PHILIPPITE

Tungah Paul ii Laithak (Paul's Letter to the Philippians)

Thupatna

Paul ii Philippite tungah a laithak sia Europe leitangh sung pan in, Rome kumpi khutnuai a om Macedonia ngam a Paul ii phu phitbel pawlpi tungah a at hi. Lai a ki at hunin Paul sia thong sungah om a, ama a langpan Tapidaw naseam pawlkhat ii a nawngkai sak laitak le Philipi pawlpi sung a kihil khialna a om hu in a thinngim laitakin a at hi. Ahitazong Jesu Christ sia thuk takin a muan hu in Paul in lungdamna le thin muanna awsua taw at hi ci in kimu thei hi.

Laithak a atna thubulpi ahile Philippi Tapidawte in a kisap laitak a letsong a thaakte hu in lungdam kona ahi hi. Ama in hi hun sia hunpha khat in zangh a amate tungah ama haksatnate ahizong, amate haksatnate ahizong tuate kawm panin thin letna le thin muanna a nga thei natu in hanthot kikna pia hi. Amate kaangsung atu tupnate le kiphatsak nate in uk sak ngawlin Jesu ii kiniamkhiak ngamtatnate a nei thei natu in ngen hi. Amate Christ taw kipumkhat a nuntakna anei uhsia upna tungtawn in a kinga Pathian thuthiamna letsong hi a, Jewte ii thukham le a zeksate a zui zawk uh hang hi ngawl hi ci in phawk sak hi. Christ taw kipumkhat a a nungtate tungah Pathian lungdamna le thinnopna a piak thute at hi.

Hi laithak sungah lungdamna, thin muanna, pumkhat hina, le Tapidawte nuntakna le upna sungah thuak zawkna thute a thupibel in om hi. Philippi pawlpi tungah Paul ii itna thuk mama a neina zongh hi lai taw a pualaak hi.

A kihel Thulute
Thupatna 1:1-11
Paul ii ama aituam huvau 1:12-26
Christ sungah nuntakna 1:27-2:18
Timothy le Epaphroditus ii ngamtat natu
Tupna le sawmna 2:19-30
Ngalte le lauhuai thute huvau kidop natu 3:1-4:9
Paul le Philippi ii lawmte 4:10-20
Thukhupna 4:21-23

Philippite 1

1Christ Jesu naseamte ahi Paul le Timothy in —

Christ Jesu taw pumkhat a om pawlpi lampuite, Husyate le Philippi ah a om Pathian mite tungah lai kong thaak uh hi. *

2Ih Pa Pathian le Topa Jesu Christ in thuthiamna le thin nopna hong pia tahen.

Laithak A simte atu Paul Thunget sakna

3No kong phaw simin, noma hu in Pathian tungah lungdam ka ko hi; 4taciangin note theampo atu thu ka nget simin lungdamna taw thu ka ngen hi, 5banghangziam cile ka kipat phit ni pan tu dong Lungdamna Thupha nasepna sungah nong hu zia uhte ka ngaisut hang ahi hi. 6Tua ahikom no sungah hi nasep pha hong kipatpui Pathian in nasep a kiman tu Christ Jesu Ni ciang dong na hong seam suak tu hi ci in ka um hi. 7Ka thin sungah no kong phawk tawntung hi! Tabangin kong phaw sia kei atu in a kilawm mama thu ahi hi. Banghangziam cile, tu laitak thonginn sungah ka om laitak ahizong, Lungdamna Thupha ii a maanna huk tu le kip sak tu in suakta a, ka om lai hun ahizong, no in, Pathian ii hong piak hi phattuamna sia nong saan pui tek uh hi. 8A thukin no kong phawna sia Christ Jesu mama ii thin sung pan hong luang hi ci in kong son sia, thumaan ahi hunlam Pathian sia ka tetti ahi hi.

9Ki itna nasia seseam na nei natu le heakna maan le khentel theina a khuangkhim in na nei thei natu in, thu kong nget sak hi, 10tua hile a phabel sia na teal thei tu uh hi. Tasia ciangin Christ Ni hong thet tak ciang thiantho ngawlna le mawsiatna taw na kipeal tu uh hi. 11Pathian minthan natu le ama pok natu in Christ Jesu bek ii pian sak thei ngamtatphate taw na nuntakna uh hong kidim tu hi.

Christ atu Nuntakna

12Suapuite awng, kei tungah hong tung thute sia Lungdamna Thupha khanto natu hizaw ahi hunlam na tel tu uh ka dei hi. 13Tua thute taw kizom in, thupiang sia bangziam cile kumpipa a cing ngalkap theampo le hi sungah a om a dangte in kei sia Christ naseam ka hi hu a thongtaak ka hi hunlam hesiat uh hi. * 14Taciang thong sungah ka om hu in u le nau a tamzaw in Topa tungah thinmuan seseamna nei a, ngupna thu lau ngawlin hil tu in hangsan va-ial zaw hi.

15Amate sung panin pawlkhatte ahile eenna le kilangpanna thin taw Christ thuhil a, ahizong pawlkhatte ahile thupha ngaisut takpina taw hil uh hi. 16Pathian ii kei sia Lungdamna Thupha a maanna huk tu nasep hong piak hunlam amate in he ahikom ki itna taw thuhil uh hi. 17Pawlkhatte ahile Christ thu sia thinpha taw hil ngawl a, amate kaang sung vai taw kisai tupnate taw hil uh hi; thonginn sungah ka om lai in hong nawngkaai sak thei zaw tu in ki um lai hi.

18Thin takpi taw ahi a, ahi bua zong— Christ thu a nanam in a kihil sia ka lungdam veve a, phamaw ka sa bua hi! Taciangin ka lungdamna sia akizom khomsuan tu hi, 19banghangziam cile nong thunget sakna uh pan le Jesu Christ ii Thaa kung pan a hong pai huna taw kei hong suakta sak tu ci ka he hi. 20Deina tatak le lametna ka nei sia bangziam cile ka thi a ka nung zong ka nuntakna buppi taw Christ vaang ka piak thei natu, hun theampo sung le a tuanin tu hun sung teng seseamin ka panmun ka lel ngawl natu thu ahi hi. 21Nuntakna sia bang tu ziam? Kei atu in, nuntakna in Christ ahi hi. Tua ahi ciang thina in, a tam zaw meetna ahi hi. 22Ahizong ka nuntak ciangin a thupi nasepte seam thei zaw tu ka hikom in, thina le nuntakna ka teal sawn tu ka he bua hi. 23Kei sia ka lang le ka lang panin hong kikang hi. Hi nuntakna nusia in Christ taw ka omkhawm nuam mama a, tua in a phazaw kan thu ahi hi; 24ahihang no atu in ci leang a nungta in om leng thupi zaw lai hi. 25Hi thu thiangtel ka hikomin a nungta a om tu ka hina ka he a, upna sungah, khantona le lungdamna a kibelap natu in no taw kong om lai tu hi, 26tua hile no kungah kong haw kik ciangin Christ Jesu taw pumkhat hina na nuntakna uh sia kei tungah tamzaw lai in angtanna hong nei sak tu hi.

27Tu in a thupi thu in na nuntak sia Christ Lungdamna Thupha ii hong dei sakna bang ahi natu, tua hile kei kong pai thei a, kong pai maw zong note tupna khat taw kip takin a dingte hi in, tua deina khat bek taw lungdamna thupha upna atu ngaldo khawmte na hi hunlam kong za tu hi. 28Na ngalte na kiita heak vun a, hangsan tawntung vun, tua hile amate in hong lel tu a, noma in na zo tu uh hi, banghangziam cile zawna hong pia sia Pathian ahi hi. 29Ama um bek ngawlin, ama hang a ngimna na thuakna uh sia, Christ atu na sep thei natu in hamphatna nga na hi uh hi. 30Tu in a bo sa hun sungah nong mu uh ka ngal dona le tu mama a ka do lai na zak uh ngal donate ah keima nong do pui thei tu uh hi. *

⇑

[Remove Footnotes]