KUMPITE NIINA

(The Second Kings)

Thupatna

Kumpite Niina laibu sia Israel ngam nii te ii tangthu Kumpite Khatna laibu sia ii nusiat teng kipee in zomto suak hi. Tua laibu khen nii in kikhen thei hi. (1) Kumpi ngam nii te ii tangthu, BC kum zalom kua ii kimkhen hun pan Israel ngam nii te ii tangthu hi a, B.C.721 kum Samaria bo pan kipan saksang kumpi ngam bo dong thu ahi hi. (2) Judah kumpi ngam ii tangthu hi a, Israel kumpi ngam bo pan Babylon Kumpipa Nebuchadnezzar ii Jerusalem a suan le a sukthap B.C. 586 dong thu ahi hi. Laibu ii tawpna ah Babylonte ii nuai ah Judah ngam ukpi Gedaliah ii thu le Judah te kumpipa Jehoiachin sia Babylon thong sung pan a kisuatak sakna a kison khiatna ahi hi.

Hi minam bup ii lalna sia banghangin piang ziam cile Israelte le Judah te ii kumpite le mipite ii thumaan ngawl hang ahi hi. Jerusalem khuapi lalthapna le Judah pan a mihing tam mama te sal a tanna sia Israelte ii tangthu paizia a thupi mama in kilaih na khat ahi hi.

Kumpite Laibu Niina sungah a kikhaituam kamsang sia Elijah ii za laih pa Elisha ahi hi.

A kihel Thulute
A kikhen kumpi ngam 1:1-17:41
   a. Kamsangpa Elisha 1:1-8:15
   b. Judah le Israelte ii kumpipate 8:16-17:4
   c. Samaria bona 17:5-41
Judah kumpi ngam 18:1-25:30
   a. Hezekiah pan Josiah dong 18:1-21:26
   b. Josiah ii maanna 22:1-22:30
   c. A khak bel Judah kumpipate 23:31-24:20
Jerusalem bona 25:1-30

Kumpite Niina 1

Elijah le Kumpipa Ahaziah

1Israelte ii Kumpipa Ahab thi zawkciang Moab ngamte in Israelte langpan in tualngal tho uh hi.

2Israelte ii Kumpipa Ahaziah sia ama ii Samaria ah a kumpi inn thaam tung panin taak a, nasia takin liam hi. Tua ahikom ama in Philistine te khuapi Ekron ah kamtai pai sak a, ama ii a dam kik tu le a dam nawn ngawl tu Philistine te pathian Baalzebub dongh sak hi. 3Ahihang TOPA ii vantung lalang khat Tishbe pan kamsang Elijah sawl a, Kumpipa Ahaziah ii kamtaite taw kisi tu in pai a, thu dongh tu in sawl hi. “Banghangin Ekronte pathian Baalzebub thu dongh tu nu ziam? 4Israel ngamah pathian om ngawl hi ci in ngaisun nu ziam?” TOPA in ci hi, ‘Na liamna pan dam kik ngawl tu ni hi; thi tu ni hi,’ ” ci hi.

Elijah in TOPA thupiak bangin ngamta a, 5taciang kamtaite kumpipa kungah heak kik uh hi. “Banghangin hong heak kik nu ziam?” ci in ama in dongh hi.

6Amate in zo a, “Pasal khat taw ka kisi uh a, ama in heak kik in TOPA ii nang tungah, ‘Banghangin Ekronte pathian Baalzebub kungah kamtaite pai sak ni ziam? Israel ngam ah pathian om ngawl hi tu na up hu ahi ziam? Na liamna pan dam kik ngawl tu ni hi, thi tu ni hi.’ ” hong cina teng sonin hong sawl hi.

7Kumpipa in, “Pasal pa sia bangbang pian ahi ziam?” ci in dongh hi.

8Ama in nganhing phaw taw a kivawt puantual khat silh a, taciang savun kawngkhau taw kisawm hi,” ci in amate in zo kik hi. *

“Ama Elijah hi,” kumpi pa in ci hi.

9Tua zawkciang ama in ulian khat le pasal sawmnga sia Elijah sam tu in pai sak hi. A ulian pa in ama sia mualno tung khat ah to in mu a, ama ii munah, “Pathian ii mihingpa awng, kumpipa in nong paisuk natu thu hong pia hi,” ci hi.

10“Kei Pathian ii mihing ka hi le van panin meikuang paisuk tahen a, nang le na mihingte hong thatlum tahen,” ci hi. Thakhat thu in meikuang hong pai suk a, ulian pa le a mite thatlum siat hi. *

11Kumpipa in ulian dang khat le pasal sawmnga sawl kik a, amate paito in, Elijah ii munah, “Pathian ii mihingpa awng, kumpipa in thakhat in nong paisuk natu thu hong pia hi,” ci hi.

12“Kei, Pathian ii mihing ka hile, vantung panin meikuang hong paisuk tahen a, nang le na mihingte hong thatlum tahen,” ci in Elijah in zo hi. Thakhat thu in Pathian ii meikuang hong paisuk a ulian pa le a mite thatlum hi.

13Khatvei ma kumpipa in ulian khat le mihing sawmnga sawl hi. Ulian sia in mualno tungah kaato in, Elijah maiah khupdin in maangkaa hi. “Pathian mihingpa awng, kei le ka mite hong hesuak tan. Ka nuntakna uh hong khoaikhe tan! 14Ulian dangte nii le a mite sia vantung pan meikuang in thatlum siat hi; ahihang kei tungah hong hesuak tan!” ci hi.

15TOPA ii vantung lalang in Elijah munah, “Ama taw paisuk tan a, lau heak in,” ci hi. Tua ahikom Elijah sia ulianpa taw kumpipa ii kungah pai in, 16hi bangin ci hi, “TOPA in hi bangin ci hi, ‘Israel ngam ah pathian om ngawl bang keak in— Ekronte pathian kungah kamtai pai sakin Baalzebub tu in pai sak na hikom— dam kik ngawl tu ni hi; thi tu ni hi,’ ” ci in son hi.

17TOPA ii Elijah tungtawn a, a son bangin Ahaziah thi hi. Ahaziah in tapa nei ngawl hi, tua ahikom a suapuipa Joram in, a kumpiza laih a, tua lai tak sia Judahte kumpipa Jehoshaphat ii tapa Jehoram ii a maan zawk a kum nii na ahi hi.

18Kumpipa Ahaziah ii sep le vawt a dangte theampo sia Israelte Kumpite Tangthu sungah kikhum hi.

⇑

[Remove Footnotes]