KHANG TANGTHU NIINA

(The Second Book of Chronicles)

Thupatna

Khang Tangthu Niina sia Khang Tangthu Khatna ii a zom ahi hi. Hi laibu sungah Solomon Kumpipa ukna thu, Kumpipa Solomon ii tapa Rehoboam ii kumpi a sep laitak a Jeroboam lampui in saksang minamte ii ngal thawna thu na ciamtee a, BC 586 kum Jerusalem khuapi a bo hun dong Judah kumpi ngam tangthu taw kizom to hi.

A kihel Thulute
Solomon ngam ukna 1:1-9:31
a. A kipatna sang hun 1:1-17
b. Biakinn kisa 2:1-7:10
c. A tawpna sang hun 7:11-9:31
Saksang minamte ii langpanna 10:1-19
Judah kumpipate thu 11:1-36:12
Jerusalem khua bona thu 36:13-23

2 Khang tangthu 1

Solomon Kumpipa in Ciimna Ngen

( 1Kumpite 3:1-15 )

1David Kumpipa ii tapa Solomon in Israel kumpi ngam a kho takin uk a, TOPA a Pathian in thupha pia in a vaang lian sak mama hi.

2Solomon Kumpipa in a ngalkap tulkhat a uk le zakhat a uk ngalkapmaangte theampo, kumpi naseam ulian theampo, baangkua lutang te theampo le a taanglai mihonpite tungah, 3Gibeon khua biakna munah ama taw a pai khop natu thupia hi. Amate tua munah a pai uh hi, banghangziam cile tua mun sia TOPA ii naseampa Moses ii dui sungah a vawt TOPA ompuina puanbuk a kikoina mun hi. 4(Thukham Thingkuang sia ahile David Kumpipa ii Kiriath Jearim pan a laak lai in, Jerusalem khua ah a sak Puanbuk sungah kikoi hi.) * 5Hur ii tupa, Uri ii tapa Bezalel ii tau taw a vawt biaktau sia zongh Gibeon khua TOPA ompuina Puanbuk mai ah om hi. Tua munah Solomon Kumpipa le mipite theampo in TOPA bia uh hi. * 6Puanbuk mai tau taw kivawt biaktau tungah Solomon in TOPA bia a; nganno tulkhat ngo sakin biaktau tungah haltum hi.

7Tua zan in Solomon tungah Pathian kilangh a, “Bang hong pia leng na uuk ziam?” ci in dongh hi.

8Solomon in, “Ka pa David tungah itna lian mama na lak a, taciang tu in kei sia a kumpi za nong lua sak zo hi. 9TOPA Pathian awng, ka pa tungah na kamciamte hong tangtung sak tan. A kisim zo ngawl za dongin a tam mihingte tungah kumpi nong seam sak hi, * 10tua ahikom amate ka uk thei natu in ka kisap ciimna le heak theina hong pia tan. Tua hi bathong le, hi za a tam na mihonte koibang uk zo thong tu khi ziam?” ci in zo hi.

11TOPA in Solomon tungah, “Thumaan na teal zo hi. Hauna, sum le paai, minthanna, na ngalte thi natu, nangma khansau natu, hong ngen ngawlin, ka mite uk tu in kumpi in kong teal zo a, tua ka ka mite na uk thei natu in ciimna le heak theina nong ngen zaw hi. 12Keima in ciimna le heak theina nang kong pia tu hi. Tua bek dom ngawlin kumpi khat papo zongh ii a nei ngawl ahibale a nei ngei nawn ngawl tu hauna, sum le paai le minthanna a tamzaw kong pia tu hi,” ci in zo hi.

Solomon Kumpipa ii Vaangletna le Hauna

(1Kumpite 10:26-29)

13Taciang Solomon in TOPA ompuina puanbuk omna ahi Gibeon khua biakpiakna mun nusia in Jerusalem ah cia kik hi. Tua mun panin ama in Israel ngam uk hi. 14Ama in ngalsim natu in ngalleang tul le zali, siphu ngalkap tulsawm le tulnii khawmtua hi. Tuate pawl khat sia Jerusalem ah koi in, pawlkhat sia khuapi dang tatuamte ah koi hi. * 15Ama uk sungin Jerusalem ah suang za in ngun le kham tam a, Judah ngam mualpeang ah a om theikung thathong za in cedar thingkung tam hi. 16Kumpipa atu vanh leite in Musri le Cilicia pan siphu hong kizuakte vai kizeak sak a, * 17Egypt pan ngalleang a kilei te zeak uh hi. Amate in Hit te le Syria kumpite tungah siphu le ngalleang zuak uh a, ngalleang khat ciang nguntang dangka 600 le siphu khat ciang nguntang dangka 150 taw veu in zuak uh hi.

⇑

[Remove Footnotes]