1 Khang tangthu 17

David tungah Nathan ii Thuson

(2Samuel 7: 1-17)

1Tu in David Kumpipa a kumpi inn ah teang hi. Nikhat ni in David in kamsangpa Nathan samin ama tungah, “Kei hi sungah cedar thing taw a kisa inn sungah teang khi hi, ahihang Pathian ii Thukham Thingkuang sia puanbuk sungah kikoi hi!” ci hi.

2Nathan in, “Na thin sung a om babangin vawt in, banghangziam cile Pathian sia nang taw omkhawm hi,” ci in zo hi.

3Ahizong tua ni zanin Pathian in Nathan tungah, 4“Ka naseampa David kungah pai tan a, ‘Ka ten natu biakinn khat sa tu sia nangma na hi bua hi. 5Israel mite Egypt ngam pan ka suatak ni pan kipan tu dong biakinn sungah ka teang ngei bua hi; puanbuk sungah teang tawntung in, mun khat pan mun khat ah ka kikhiin hi. 6Israel mite taw ka khualhawna theampo ah lampui in ka tealte khat papo ii tungah banghangin cedar thing taw ka biakinn sa ngawl nu ziam ka ci ngei bua hi,’ ci hi,

7“Tua ahi ciangin ka naseampa David tungah keima Vaanglianbelpa Topa in hi bangin hong ci hi ci in son tan, ‘Lo sung na tuu cinna panin kong la a, Israel ka mihingte ukpa kong suak sak hi. 8Na paina theampo ah kong ompui a, na mai ah na ngal theampo kong zaw sak hi. Leitung ah lampui lianbelte bangin na min kong thang sak tu hi. 9-10Israel ka mite atu in mun khat ka teal sak a, tua munah ka teang sak zo hi, amate tua munah teangin kuama in nengniam nawn ngawl tu hi. Hi ngam a thet ni pan kipan amate a ngoltol mite in sim bul uh hi, ahizong tabang piang kik nawn ngawl tu hi. Na ngalte theampo na suatak natu uh le suan le paal na nei natu uh in kamciam kong pia hi. 11Na thi ciang le na pu le na pate taw hong kiphum khop ciangin na tapate sung pan khat, kumpi ka suak sak tu a, a ukna ngam a thahat ngam khat ka suak sak tu hi. 12Ama sia keima atu in biakinn a sa pa hi tu a, a ngam ukna ka kizom suak sak tu hi. 13Keima in a pa ka hi tu a, ama sia ka ta hi tu hi. Nangma kumpi na sua thei natu in Saul ka hepkeak bangin ama ka khuangkho saknate ka dok kik batu hi. * 14Ka mite le ka kumpi ngam a uk tawntung tu in ama ka koi tu hi. Ama kumpi khangngui sia a bo ngei batu hi,’ va ci tan,” ci in sawl hi.

15Pathian ii ama tung a, a pualaak thu theampo Nathan in David tungah son hi.

David ii Lungdamko Thungetna

(2Samuel 7:18-29)

16Taciang David Kumpipa sia Topa ompuina puanbuk sungah pai a, tosuk in thungen hi, “ Topa ka Pathian awng, kei tung ahizong ka innkuanpuite tung ahizong nong septe ka kiphu ka kilawmna om ngawl hi. 17Hi napi tu in a nasia zaw lai in hong seam ni hi, mai sangah ka suan ka paalte atu dong kamciamna na vawt zo hi, Topa ka Pathian awng, nangma in kei mihing thupi khat bangin nong thupi vawt zo hi. 18Bangdang hong ci thei lai tu khi ziam! Na naseampa kei nong he mama a, nong upat lalai hi. 19Hi thu sia kei atu in na deina le na tupna hi a, mai sangah ka let natu nong lakna hi. 20 Topa awng nang taw a kibang kuama om ngawlin; nangma bek Pathian na hi hunlam kong he tawntung zo uh hi. 21Na minam suak tu in saltanna pan na suatak sak Israel mite taw a kibang leitung ah minam dang om ngawl hi. Amate tungah a lamdang le a thupi na nasepte hangin leitung bup ah na minthang hi. Egypt panin na mite suatak in, amate mai ah minam dangte na notkeak hi. 22Israel mite a tawntung in nangma mi tu in na vawt zo a, nangma Topa in amate Pathian na suak zo hi.

23“Taciang tu in, Topa Pathian awng, kei le ka suan ka paalte atu hun tatuam sungah kamciam na vawtte a tawntung atu in hong tangtung sak tan, ka seam tu na ci te hong seam tan. 24Na minthanna sia lian tu a, taciang mite a tawntung in, ‘ Topa Vaanglianbelpa sia Israelte ii Pathian hi,’ ci tu uh hi. Taciang nangma in ka khangngui sia hun buppi ah nong keamcing tu hi. 25Hi thungetna nang tungah hang takin kong ngen hi, banghangziam cile, nangma in kei na naseam pa ii tungah hite nong lak zo a, taciang ka suan ka paalte sia kumpipa te na sua sak tu nong son zo hi. 26 Topa awng nang Pathian na hi a, hi a lamdang kamciamna ka tungah nong vawt zo hi. 27Na maipha a nga tawntung tu in ka suan le ka paalte thupha nong piak sak natu in hesuak kong ngen hi. Topa awng, nangma in amate thupha na pia zo a, na piak thupha sia amate tungah a tawntung in kip tu hi,” ci hi.

⇑

[Remove Footnotes]