ROMETE

Tungah Paul ii Laithak (Paul's Letter to the Romans)

Thupatna

Romete tungah Paul ii laithak sia banghangziam cile ama Rome khua a om Pawlpi ah a haw ciangin, amate a kinging sa in a om thei natu a deina hi. Ama tupna pan, tua munah, a om Tapidawte kungah tawmvei naseam in a om zawkciang amate huna taw Spain ngamah a paisuak lai natu ahi hi. Tapidawte upna tu zia le amate nuntakna sungah tua thu a zaak thei natu in ama tel bangin Paul in a at hi a, ama thupuakte a cingbel in a kikhum laibu ahi hi.

Rome khua a om pawlpi mite a paupui zawkciang in amate atu thu a nget sak nate son a, tua zawkciangin a laithakna ii thubulphu ahi “Bangbangin Pathian in mihingte sia ama taw kilem sak kik thei ziam; A kipat pan a kipan a tawp dong upna tungtawn in piang a hina thu, Lungdamna Thupha in pualaak hi,” ci in son hi (1:17)

Tua zawkciangin Paul in a thubulphu sia hi bangin kicingto sak hi. Mihing a minpiang Jewte ahizong, Gentilete ahizong, Pathian taw a kilem kik natu kisamh hi, banghangziam cile amate theampo sia mawna vaangletna nuai ah om siat hi. Mihingte sia Pathian taw a kilem kik natu in Jesu Christ a upna tungtawn in piang thei hi. Tua zawkciangin Paul in Christ taw kikop a nuntakna thak ih neina in Pathian taw kizopna a thak piang sak hi ci hi.

Thu umte sia Pathian taw kilemna nei a, mawna le thinate ii vaangletnate panin Pathian Thaa in suakta sak hi. A lian 5-8 sungah Paul in Pathian thukhamte a kulna le thu umte ii nuntakna sungah Pathian Thaa ii thahatna thute son hi. Tua zawkciangin sawltakpa in Jewte le Gentilete sia mi namcinte sungah a kihel natu zia Pathian ngaisutna thute sonto lai hi. Ama thukhupna panin, Jewte ii Jesu a nialna uh sia banghangziam cile mihing theampo Jesu Christ tungtawn in, Pathian thuthiamna taw a kithuai thei natu a thupiang hi a, Jewte zongh in, Jesu Christ sia a tawntung in nial ngawl tu hi, ci in um hi. A khakbel in Paul in tapidawte nuntakzia tu sia bangbang hi a, a tuan in ngualdang taw kizopna sungah ki it natu dan sia koibang hi a ci teng son hi. Thubulphu ahi Pathian ii tung a sep sakna le ngam uk kumpite tung le khat le khat tungah Tapidawte sep tute le thinsung thiangtho tak a om zia tu thute son hi. A laithak tawpna ah ama aituam thuthakte le Pathian pokna kammalte at hi.

A kihel Thulute

Thupatna le Thubulphu 1:1-17
Mihingte atu ngupna a kulna thu 1:18-3:20
Pathian hong ngupna zia 3:21-4:25
Christ sungah nuntakna thak 5:1-8:39
Pathian ngealna sungah Israel mite 9:1-11:36
Tapidawte ngamtatzia 12:1-15:13
Thukhupna le aituam paupuina 15:14-16:27

Romete 1

1Pathian Lungdamna Thupha hil tu in a sap, sawltak khat tu a teal, Jesu Christ naseampa ahi Paul ii laithak hi.

2Tua Lungdamna Thupha a pian natu sia Lai Thiangtho sungah a ki at sa bangma taangh lai pek panin a kamsangte tungtawn in Pathian kamciam a piak sa ahi hi. 3Tua in ih Topa Jesu Christ, ama Tapa huvau ahi hi: Chi le sa panin ama sia David suan hi a; 4Pathian pianzia taw ci leang thina panin a lian vaangletna taw a kithaw sak kikna in Pathian Tapa a hina kilangh sak hi. 5Ama tungtawn in Pathian in mi namcin sung pan mihing theampo a up thei natu le a thu a nit thei natu in Christ hu in kei sia sawltak khat sua theina thupha hong pia hi. 6Jesu Christ neisa a suak tu in Pathian hong sap sa Rome khua a om note zongh hi thu in hong huam hi.

7Tua ahikom Pathian in hong it a, ama minam suak tu a hong sam sa no Rome khua a omte theampo tungah lai kong thaak hi.

Ih Pa Pathian le ih Topa Jesu Christ in thuthiamna le thinnopna hong pia tahen.

Lungdamko Thungetna

8A masa phitbel in no tungtaang ah Jesu Christ tungtawn in Pathian tungah lungdam ka ko hi, banghangziam cile leitung theampo in na upna thu uh hong za hi. 9A Tapa Lungdamna Thupha ka hil sak, ka thin theampo taw ka sep sak, tu a ka son teng sia thumaan a hina thu ah— Pathian in ka tetti ahi hi. No kong phaw tawntungna sia Pathian in, 10thu ka nget simin hong he hi. Pathian deina a hina le tu in no kungah kong haw tu sia hong suak sak thei takpi le ci in ka ngen hi. 11Note hong thakho sak tu, Thaa thupha hong hawm sawn tu in kong mu nuam mama hi. 12Ka cinop sia kei upna hu in note phat tuamna nga in, note upna hu in kei zongh phat tuamna nga tu a, hun khat sungah a kihu tetek ih hina thu ka son nopna hi.

13Suapuite awng hi thu na teptee tu ka dei a, tamvei ma note kungah hong haw tu in ka ngeal zo hi, ahihang tabang ka hi thei ngawl natu in bang khat po in hong khak tawntung hi. Gentilete sung panin a kikheal ka om sak bangma in, no sung pan zong kikheal sak zawk nei leng ka uk hi. * 14Banghangziam cile heakna nei te ahizong a nei ngawlte ahizong, pilna neite ahizong a nei ngawlte ahizong mihing theampo ii tungah tavuan ka nei hi. 15Tua ahikom Rome khua ah a teang no tung zongh ah Lungdamna Thupha hil tu sia ka lawp hi.

Lungdamna Thupha ii Vaangletna

16Lungdamna Thupha sungah a kicingin muanna ka nei hi; tua in a umte theampo ki ngup natu Pathian vaangletna hi a Jew mite atu hi photin, tua zawkciang Gentilete atu zongh ahi hi. * 17Banghangziam cile lungdamna thupha in Pathian le mihingte sia bangbangin kilemzawng thei tu ziam ci in hong lak hi: a patna panin a tawp dong upna tungtawn in a piang ahi hi. Laithiangtho sungah “Upna tungtawn in Pathian mai ah thutang kisuak sak pa in a nungta tu hi,” ci hi. *

Mihing Theampo Mawnei Siat

18Thumaan thu a kiheak tu a khaktan mihingte ngitlona le mawnate hu in Pathian thin uukna sia van panin hong pai suk hi ci in kilangh hi. 19Pathian in amate daan a pia hi, banghangziam cile mihingte ii Pathian a heak natu sia Pathian mama in amate tungah telthiang sak hi. 20Pathian ii simlei a bitphua pan kipan a kimu thei ngawl Pathian phatna ahi, ama ii tawntung vaangletna le thaa lam pianzia te thiang takin kimu hi; tuate sia Pathian ii vawt nate tung panin kitel thei hi. Tua ahikom mihingte in kam zon natu bangma a nei bua uh hi. 21Amate in Pathian he ahihang a upat tu bangin upat ngawl uh a, ama tungah lungdam a ko tu bangin ko ngawl uh hi. Amate khua ngaisutna mannung mama ngawl a amate thinsung kihum cip in, khuazing taw kidim hi. * 22A mate sia ciim kisa ahihang mawmaw uh hi; 23a nungta tawntung Pathian a biak tu luangin a thi thei mihing, vacim, ngamsa, awmtal a vak nganhingte meal taw kibang limte bia uh hi. *

24Tua ahikom, amate thinsung ah a uuk kihuai ngamtatnate vawt tu in, Pathian in amate thazau a, taciangin amate khat le khat tungah maizum huai nate kivawt uh hi. 25Pathian huvau thumaante sia leeilot thu taw theak uh a, Bitphuapa bia ngawlin Pathian bitphua sa nate bia zaw uh hi. Pathian sia a tawntung in kipok tahen! Amen.

26Amate sia hi bangin ngamta ahikom, Pathian in amate sia a maizum huai chi le sa deina sungah thazau hi. A numeite ngangawn in amate pumpi sia zak tu bangin zangh ngawlin ngeina ngawl bangin zangh uh hi. 27Tua bangma in pate zongh in numei taw om khop tu sangin, pa le pa khial nopna thin nei uh hi. Pate in a maizum huai pa le pa khialnate vawt a, tua hu in amate taw a kiphu daante kipia hi.

28Pathian huvau heakna maante sia mihingte in khua ngaisut in nei nuam ngawl ahikom Pathian in amate sia ngamtat tuak ngawlte ngamtat theina ngaisutna sungah thazau hi. 29Amate sia ngitlona, siatna, duhopna le kilal sak theina namcinte taw kidim a; ki eenna, kisuamlupna, kihauna, ngualtheamna le siatvawt nopna thin taw kidim uh hi. Amate sia nawnsan a, 30khat le khat kingensia hi; amate in Pathian ensan a, sisuak in, kipha sak a kisuangtaak hi; siatna namcin phuang a; nute pate thu ni ngawl hi; 31Cizat nei ngawl a; kamciam len ngawlin ngual hesuak theina le thuthiamna nei ngawl hi. 32Hi bang a nungtate sia Pathian thukham in thidaan thuak hen a ci hunlam zongh amate in he uh hi. Ahitazong, a ngamtatna kheal ngawl bek dom ngawlin, tabang a ngamtate zongh thukimpui lai hi.

⇑

[Remove Footnotes]