Romete 9

Pathian le Ama Mite

1Thumaan ka son hi; Christ neisa ka hi a, ka leeilot bua hi. Thaa Thiangtho ii a uk ka thinsung zongh in leeilot ngawl ka hi sia hong tel thiang sak hi. 2Ka chi ka sa ahi ka mite atu in bangza in khuangai khi ziam! A kizom tan in bangza in lainat law khi ziam, 3a phattuamna om tu hi thong le amate atu in Pathian haamsiatna thuak leng a, Christ taw zong kikhen law leng zong ka uk hi. 4Amate in Pathian teal sa mihingte hi uh a; ama in amate tapate suak sak in, a minthanna lak hi; ama in amate taw kamciamna vawt in Thukham pia hi; amate in a maan biakpiakna nei uh hi; amate in Pathian kamciam saang uh hi. * 5Amate in khanglui Hebrew minthangte ii suan le paal hi uh a, Christ ii a mihing pianzia ci leang amate minampui ahi hi. Na theampo a uk Pathian sia a tawntung in kipok tahen! Amen.

6Pathian kamciam tangtung ngawl hi ci ngawl khi hi; banghangziam cile Israel mi theampo Pathian teal sa hi siat ngawl hi. 7Abraham ii suan theampo zongh Pathian tate hi siat ngawl hi. Pathian in Abraham tungah “Nang kong kamciam na suan le na paalte Isaac tungtawn in na nei tu hi,” ci hi. * 8Hi sia a khiakna in mihing pian ngei bangin a piang thathongte sia Pathian tate hi ngawl a, Pathian kamciam panin a piangte bek a suan le a paal tatakin kingaisun hi. 9Banghangziam cile Pathian kamciam sia, hi kammalte bangin kipia hi. “A hun ciangin kong pai kik tu a, Sarah in tapa khat hing tu hi.” *

10Hisia bek hi ngawl hi, banghangziam cile Rebecca in ih pu Isaac ahi a pasal taw tapa nii nei hi. 11-12Ahihang tapa khat teal tuam tu sia Pathian ii deina vingveng ahi natu thu huvau in, Pathian in a nu munah, “A u zaw in a nau zaw ii na sep sak tu hi,” ci hi. Ama in hi thu a pau laitakin amate ngeal sia piang ngawl lai a, a sia a pha bangma vawt a nei balai hi. Tua ahikom Pathian tealna in ama sapna tung pan hi a, amate sepna tung pan hi ngawl hi. * 13Laithiangtho in, “Jacob ka it a, Esau ka ensan hi,” ci in a ki at bang ahi hi. *

14Tua ahile bang ih son tu ziam? Pathian in a kilawm tu bang a thukhen ngawl hi ih ci tu ziam? Kici thei ngawl hi. 15Banghangziam cile Moses tungah, “Ka hesuak nopte ka hesuak tu a; ka mulkim nopte ka mulkim tu hi,” ci hi. * 16Tua ahikom mihing deina le sepna thu hi ngawlin, Pathian hesuakna tungah thu om zaw hi. 17Banghangziam cile Laithiangtho in Egypt kumpipa tungah Pathian pauna son hi. “Hi tupna hang le ka vaangletna lak in, leitung theampo ah ka min a kiheak natu in, kumpi kong suak sak a nang kong zangh hi,” ci hi. * 18Tua ahikom Pathian in a hesuak nopte tungah hesuak a, thin sahna a piak nopte tung ah thin sahna pia hi.

Pathian Thin uukna le Hesuakna

19Note sung pan khat po in hong ci tu nu hi. “Hi bang ahile Pathian in mihing khat po tungah maw sakna pia thei tu ziam? Pathian deina akua in nial thei tu ziam? 20Ahihang lawmpa awng, Pathian kam a zo kik tu in nang sia akua na hi ziam? Tungbeal khat in a vawtpa munah, “Banghangin kei hi bangin hong vawt ni ziam?” ci in a dongh thei bua hi. * 21A tatak ci leang bealte a vawtpa in tungmante a dei babangin a zak thei natu thunei a, tungman tangh khat panin beal nii vawtin, khat sia hun thupi sung a zak tu, khat sia hun thathong sung a zak tu in vawt theina thunei hi.

22Pathian nasepna zongh tasia bangma ahi hi. Ama in a thin uukna lak nuam a, a vaangletna kihe sak nuam hi. Lalcipna sung a theng tu mihing ama a thin a uuk sakte sia thinsauna tatak taw thuak hi. 23A kicing ama vaangletna zongh hong lak nuam a, a minthanna a nga tu in hong vawt sa eite a hesuakna a saang tu mihingte tungah tua a vaangletna hong buak hi. 24Banghangziam cile eite sia Jewte sung pan bek hi ngawlin, Gentilete sung pan zong hong sam a, a minamte ih hi hi. 25Hi thu in Hosea laibu sungah a son teng ahi hi,

26“Taciangin, note ka mihing hi ngawl nu hi,” 27Taciang Israel mite huvau Isaiah in hi bangin ci hi: “Israel mite sia tuipi hui a sen bangin a tam hial hangin, amate sung pan in tawm bek kingum tu hi; * 28banghangziam cile Topa in leitung bup ah manlang takin leiba sazian siik tu hi.” 29Isaiah in a masa in hi bangin ci hi. “Vaanglianbelpa Topa in suan le paal tawm hong kheet sak ngawl hi kapo le, eite Sodom bang ih hi tu a, Gomorrah bang ih suak tu hi.” *

Israel le Lungdamna Thupha

30Pathian mai ah thutang sua natu a hanciam ngawl Gentilete sia a upna tungtawnin thutang suak uh hi, ih ci hi; 31Tua laitakin Pathian mihingte in Pathian mai ah thutang suana tu in thukham khat zong uh a, a mu bua uh hi. 32Banghangin mu ngawl ziam? Banghangziam cile amate in upna bulphu ngawl a, sepna bulphu uh hi. Amate in laithiangtho sungah a kison “Lutuna Suang” tungah lutu uh hi:

33“En vun, Zion ah suang khat ka koi a,
⇑

[Remove Footnotes]