THUHILSYA

(Ecclesiastes)

Thupatna

Thuhilsya laibu sungah, “Thuthuk ngaisunpa” ii ngaisutna ki at a, mihing nuntakna bangza in tom a, bangza in ih ngaisutna taw kilee bul ziam cisia a thukin a ngaisutna teng hi a, thutang tatak om ngawl, thin hong ngim sak ahikom “Nuntakna sia a luithathong hi” ci hi. Ama in mihingte nuntakna a uk Pathian zia tel thei ngawl hi. Ahihang hite theampo zawkciang ama in mihingte nasep a hanciam tu le Pathian letsongte a tam thei za le hun sau thei za in a nop sak pui tu hanthawn hi.

Thuthuk ngaisunpa ii ngaisutna tam mama sia a sia sang veu hi zaw bang hi a, thinkiam huai hi. Ahizong Lai Thiangtho sungah hi laibu hong kihel ciang hi bang up laakna le a sia sang bek ngaisutnate ngangawn a huam zo tu in Lai Thiangtho thu upna sia zai mama a hina thu hong kilangh sak hi. Mihing tam mama in hi Thuhilna laibu sia limlangh bangin zangh a, khuangaisutna a ki at Lai Thiangtho in Pathian sia lametna hong pia hi, ci in nuntakna ii a khiakna a thupi zaw in saan thiam theina piang sak hi.

Thuhilsya 1

Nuntakna sia Luithathong hi

1Hite sia David ii tapa Jerusalem kumpipa ahi Thuthuk ngaisunpa ii kammalte ahi hi.

2Thuthuk ngaisunpa in a luithathong, luithathong hi, ci hi. Nuntakna sia luithathong, a vekpi luithathong hi. 3Na nuntak sungah naseam in na diang uh a, ahihang bang teng na lak tu om na ziam? 4Khang khat piangin, khang khat bo hi, ahizong simlei sia a om ngei in om hi. 5Ni suak kik lai in, tum kik lai a, a sua natu mun ah heak kikin suak kik leleau hi. 6Vui zongh thang sangah vasuk, sak sangah vato, a kot a kotin va a, kipan kik nithi hi. 7Ngun theampo tuipi sungah luangsuk a, ahihang tuipi dimleet tuan ngawl hi. Ngunte kipatna ah tuite heak kik a, taciang kipan kik leleau hi. 8Na theampo in hong thin ngim sak a, thin ngimna sia kam taw son zawk hi ngawl hi. Ih mittang in a mu cim thei ngawl a, bil in a zaak cim ngei ngawl hi. 9A piang ngei sa tengma piang kikik tu hi. A kiseam ngei sa tengma kiseam kikik tu hi. Simlei tung bup ah a thak bangma om ngawl hi. 10Amate in, “En vun, hi sungah bang ziam maw a thak khat om hi!” ci uh hi. Hi ngawl hi, a piang ngei sa hi lel hi, ei sua ma pek a, a piang sa hi. 11Hun bo sa sung a thupiangte kuama in ciamtee ngawl a, tu le maisang kilaklaw hun sungah a piang thute kuama in ciamtee tuan ngawl tu hi.

Thuthuk ngaisunpa ii Sin sate

12Kei, Thuthuk ngaisunpa sia Jerusalem ah Israelte kumpipa ka hi ngei hi. 13Hi leitung ah a kiseam na theampo kanthiang in sin tong ci in tupna ka nei hi.

Pathian in eite tungah a ngimhuai haksatna hong pia hi. 14Hi leitung ah a kiseam theampo ka mu zo a, a luithathong vive hi ci in kong son hi. Tasia in vuiva delkot taw kibang hi. 15A koaite na maam thei bua a, a om ngawl nate na sim thei bua hi.

16Keima le keima, “Mihing thupi khat ka suak zo a, ka mai ah Jerusalem a ukte sangin ka ciim zaw pek hi. Ciimna le heakna tatak tel ing,” ka kici hi. * 17Heakna le mawmawtna, ciimna le thin ap nate a ki lamdanna kan tu in ka khensat hi. Ahihang vuiva del taw ka kiban tu sia ka he hi. 18Ciim va-ial leang thin ngimna tam va-ial a, heak va-ial na in hong ngim sak va-ial zawsap hi

⇑

[Remove Footnotes]