DANIEL

Thu patna

Daniel Laibu sia Pathian he ngawl kumpi khat ii Judah mite nasia tak a vawtsiat le a nencip hun lai in a ki at ahi hi. Tangthute le mu kholnate zanghin, lai at pa in Pathian in a ngilo ngam ukte su niam a, Pathian mite sia vaangletna pia kik tu hi ci, lametna taw in ama khan hun lai mite hanthawn hi.

Hi laibu sia khen lian nii in kikhen a; (1) Pathian a upna le a thu nitna taw a ngalte a zo Daniel le a sal tanpui a lawmte pawl khat ii tangthute ahi hi. Hi tangthute sia Babylon le Persia uk hun sung thu kikhum ahi hi. (2) Kumpi ngam tam mamate Babylon kumpi pan kipan a ban a ban in a khantona le a taak sukna le amate a vawtsia Pathian he ngawl mite a puk natu le Pathian mite ii ngal zaw natu thu Daniel ii mu kholna a tatuam a muna te lim a tatuam taw a son kholna ahi hi.

A kihel Thulute
Daniel le a lawmte 1:1-6:28
Daniel ii mu kholnate 7:1-11:45
   a. Nganhing lite 7:1-28
   b. Tuutal le Keal 8:1-9:27
   c. Vantung lalang kamtai pa 10:1-11:45
   d. Hun bo tu hun 12:1-13

Daniel 1

DANIEL LE A LAWMTE TANGTHU (1:1-6:28)

Nebuchadnezzar ii Inn ah a Om Tangvalte

1Jehoiakim ii Judah kumpi a sua zawk a kum thum kumin, Babylon Kumpipa Nebuchadnezzar in Jerusalem khuapi simin uumci hi. * 2TOPA in, Jehoiakim Kumpipa sia Nebuchadnezzar Kumpipa in man sak a, Biakinn na manpha pawl khatte la sak hi. Ama in a mat mihing pawlkhatte Babylon khua ama pathiante biakinn ah ciapui a, a mat vanh manphate biakinn vanh kholna khan ah koi hi. *

3Kumpipa in Israel saltangte sung pan ukpi nam le ulian namte tangval pawlkhat teal tu in a khutnuai ulian bel Ashpenaz thupia hi. 4Tua a teal mihingte sia kumpi inn sungah naseam thiamte a sua thei natu in a meal hoi, a pilvang, pha tak nasep a kisin sak sa, thu he pal le pumpi tung paubanna nei ngawlte hi tu hi. Amate sia Babylon lai a sim thei natu le a at thei natu in Ashpenaz in hil tu hi. 5Kumpi inn sungah a om mihingte bangma in amate sia ni simin an le zu a piak natu kumpipa in thupia si hi. Hi bangin kum thum a sin zawkciang kumpipa mai ah kilak tu uh hi. 6Tabang a kitealte sung panin Daniel, Hananiah, Mishael, le Azariah kihel a, a vekpi in Judah nam ahi uh hi. 7A khutnuai ulian bel pa in amate sia min thak phua in; Belteshazzar, Shadrach, Meshach le Abednego ci hi.

8Daniel in kumpi inn sung pan a kipia an le zu neakna taw in ama le ama biakna sangah a kinin sak ngawl natu in a thin khensat ahikom ama in Ashpenaz tungah huna ngen hi. 9Pathian in Ashpenaz sia Daniel tungah hesuakna thin nei sak hi. 10Ahizong Ashpenaz in kumpipa kiita ahikom ama in Daniel tungah, “Kumpipa in na neak tu le na dawn tu see sa nei zo ahikom, khangno dangte ban zo ba zezen tha lete ama in kei hong thatlum tu hi” ci hi.

11Tasia ciang Daniel sia ama le a lawmdang thumte cing tu in Ashpenaz ii a koipa kungah pai hi. 12Ama in, “Ni sawm sung hong sin tan a, ka neak tu uh anteete le ka dawn tu tui hong pia tan. 13Taciang kumpi an a ne khangno dangte taw hong ettee khawm tan a, nong muna bangin thu hong khen tan” ci hi.

14Ashpenaz in ni sawm sung encik tu in thukim hi. 15A hun a cin ciang amate sia kumpi an a nete sangin a ciidam tuak zaw, a tha hat tuak zaw uh hi. 16Tua ahikom tua ni pan kipan amate a cing pa in Kumpipa ii piak an luangin anteete ne suak sak hi.

17Pathian in tua tangval lite sia heak theina, pilna le thuthuk tel theinate pia hi. Tua bek dom ngawlin ama in Daniel sia mukholna le mang khiak thiamna pia hi.

18Kumpipa ii ciangtan kum thum a cin ciang, Ashpenaz in tangvalte theampo sia Nebuchadnezzar kungah paipui uh hi. 19Kumpipa in amate paupui siat a, Daniel, Hananiah, Mishael le Azariah sia a dangte sangin dik sa zaw hi. Tua ahikom amate sia kumpipa inn sungah a vaihawm pawl suak uh hi. 20Kumpipa in a bangbang thu haksa nano dongh kale hi mihing lite in ama ii ngamsung theampo a mitbum thiamte le aisaan theite theampo sangin a sawm vei in he zaw uh hi. 21Daniel sia kumpi inn ah Persia Kumpipa Cyrus ii Babylon a zaw dong om suak hi.

⇑

[Remove Footnotes]