thongtaakpui Epaphras in hong paupui hi. 24Tabangma ka naseppui Mark, Aristarchus, Demas le Luke in hong paupui uh hi.

25Topa Jesu Christ thuthiamna sia note theampo taw hong om khawm tahen.

⇑

[Remove Footnotes]