SAMUEL KHATNA

(The First Samuel)

Thupatna

Samuel Laibu Khatna in Thukhente ii hun le Kumpite hun kilaklaw a Israelte thu tepteena ahi hi. Hi Israelte ii minam bup nuntakzia kikhealna sia hi mihing thum teng tung pan hi bel hi: Samuel, thukhen liante a khakbel sia; Saul, Israelte ii kumpi masa phitbel sia le David, thahatna hong nga maa in ama ii ngalpalhna thu tatuamte sia Samuel le Saul ii thute taw kipheak khawm hi.

Thuciam lui sung a, tangthu tuanthu dangte bangma in hi laibu ii thuthun sia Pathian tungah a thumaan uh le zawna nga a, thu nit ngawlna in lalna piang sak ci thu hi. Hi sia sia thiangtho takin Topa ii kammal in thiampi Eli tungah sonkhia hi 2:30; “Kei hong upat vawtte ka upat vawt tu a, kei hong simmawte ka ngaimawk vawt tu hi.”

Hi laibu in kumpi kikoi na huvau ngaisutna tatuam omte ciamtee hi. Topa mama sia Israelte ii kumpipa takin kingaisun a, ahihang mihingte ii ngetna zo kikna in Topa in kumpipa khat amate atu teal sak hi. A thupi sia kumpipa le mite a kibangin vaanglianpipa ii uk sung le thukhenna nuai ah a omna thu hi. (2:7-10) Pathian ii thukhamte nuai ah, a hau a zawng a kibangin mihingte theampo ii nga tuak thute kepcing sak natu ahi hi.

A kihel Thulute
Israelte ii thukhenpa Samuel 1:1-7:17
Saul kumpi suak 8:1-10:27
Saul ii maan kipat kumte 11:1-15:35
David le Saul 16:1-30:31
Saul le a tapate ii thina 31:1-13

Samuel Khatna 1

Shiloh ah Elkanah le A Innkuante

1Ephraim mualtung ngam Ramah khua ah Ephraim nam ahi Elkanah a kici pasal khat om hi. Ama sia Jeroham ii ta, Elihu ii tupa, Tohu baangkua, Zuph be le phung sung pan ahi hi. 2Elkanah in zi nii nei a, Hannah le Peninnah ahi hi. Peninnah in ta nei ahihang Hannah in nei ngawl hi. 3Kum simin Elkanah in TOPA Vaanglianbelpa bia tu le sangaw biakpiakna vawt tu in Ramah pan Shiloh ah pai hi, tua munah Hophni le Phinehas, Eli ii tapa nii te sia thiampi seam uh hi. 4Elkanah in sangaw biakpiakna a vawt simin, ama in tel khat sia Peninah pia a, tel khat tek sia a tate pia hi. 5Taciang ama in Hannah sia it mama hi napi ama sia tel khat bek pia hi, banghangziam cile TOPA in ta nei ngawlin koi hi. 6A kidem pui Peninah in ama sia nunau zazan in, a maizum thethei tu in vawt hi, banghangziam cile TOPA in Hannah sia ta sel sak hi. 7Kum khat zawk kum khat hi bangin papai a, TOPA ii inn ah a pai uh simin Peninah in Hannah sia a thin lal sak mama ahikom Hannah sia kap ngawp a, an zongh a ne nuam bua hi. 8A pasal Elkanah in ama dongh a, “Hannah awng, banghangin kap ni ziam? Banghangin an ne nuam ngawl ni ziam? Banghangin hee tawntung ni ziam? Tapa sawm sangin kei sia nang atu manpha zaw hong sa ngawl ni ziam?” ci hi.

Hannah le Eli

9-10Ni khat, amate Shiloh, TOPA inn sungah an a neak zawk uh ciang, Hannah hong dingto hi. Ama sia a thin na sa mama a, kap ngawpin TOPA tunga thu ngen hi. Tua sung teng in Eli thiampipa sia ama ii omna mun kongkha hui ah to nginge hi. 11Hannah in ciliap huai takin kamciam vawt hi: “TOPA Vaanglianbelpa awng, na naseamnu hong en tan! Ka ngimna hong mu tan a, hong phawk tan! Hong mangil heak in! Tapa khat nong pia le, ama ii nuntak buppi nang atu in kong aap tu a, ama in a sam meet ngei ngawl tu hi,” ci hi.

12Hannah in TOPA tungah hun saupi sung thu ngen a, taciang Eli in ama muk teng en hi. * 13Ama sia a thimthamin thu ngen hi; a muk sia tutung ahihang a aw suak ngawl hi. Tua ahikom Eli in ama sia zu kham hi tu in um hi, 14taciang ama munah, “Na zu kham ngamtatna na pualaak teng tawp in! Zu ne nawn heak in a, hi kinken in om in!” ci hi.

15“Hi bo, kei zu kham hi bong, topa, zu ne sa in om ngawl khi hi, a cimaw khi hi, thu ngengen in ka ngimna teng TOPA tungah sung khi hi. 16Mihing mannung ngawl hong sa heak in. Ngim nga mama ka hikom hi bangin thu ngengen khi hi,” ci in zo kik hi.

17“Thin nuam in pai tan, Israelte ii Pathian in na ngette hong pia tahen,” Eli in ci hi.

18“Kei a tawntung in hesuakna taw hong phawk tan,” ama in ci hi. Tasia zawkciang an tawm ne in paikhia a, a khuangai nawn bua hi.

Samuel ii Pianna le a Ki aapna

19A khuavak ni zingsang ciang Elkanah le a innkuanpuite hong tho pal uh a, TOPA a biak zawk uh ciang Ramah a inn ah hong cia kik uh hi. Elkanah in a zi Hannah ompui a, TOPA in ama ii thungetna zo hi. 20Tabangin ama sia nau ngil om a, tapa khat hong hing hi. Ama in a min sia Samuel ci in phuak a, “Ama atu in TOPA tung pan ka nget hi” cina ahi hi.

21Elkanah le a innkuanpuite Shiloh ah pai in TOPA tungah kum sim sangaw biakpiakna le a kamciam sa a tuam sangaw biakpiakna pia tu in hong pai tu hun hong cing hi. 22Ahihang tusia hunin Hannah hong pai bua hi. Ama in a pasal munah, “Nau in noai a ten po ciang a nuntak sung buppi teang tu in TOPA inn ah ka paipui tu hi,” ci hi.

23Elkanah in zo kik a, “Pha hi, phabel na sak bangin vawt in; noai na ten sak dong inn ah om in. Taciang TOPA in na kamciam hong tangtung sak hen,” ci hi. Tua ahikom Hannah sia inn ah om a, a nau keam hi.

24Ama in noai a ten sak zawkciang Shiloh ah paipui a, kum thum a pha khuital khat, anvui kuang khat le savun ip sungah zu a dim keng hi. Ama in Samuel sia moi mama ahihang TOPA inn Shiloh ah paipui hi. 25Amate in khuital a ngaw zawkciang nausen sia Eli kungah paipui uh hi. 26Hannah in ama ii munah, “Hong ngai pak tan topa! Kei nong ciamtee lai ziam? Kei sia hi munah dingin TOPA tungah thu a ngengen numei sia khi hi. 27Hi patang sia ama munah ka ngen a, ama in ka nget bangin hong pia hi. 28Tua ahikom TOPA tungah ama aap khi hi. A nuntak lai theampo ama sia TOPA ii neisa suak tu hi,” ci hi.

Tua zawkciang amate in tua munah TOPA bia uh hi.

⇑

[Remove Footnotes]