THUHIL KIKNA

(Deuteronomy)

Thupatna

Thuhil kikna Laibu sungah, khua ngeipi ngam sungah a khualhaw uh a tawpna ahi Canaan ngam lua tu in a tum mahiat, Moab ngam sungah a tawlngak laitakin Moses in Israel mihingte tungah a thusonte a ban a banin ki at hi.

Hi laibu sungah a kiciamtee a thupi bel pawlkhatte a nuai a bang ahi hi. 1. Moses in a bo sa kum sawmli sung a thupiang a thupite son kik hi. Pathian in dui sungah amate a lampuina thu a phaw natu uh le Pathian tungah citak in, a thumaan natu uh ama in hanthawn hi. 2. Moses in Thukham Sawmte en kik a, Thukham masa bel sia ii a khiakna thupi son belin TOPA tung bek ah a kipiak tu uh hanthawn hi. Taciang Israel tungah piak tu in a khap sa ngamah a ten uh ciang a zui tu uh ngeina tatuamte son hi. 3. Pathian ii a mihingte taw thuciamna a vawtna thu, Moses in mipite phawk sak kik a, sep tu in a thuciamnate thaksua tu in hanthawn hi. 4. Pathian mihingte a lampui kik tu in Joshua kisee hi. Pathian ii thumaanna thu, la khat sa in, Israel minamte tungah thupha a piak zawkciang Jordan ngun nisuana sang Moab ngam sungah Moses thi hi.

Hi laibu ii a bulphu thu in Pathian in a it a teal sa mihingte ngumin thupha pia zo a hina thu hi a; ama mihingte in nuntakna le a tatsat ngei ngawl thupha a nga natu in hi thute phawk tawntung tu a ama it in a thu a nit tu ahi hi.

Hi laibu sungah a thupi bel mun sia 6:4-6 sung hi a, Jesu ii thukham theampo sung pan a lianbel hi a ci, “TOPA na Pathian uh, na thinsung theampo, na nuntakna theampo le na thahatna theampo taw it vun,” cina kammal omna ahi hi.

A kihel Thulute
Moses ii thuson a khatna 1:1-4:49
Moses ii thuson a niina 5:1-26:19
   a. Thukham Namsawmte 5:1-10:22
   b. Thukham, ngeina le hil kholnate 7 11:1-26:19
Canaan ngam tum natu zia hilnate 27:1-28:68
Thuciamna kithak sua 29:1-30:20
Moses ii kammal khak belte 31:1-33:29
Moses ii thina 34:1-12

Thuhil kikna 1

Thupatna

1Hi laibu sung a thute sia Israel mihingte Jordan ngun nisuana sang dui sungah a om laitak Moses ii amate a paupuina kammalte ahi hi. Amate Suph khua paam Jordan Kuam a lang khat ah Paran, a lang khat ah Tophel, Laban, Hezeroth le Dizahab khuate kilaklaw ah om hi. 2(Sinai Mual pan Kadesh Barnea sia Edom ngam mualdung zui leang ni sawm le ni khat kipai hi.) 3Egypt pan a pusua zawk a kum sawmli kum a tha sawm le khatna ni masa bel ni in TOPA ii amate tungah son a, a sawl theampo Moses in mihingte tungah son hi. 4Hi thu sia Heshbon khua a uk, Amor Kumpi Sihon, Ashtaroth le Edrei khua a uk Bashan Kumpi Og, TOPA in a zaw zawkciang a son ahi hi. * 5Jordan ngun nisuana Moab ngam sungah a om sungin Moses in Pathian thukhamte le a thuhilnate hilthiang tu in kipan hi.

6Moses in, “Sinai Mual ah ih om lai, TOPA ih Pathian in eite tungah, ‘Hi mual ah khua ngei ma om zo nu hi. 7Ngiabuk phelin kikhin vun. Amor mualtung ngam le a kiimkot ngamte theampo - Jordan Kuam, mualtung ngam le leiniamna ngam, thangsang ngam le Mediterranean tuipi hui dongin pai tavun. Canaan ngam le Lebanon Mualte langkhat Euphrates Ngun lian dong pai tavun. 8Hi ngam theampo Keima TOPA in na pu Abraham, Isaac le Jacob te tung le a suan le a paalte tungah piak tu in ka kamciam ahi hi. Pai in lua tavun’ hong ci hi,” ci hi.

Moses in Thukhente Koi

(Pusuana 18:13-27)

9Moses in mipite tungah, “Sinai Mual ah ih omlai in note kong son zo a, ‘Note lam kong pui tu tavuan sia kei atu in haksa lei hi. Kei nguak in ka seam zo batu hi. 10TOPA na Pathian in note van ah aksi za in hong tam sak hi. 11Na pu na pate Pathian TOPA in hong kamciam bangin note a tulkhat vei in hong khang sak hen a, hong nuamsa sak tahen! 12Ahizong kei nguak in no kilem ngawlnate lemtua tu in tavuan lian sia bangbang pua zo thong tu khi ziam? 13Minam sim pan a pil, thu he, thu phawk sate teal vun a, note hong uk tu in amate ka koi tu hi,’ kong ci hi. 14Hi sia sep tu in a pha khat hi, ci in na lung uh kim hi. 15Taciang na minam sim pan na tealsa a pil le thu phawksa lampuite in kong uk sak hi. Pawlkhat in mihing tulkhat, pawlkhat in zakhat, pawlkhat in sawmnga, pawlkhat in sawm uk tu in tavuan ka pia hi. Na minam theampo sungah lampui dadang zongh ka koi hi.

16“Tualai in amate tungah, ‘Na mihingte sung pan kilem ngawlna thu hong paite pha tak ngai sak vun a, na mihingte ahizong, note sungah a teang minam dangte thu ahizong pha takin khen vun. 17Thu na khen uh ciang nguptuam nei heak vun; akua akua ahizong a kibangin khen vun. Kuama kiita heak vun, banghangziam cile na thu khen sia Pathian kung pan hong pai hi. Thu khat papo note atu in a haksa lei le, hong paipui tavun a, keima ka khen tu hi,’ ka ci hi. 18Tua hun lai ma in, na nasep tu theampo kong hil siat zo hi.

Kadesh Barnea kan Thukankuute Kipai sak

(Ngamsung vakna 13:1-33)

19“Eite in TOPA ih Pathian hong thupiak bangin ih seam hi. Sinai Mual nusia in a zai, a lauhuai senneal ngam kantan in Amor ngam mualtung ngam sungah ih pai hi. Kadesh Barnea ih thet ciang, 20-21‘Ih pu ih pate Pathian, TOPA ih Pathian ii eite hong piak Amor ngam mual tu in theng zo nu hi. En vun, zia lai hi. Ama thupiak bangin pai in lua vun. Hai heak vun a lau heak vun,’ ci in kong son hi.

22“Ahizong note ka kungah hong pai in, ‘Ih mai ah thukan kute pai sak masa tawng, tua hile amate in ih zui tu lampi pha bel le khuapite omzia hong son thei tu hi,’ nong ci uh hi.

23“Tua thu phasa ka hikom minam sim pan khat tek mihing sawm le nii ka teal hi. 24Amate Eshcol Kuam dong mualtung ngamah paito in ngam vil uh hi. 25Amate in tua lai ah a mu thingnga pawlkhat hong ciapui kik a TOPA ih Pathian hong piak ngam sia leipha mama hi, hong ci uh hi.

26“Ahizong TOPA na Pathian thu piak langpan in tua ngam sungah na tum bua uh hi. * 27Note phun lialua in; ‘TOPA in eite hong ensan hi. Amorte ii hong thalup thei tu in ama in Amorte khut sungah aap tu in Egypt pan hong paipui hi. 28Banghang tua munah pai tu hi ziam? Lauhuai hi. Thu kan a ih paisakte in tua munah a teang mihingte ei sangin hat zaw, saang zaw a, van banin a ki uum khuapite sungah teang hi, ci in hong son hi. Amate in tua lai ah mi thatang liante mu hi,’ na ci uh hi.

29“Ahizong, ‘Tua mihingte kiita heak vun. 30TOPA na Pathian in hong lampui tu a, Egypt le senneal ngamah a vawt na mu uh bangin, note atu in ngal hong sim sak tu hi. 31A pa in a tapa a toai bangin, hi ciang dong lam tawntungah bit takin hong paipuina thu na mu uh hi,’ ci in kong son hi. * 32Ahizong hi bangza in kong ci hang note in * 33na mai ah pai in ngiaphual tu mun hong zon sak a, na pai natu lam hil tu in zanin meikhuam taw, sunin meeikhuam taw pai tawntung kale TOPA na muang balai uh hi.

TOPA in Israel Daan pia

(Ngamsung vakna 14:20-45)

34“TOPA sia na phunna uh a zaak ciang thin uukin, kiciam in, * 35‘Hi khang hun a, a ngilo note khat zongh, na pu na pate tung piak tu a ka kamciam lei phana ngam na theng batu uh hi. 36Jephunneh ii tapa Caleb bek theng tu hi. Ama in kei tungah hong thumaan a, ama le a suan a paalte ama vil sa ngam ka pia tu hi,’ ci hi. 37Note hangin TOPA kei tung zongh ah hong thin uuk a ama in ‘Moses awng, nang ngangawn Canaan theng ngawl tu ni hi. Tua ngam sia amate ka pia tu a, amate in tua ngam lua tu hi. 38Ahihang na khutdom pa Nun ii tapa Joshua a thin kho natu hanthawn in. Ama in Canaan ngam a lua tu in Israelte lampui tu hi,’ ci hi.

39“Taciang TOPA in eite theampo tungah, ‘ Moi lei lai ahiciang a pha le a sia a he ngawllai na tate uh- ngalte in man tu na ci na patangte uh, tua ngam ah tum tu hi. Amate tungah tua ngam ka pia tu a, amate in lua tu hi. 40Ahizong note heak kikin San Tuipi sang manaw in senneal ngam ah pai vun,’ hong ci hi.

41“Note in, ‘Moses awng, kote TOPA tungah maw zo khu hi. Ahizong tu in TOPA ih Pathian hong thupiak bangin sim tu khu hi,’ nong ci uh hi. Taciang mualtung ngam ngalsim tu sia ol tu in ngaisun a, note misim in ngalsim tu in na kithoai uh hi.

42“Ahizong TOPA in kei tungah ‘Ngal sim sak heak in, banghangziam cile amate ka ompui batu a, a ngalte in zo tu hi,’ hong ci hi. 43TOPA hong son bang kong son hi, ahizong nong thusim bua uh hi. TOPA thu nialin kiphatsakna taw mualtung ngam na kuan uh hi. 44Taciang mual tungah a teang Amorte in khuaihon bangin note hong del hi. Amate in note Hormah dong hong del a, Edom ngam mual ah hong zo hi. 45Taciang TOPA tungah kapin huna na ngen uh a, ahizong ama in hong ngai ngawlin, hong awlmawk ngawl hi.

Senneal Ngamah Kum tampi

46“Hi bangin Kadesh ah ngei hialma ih om zawk,

⇑

[Remove Footnotes]