TITUS

Tungah Paul ii Laithak (Paul's Letter to Titus)

Thupatna

Titus sia Gentilete sung panin, Tapidaw hong suak a, Paul ii ngam thak nasepna sungah, a seppui le a khutdawnpa ahi hi. Titus tungah Paul ii laithak sia pawlpi nasepna a vaan tu in Crete tuikulh ah a nusiat, ama a hu, khangmoipa tungah a thaak ahi hi. Laithak sungah thu nam thum om hi.

Crete mite omzia ih et ciangin, Pawlpi lampuite in bangbang ngamtatna nei le pha ziam ci in, a phawk sakna sia thu masa ahi hi. Tua zom a Titus munah, pawlpi sungah pawlno tatuamte, tungah bangbangin hilna nei tu, pasal haamzawte le, nupi haamzawte (tuate in numei khangmoi zawte hilsawn tu) khangnote le silate koibang hil tu, a khakbel in lai atpa in, Titus munah, Tapidawte ngamtatzia tu ngaisutna pia a, kilemna le kingualtam a kulna, pawlpi sungah ki etsatna, kam kinialna, kikhenthap nate bangbangin pial thei tu ci in hil hi.

A kihel Thulute
Thupatna 1:1-4
Pawlpi lampui upate 1:5-16
Pawlpi sung pawl tatuamte nasep 2:1-15
Hanthotna le kidop natu hilkholna 3:1-11
Thukhupna 3:12-15

Titus 1

1Pathian ii naseampa le Jesu Christ ii sawltakpa keima Paul in lai kong thaak hi.

Kei sia Pathian teal sate a upna uh khanto sak natu le, ih biakna ii hil thumaan thu ah, a lampui tu in hong kiteal a, hong kipuak hi. 2Tua thumaan sia nuntak tawntungna lametna tungah kiphut hi. A leeilot ngawl Pathian in hi nuntakna sia, ei tungah piak tu in, hun kipat panma hong kamciam zo a, 3taciang a hun tun tak ciangin, a thu hong puak sungah hong kilak hi. Hi thu sia kei hong ki aap a, taciang ih Ngumpa Pathian hong thupiakna taw ka thang sak hi.

4Ih nei khop tek upna sungah ka tapa maan ahi Titus tungah lai kong at hi.

Pathian le Christ Jesu ih Ngumpa in, thuthiamna le thinnopna hong pia tahen. *

Crete ah Titus Nasepna

5Khuapi simin pawlpi upate na koi natu in, a kitaangsamh lai teng, a seam tu in Crete ah nang hong nusia ka hi hi. Kong thuhilte na phawk tan, 6pawlpi upa khat sia sitbaang ngawl tu hi; ama in zi khat bek nei tu hi, taciang a tate sia thu um mi hi tu a, thu ni ngawl a, a ngilo minthangte hi ngawl tu hi. * 7Pawlpi lampui khat sia Pathian ii naseam ahikom, ama sia pau banna nei ngawl tu, kiphasak ngawl tu, a thintom ngawl tu, zukham ngawl tu, molngol ngawl tu a, sum lamsang duhop ngawl tu hi. 8Ama sia zindo thiam tu a, na phate diksa thei tu hi. Ama le ama ki uk zo tu a, thutangin, thiangtho in, phincing tu hi. 9Upna bul taw a kisi a muan thamman ngupna thu kho takin len tu hi. Tabang hile thumaan hilnate taw ngualdangte hanthawn thei tu a, taciang, tua thumaan sia a nalh te zongh a pai khialna uh hil thei tu hi.

10Banghangziam cile, tabang mihing sia tam mama om a, a tuan in Jewte sung pan hong kikheal te in, amate ii lui thathong thute taw ngual langpan in theam uh hi. 11A maizum huai in, sum nga natu bek taw, a kilawm ngawl thute hil a, innkuan bubup buai sak ahikom, a thuhil ih khaktan kul tu hi. 12-13Amate ii kamsang khat ahi Crete ngam mipui khat in, “Crete mite sia leeilot tawntung a, ngamsa ngilo taw kibang a, datham a, antuang hi,” a ci sia thumaan son ahi hi. Hi thu hu in, amate nasia takin tei lete amate in upna thiangtho nei tu a, 14taciang Jewte ii taangh ngeinate len nawn ngawl tu a, thumaan a nial mihingte ii thupiakte, len nawn ngawl tu hi. 15Thinsung thiangtho mihingte atu in, na theampo thiangtho hi; ahihang a ninte le a um ngawlte atu in, bangma a thiangtho om ngawl hi, banghangziam cile amate thinsung le a khua ngaisutnate nin zo hi. 16Amate in Pathian ka he uh ci ahihang, amate ngamtatna in tua thute nial hi. Amate sia ki etsatna taw kidim a thu ni ngawlte ahikom na pha khat zongh seam tu in kiphu ngawl hi.

⇑

[Remove Footnotes]