THU PUALAAKNA

John tungah Thu pualaakna (Revelation to John)

Thupatna

John tungah Thu pualaakna sia Tapidawte ii Jesu Christ sia Topa hi ci in a up hu in vawtsiatna a thuak laitakin, a ki at ahi hi. Lai atpa ii deina bulpi sia, a simte tungah lametna le thin letna a nga natu vawtsiatna le ngimna a thuak laitak thumaan in a kip thei natu ahi hi.

Laibu a tamzaw in thu a kisealte pualaakna le mu kholnate hi a, lim kammalte taw lak a, tua hun lai a, Tapidawte in ol takin tel tu a, a dangte atu, a lungman huai thu ahi natu in a ki at ahi hi. Tum thei mut thei a nanam thilte taw la aw a kingin sak ciang a la ii deina bulpi sia kiza kikik ahi bangma, hi lai ki at sia ii dei bulpi zongh, pualaakna taw a ban a ban in, a tum dadang in lak kikik hi. Laibu ii khiakna huvau ah ngaisutna nam tam mama om ahihang a deina bulpi tatak sia a thiangin kitel hi: Christ Topa tungtawn in, Pathian in a khakbel ciangin, Satan a kihel a ngalte zo thiang tu a, taciangin a thumaan mihingte ii tungah zawna a cingin a om zawkciang, van thak le lei thak ii thuphate thaman in a piak natu thu ahi hi.

A kihel Thulute

Thupatna 1:1-18
Mukholna kipatna le Pawlpi sali ii tungah laithak 1:9-3:22
Laizial le tepteena salite 4:1-8:1
Lemle salite 8:2-11:19
Ngulpui le nganhing niite 12:1-13:18
Mukholna a tatuamte 14:1-15:8
Pathian thin uukna kuang salite 16:1-21
Babylon lalcipna, nganhing, leeilot kamsang le
Doaimangpa a kizawna 17:1-20:10
A khakbel thukhenna 20:11-15
Van thak, lei thak le Jerusalem khua thak 21:1-22:5
Thukhupna 22:6-21

Thu Pualaakna 1

1Hi laibu sia Jesu Christ ii lak khol thute kitepteena ahi hi. Hai ngawlin, a tung tu thute a naseamte tungah a lak thei natu in, Pathian in hi pualaakna pia hi. Christ in a naseampa John tungah a heak sak thei natu in, ama kungah a vantung lalang pai sak a, 2taciangin John in a mu theampo son siat hi. Hisia in Pathian ii thupuak le Jesu Christ ii a lak thumaante huvau thu ko kikna ahi hi. 3Hi laibu a simte le a zuite in mihing hamphate ahi hi! Banghangziam cile hi thute hong tun tu hun hong nai zo hi.

Pawlpi Salite tungah Paupuina

4Asia ngamkhen sung a om pawlpi salite tungah, John in lai kong thaak hi: *

Pathian tung pan hong pai thuthiamna le thinnopna sia note a hi tahen, tua Pathian sia a om sa, a om nginge le hong pai pheang tu pa hi a, kumpi tokhum mai ah thaa sali taw 5a thumaan tetti, thina pan a kitho sak kik phitbelpa le leitung kumpite theampo a ukpa Jesu ahi hi.

Ama in ei hong it a, ama chisan hangin, eite mawna pan hong suatak hi. * 6Taciangin eite sia a Pathian le a Pa atu a seam tu in thiampi in hong vawt hi. Jesu Christ tungah minthanna le vaangletna sia a tawntung pan a tawntung dongin om tahen! Amen. *

7En vun, ama sia meeikaai sungah hong pai hi! Mihing khat sim in ama mu tu hi, tuate sungah ama a hol lette zongh kihel tu hi. Leitung theampo in ama hu in heena nasia tak taw mau tu uh hi. Tabangin hong piang tatak tu hi! *

8“Keima in a masa phit le a khakbel ka hi hi,” ci in a om nginge, a omsa, le hong pai pheang tu, Topa Vaanglianbel Pathian in ci hi. *

Christ ii Mu kholna

9Keima in na suapuipa John ka hi a, taciang Jesu taw ka kikopna taw noma taw a kibangin vawtsiatna thuak a, Pathian ngam lua in, a thuak kenkon na sep puipa ka hi hi. Kei sia Patmos tuikulh tungah hong kikoi hi, banghangziam cile, Pathian kammalte le thumaan thu ahi Jesu hong kilaakna ka than sak hang ahi hi. 10Topa Ni in, Thaa in kei hong uk a, aw nging khat ka za hi, tua aw sia lemle aw bang hi a, ka nungsang panin hong paupui hi. 11Tasia in, “Na mu teng at in a, a laibu sia hi pawlpite omna: Ephesus, Smyrna, Pergamum, Thyatira, Sardis, Philadelphia, Laodicea khuapi sali teng tengah thaak in,” ci hi.

12Akua in hong paupui ziam ci in ka nung ka kiheak ciang, kham meivakna sali ka mu hi, 13tuate kawmah mihing bang khat ka mu a, ama in a peang dong a tualsuk puan khat silhin, a awm kiimkot ah kham khau khat awh hi. * 14Ama sam sia tuumul bang le vuuk bangin kaang a, taciangin a mittang sia meikuang bang ahi hi; * 15ama peang sia taungo a kithiang sak, a kinawt taw kibang a, a aw sia tui teautuak nging bang ahi hi. * 16Ama in a khut ziat sangah aksi sali toai a, taciangin a kam sung panin a lang nii hiam namsau khat hong pusuak hi. A maitang sia sun lai nitaang bangin taang hi. 17Ama ka mu ciangin mithi sa bangin, a peang ah ka puk hi. Ama in a khut ziatsang ka tungah hong nga a, “Lau heak in! Kei sia a masa phit le a khakbel pa ka hi hi. * 18Keima sia nungta pa ka hi hi! Keima sia ka thi zo a, ahihang tu in a tawntung pan a tawntung dongin, ka nungta hi. Thina le mithite ngam ka uk hi. 19Tua ahikom nungsang ciang, hong piang tu nate ahizong, tu laitak a om nate ahizong, na mute at in. 20Kham meivak khuam sali te le ka ziat sang khut sungah na mu aksi sali te ii thukuu khiakna sia hi bang ahi hi: aksi salite sia pawlpi salite ii vantung lalangte hi a, meivakna salite sia pawlpi salite ahi hi.

⇑

[Remove Footnotes]