Thuhil kikna 15

A kum Salina

(Thiampite 25:1-7)

1“Kum sali a cin simin note tungah sum hong ba theampo mai sak tu nu hi. 2Hi bangin vawt tu ahi hi. Israel a mipui khat papo tungah sum a puk sia in a sumpuk teng mai sak tu hi. Leiba siik nawn ngawl tu hi, banghangziam cile TOPA in tua leiba kimai sak zo hi, ci in thang sak zo hi. 3Ngamdang mihingte ii hong bat te na siik thei tu uh a, ahizong na mipuite ii hong batte siik ngawl tu nu hi.

4“TOPA na Pathian ii hong piakna ngamah ama in thupha hong pia tu hi. Tuni in kong thupiakte theampo pha takin zui in, ama thu na ni uhle, 5na mihingte sung pan khat zongh zawngkhal ngawl tu hi. 6Hong kamciamsa bangin TOPA in nang thupha hong pia tu hi. Minam dang tam mama te tungah sum puk na thaak tu uh a, ahizong kuama tung pan sum puk na laak uh a kul batu hi. Minam tam mama na uk tu uh a, ahizong kuama ii khut nuai ah na om batu uh hi.

7“TOPA na Pathian ii hong piakna ngamsung khua khat papo ah kisapna a nei Israel na mipui khat po a om le, duhop heak vun a, hu ngawlin om heak vun. 8A taangsap za ngo takin puk vun. * 9Leiba mai sak kum a nai hang sumpuk nuam ngawlin om heak vun. Tabang khua ngaisutna siate na thinsung uh ah tum sak heak vun. Na puk nuam bua uhle amate in note hong langpan in TOPA tungah au tu a, taciang no hong kikhial sak tu hi. 10Ngo tak le oaina tak taw pia vun, tua hile nasepna theampo ah TOPA in thupha hong pia tu hi. 11Israelte sungah a zawng le a cimaw pawlkhat om tawntung tu a, tuate tungah na thuthiam natu uh in thu kong pia hi. *

Silate tung Vawtzia

(Pusuana 21:1-11)

12Na mipui Israelte, pa ahibale numei khat sia sila in na tungah ama le ama hong kizuak le, kum luk sung na hong sep sak zawkciang na suatak tu hi. A kum sali ciang ama na suakta sak tu hi. 13Na inn pan na suatak sak ciang khut hawm nguakin pusuak sak heak in. 14TOPA ii thupha hong piakte sung pan tuute, antangte, le zute thuthiam takin ama tungah pia in. 15Noma zongh Egypt ngamah sal na tanna uh le TOPA na Pathian ii hong suatak sakna thu phawk vun. Tua ahikom hi bangin thu kong pia hi.

16“Ahizong na silapa in hong nusia nuam ngawlin, nangma le na innkuanpuite it in hong om suak nuam tha tu hi. 17Hong om suak nuam le, na innkha ah paipui in a, tua munah a bil vu sak in. A nuntak sung tawntung na sila hi tan tu hi. Na sila numeite zongh tabangma in vawt vun. 18Na sila khat na suatak sak ciang na thin na sak heak in, a tatak in ci leang a kicial naseam khat ii thaman lang taw ama in kum luk sung na hong sep sak zo hi. Hi bangin vawt in, tua hile, TOPA na Pathian in na nasepna theampo ah thupha hong pia tu hi. *

Khui le Tuu Taciilte

19“TOPA na Pathian atu in na khui le na tuu sung pan a tal a suakciilte theampo tuam koi vun. Hi khuite khat zongh naseam in zangh heak vun a, tuute khat zongh a mul meet heak vun. * 20Kumsim in TOPA mai ama biakna munah nangma le na innkuanpuite in tuate ne tu nu hi. 21Ahizong tua ngannote siatna khat papo nei in a peangbai, a mittaw, mealhemna a nasia khat papo a nei le tuate TOPA na Pathian tungah biakpiakna in zangh ngawl tu nu hi. 22Tabang ngannote na inn ah na ne tu uh hi. Note theampo biakna taw kisai in na thiangtho uh zong na nin uh zongin sazuksa le sanangsa na neak uh bangin tuate na ne tu uh hi. 23Ahizong a chi ne heak vun a, tui sun bangin lei ah sung zaw vun. *

⇑

[Remove Footnotes]