KUMPITE KHATNA

(The First Kings)

Thupatna

Kumpite Laibu Khatna sia Israelte ii kumpi za taw ki ukna tuanthu Samuel laibu sung pan a sia taw a kizom to ahi hi. Tua laibu sia khen thum in kikhen hi: (1) A pa David a thi ciang Solomon ii Israel le Judah te ii kumpipa a suana. (2) Solomon ii ngam ukna le a zawna thute. A teptee huai thu ah Jerusalem a Biakinnpi a sakna. (3) Ngam buppi saksang ngam le thangsang ngam ci in a kikhenna, taciang kum zalom kua (9 B.C.) dong kumpi seam tatuam te ii tangthu kikhumna hi.

Kumpipate laibu nii te sungah ngam uk khat papo sia Pathian tungah a thumaan le a thumaan ngawlna tungah zawna le lelna thute kikhum hi. Milim biakna le thu nit ngawlna te in lalna sung then hi. Kumpi ngam sak sangah kumpipa a seam theampo in hi ze-etna sia lel siat hi, taciang Judahte kumpipate ii thu kitepteena sungah zawna le lelna a kihel in om hi.

Kumpite Laibu masa sungah TOPA ii kamsangte sia kiciamtee tuam hi, tua Pathian taangin a paukhia kamsang thinliante in mihingte in milim bia ngawlin Pathian thu nit ngawlna a vawt ngawl natu pau uh hi. Hite sungah a kician tuam sia Elijah hi a, Baal pathian ii thiampite taw a kidemna tangthu om hi. (18)

A kihel Thulute
David ii maan hun a tawpna 1:1-2:12
Solomon sia kumpipa suak 2:13-46
Solomon ii ngam ukna 3:1-11:43
   a. A kipat tuung kumte 3:1-4:34
   b. Biakinnpi kisa 5:1-8:66
   c. Hun khak sang thu 9:1-11:43
A kikhentham kumpi ngam 12:1-22:53
   a. Saksang minamte ii tualngal thawna 12:1-14:20
   b. Judah le Israelte ii kumpipate 14:21-16:34
   c. Kamsangpa Elijah 17:1-19:21
   d. Israel kumpipa Ahab 20:1-22:40
   e. Judah ah Jehoshaphat le Israel ah Ahaziah 22:41-53

Kumpite Khatna 1

Kumpipa David A huai a teak hun

1Kumpipa David sia tu in pasal huai mama khat hong hi a, a naseamte in puanvan taw sisiin hi kale a khua mama a lum thei nawn bua hi. 2Tua ahikom a uliante in, ama munah, “Kumpipa awng, nang hong ou tu ngaknu khangmoi khat hong zon sak taw ung. Ama in nang taw a nai in hong luppui tu a, na khualum tu hi,” ci uh hi. 3Israel ngam bup ah ngaknu mealpha khat kizong a, Shunem ah Abishag a kici khat mu uh a, taciang ama sia kumpipa kungah ki paipui hi. 4Ama sia a meal pha mama a, kumpipa zongh ou hi, ahihang ama in nupa vai a zak pui nawn bua hi.

Adonijah in Kumpi tokhum Lua nuam

5-6Tu in Absalom a thi tak ciang David ii Haggith taw a tapa Adonijah sia David tate a nungta lai te sung pan a upa bel ahi hi. Ama sia a meal hoi mama mihing khat ahi hi. David zongh in ama sia bangma hunin tei ngei ngawl a, taciang ama sia kumpipa suak nuam mama hi. Ama le ama sia ngalleang, siphu te le ama a cing ngalkap sawmnga heang hi. * 7Ama in Zeruiah ii tapa Joab taw thu son a, thiampi Abiathar taw zong thu kikum uh hi, taciang amate in ama sia hu tu a lungkim uh hi. 8Ahihang thiampi Zadok, Jehoiada ii tapa Benaiah, kamsangpa Nathan Shimei, Rei le David a cing ngalkapte sia Adonijah sangah a om bua uh hi.

9Ni khat ni in Adonijah in Enrogel cik hui Ngul Suangpi a kicina munah tuu, khuital, khui no thaute sangaw biakpiakna in a pia hi. Ama in kumpipa David ii tapa dangte le Judah pan kumpipa uliante tua biakpiakna sungah sam hi, 10ahihang ama in a suapui seal Solomon ahizong Nathan kamsangpa ahizong, Benaiah kumpipa a cing pa sam ngawl hi.

Solomon Kumpipa in Kikoi

11Tua zawkciang Nathan in Solomon ii nu Bethsheba kungah pa in dongh hi, “Haggith ii tapa Adonijah in ama le ama sia kumpipa in kikoi ahi hunlam he ngawl ni ziam? Taciang Kumpipa David zongh in hi thu bangma he ngawl ahi hunlam na he ziam? * 12Nangma le na tapa Solomon ii nuntakna na hu nuam le, 13ngaisutna hong pia khi hi, thakhatin Kumpipa David kungah pai in a, “Kumpipa awng, ciliap huai takin kei tungah kamciam nong vawtna ah ka tapa Solomon in na kumpi za hong laih tu ci ka na ngawl ni ziam? Tua ahile Adonijah sia bangbangin kumpipa suak thei ziam?” ci in dongh tan. 14Taciang Nathan in belap a, “Tua zawkciang Kumpipa David taw na papau laitakin kei kong tum tu a, a thuson teng maan hi kong ci tu hi,” ci hi.

15Tua ahikom Bethsheba in kumpipa lupna khaan sungah kimu tu in pai hi. Ama sia huai mama zo a, Shunem panin Abishag in ou hi. 16Bethsheba kumpipa mai ah a niamin hong kun a, kumpipa in, “Bang uuk ni ziam?” ci in dongh hi.

17Ama in, “Kumpipa awng, TOPA na Pathian ii min taw kei tungah ciliap huai takin kamciam nong piakna ah, nang zawkciang kumpi a suak tu sia ka tapa Solomon hi, ci ka na ngawl ni ziam? 18Ahihang Adonijah sia kumpipa suak zo a, taciang hi thu huvau nang bangma he ngawl ni hi. 19Ama in khuital tam ma, tuute, khuino thaute sangaw biakpiakna in pia a, ama in na tapate sam a, Abiathar thiampipa, Joab na ngalkap hon ukpipa samin poaipi khaam hi, ahihang ama in na tapa Solomon sam ngawl hi. 20Kumpipa awng, Israel mite theampo in akua in na kumpi za hong lai tu ci in na son tu hong ngak tek hi. 21Tabang na hi bale na thi papo ciang ka tapa Solomon le kei sia thumaan ngawlte a vawt bangin hong kivawt tu hi.”

22Ama a papau laitak in, Nathan sia kumpipa inn sungah hong tum hi. 23Nathan tua munah om ci in kumpipa tungah kison a, kamsangpa, Nathan sia sungtangin kumpipa mai ah kun hi. 24Tua zawkciang ama in, “Kumpipa awng, Adonijah in nang hong laih kumpipa suak tu hi ci in taangko zo ni ziam? 25Tu ni mama in ama in pai in, khuital tam ma le tuu le khuino thaute sangaw biakpiakna in pia hi, ama in na tapate theampo sam a, Joab na ngalkap hon ukpipa zongh sam hi, taciang Abiathar thiampi zongh sam a, amate poai khaam in, ‘Kumpipa Adonijah a khan sau tahen,” ci in au uh hi. 26Ahihang ama in kei hong sam ngawl hi, topa awng, Zadok thiampipa ahizong, Benaiah ahizong, Solomon ahizong hong sam ngawl hi. 27Kumpipa in hite sia na thukim ma ziam, nang hong laih tu sia akua hi tu ziam ci in na uliante zongh nong son ngawl ma ahi ziam?” ci hi.

28Kumpipa David in, “Bathsheba hong tum sak kik tavun,” a ci ciang ama hong pai a, ama ii mai ah ding hi. 29Taciang ama ii munah, “Ka ngim nga na theampo pan hong hunkhia a, a nungta TOPA min taw nang tungah kamciam hong pia khi hi, 30tu ni in TOPA Israel Pathian min taw kamciam kong piak kholet tu khi hi, na tapa Solomon in keima kumpi za hong laih tu hi,” ci hi.

31Bathsheba kunsuk in, “Ka topa kumpipa nungta tawntung tahen!” ci hi.

32Tua zawkciang kumpipa David in Zadok, Nathan le Benaiah sam sak hi. Amate hong sungtan ciangin, 33amate tungah, “Ka zum uliante keng vun; ka tapa Solomon in ka laa tung to tahen a, Gihon Cik ah tha suk tavun, 34tua munah Zadok le Nathan in Israelte ii kumpipa tu in sathau noai tahen. Tua zawkciang lemle tum tu a, ‘Solomon kumpipa a khan sau tahen,’ ci in au vun. 35Ka kumpi tokhum tungah to tu in hi munah hong heak kik ciangin, a nung zui vun. Ama in ka kumpi za hong laih tu hi banghangziam cile ama sia Israel le Judah uk tu in ka teal sa ahi hi,” ci hi.

36“Na dei bangin ka seam tu hi,” Benaiah in ci in zo a, “taciangin TOPA in zongh hong kip sak tahen. 37TOPA sia nang kumpipa taw hong omkhop bangin na tapa Solomon taw zong hong omkhawm tahen, taciang ama ii maanna sia nang sangin zongh mainawt zaw lai tahen,” ci hi.

38Tua ahikom Zadok, Nathan, Benaiah le kumpipa a cingte in Solomon sia Kumpipa David ii laa tungah suan in, Gihon Cik ah tha uh hi. 39Zadok in TOPA ii hong ompuina puanbuk sung pan olive thau la in, Solomon noai hi. Amate in lemle tumin, mipite theampo au in, “Kumpipa Solomon a khan sau tahen,” ci uh hi. 40Taciang amate theampo in ama nungzui in cia a, lungdam in au a, tamngai tumin, lei liing khom za tu in a aw uh nging hi.

41Adonijah le a leangnate poaipi khaam a man kuan ciang, amate in awnging za uh hi. Taciang Joab in lemle aw a zaak ciang ama in, “Khuapi sungah awnging sia bang khiakna nei ziam?” ci hi. 42A pau a man maa in thiampi Abiathar ii tapa Jonathan hong theng hi. Adonijah in, “Hong tum tan, nang sia pasal pha khat na hi hi, thuthang pha khat hong puak hi lete kilawm hi,” ci hi.

43“Thuthang pha hong puak ngawl khi hi,” Jonathan in ci hi. “Kumpipa David in Solomon sia kumpipa suak sak hi.” 44Ama in Zadok, Nathan, Benaiah le kumpipa cingte in tha sak hi. Amate in kumpipa laa tungah Solomon to sak uh hi, 45taciang Zadok le Nathan in Gihon Cik hui ah sathau noai in kumpi suak sak hi. Tua zawkciang amate khuapi sungah tumin lungdam in au uh a, mipite sia tu in ngamlum lialua uh hi. Tasia na zaak uh awnging sia ahi hi. 46Solomon sia tu in kumpipa ahi hi. 47Tuateng bek dom ngawlin kumpipa ii uliante in pai in Kumpipa David zatakna pia uh a, hi bangin ci uh hi. ‘Na Pathian in Solomon sia nang sang zongh in minthang sak zaw lai tahen, taciang Solomon ii maanna sia nang aa sangin khangto zaw lai tahen,’ ci uh hi. Tua zawkciang Kumpipa David in a lupna tungah kun in biakpiakna vawtin 48thungen hi, ‘Ka suan ka paalte khat kei hong laih sak a tasia hun a mu tu in hong nungta sak Israelte ii Pathian TOPA pok tek tawng,’ ” ci hi.

49Tasia ciang Adonijah ii leangnate lau uh a, amate theampo dingin amate san tek ah paikhia uh hi. 50Adonijah in Solomon kiita mama ahikom TOPA ii ompuina puanbuk sungah biaktau ii kingh khat lenin om hi. 51Adonijah in ama kiita ahikom biaktau kingh lenin om hi ci in Solomon tungah kiko hi, taciang ama in, “A masa phitbel in Kumpi Solomon in kei hong thalup ngawl natu kamciam hong pia le dei khi hi,” ci hi.

52Solomon in zo kik a, “Ama kei tungah hong thumaan po le a samzam khat zongh kithutha ngawl tu hi, ahihang hong thumaan bua ahile thi tu hi,” ci hi. 53Kumpipa Solomon in Adonijah biaktau panin samkhia sak hi. Adonijah Kumpipa ii mai ah kun suk a, taciang kumpipa in, ama munah, “Na cia nuam le cia thei ni hi,” ci hi.

⇑

[Remove Footnotes]