ESTHER

Thupatna

Esther Laibu sungah a ki at thute sia Persia ngam uk lianpa ii a phalbi kumpi inn pan thupiang ahi hi. A son nop bulpi sia ngalhang Jew numei Esther a kici nu ii thu hi a, ama ii a thinletna le a mihingte atu a kipiakna hangin a mihingte sia a ngalte ii motsiat natu pan a suatakna thu ahi hi. Hi laibu in Jewte Purim Poaipi a pianna thu le a khiaknate sonthiang hi.

A kihel Thulute
Esther kumpinu suak 1:1-2:23
Haman ii thasawm nate 3:1-5:14
Haman kithatlum 6:1-7:10
Jewte ii a ngalte a zawna 8:1-10:3

Esther 1

Vashti Kumpinu in Xerxes Kumpipa Thu nial

1-2Persia ngam khuapi Susa khua kumpi tokhum tung panin Xerxes Kumpipa in, India pan Ethiopia dong ngam 127 uk hi. *

3Kumpi a sep a kum thum kumin a khutnuai uliante theampo le ngam uk upate atu in anneak poai khat khaam hi. Tua lai ah, Persia le Media ngalkapte, ngamsung ukpite, le ngamke uk kumpi namte kihel hi. 4A kumpi ngam hauna le ama thupiziate tha luk sung tawntung lak hi.

5Tua zawkciang kumpipa in Susa khuapi sungah a om pasal theampo a hau, a zawng atu in a kibangin anneak poai khat khaam hi. Tua poai nipi khat sung bup kumpi huang sungah kivawt hi. 6Tua huang sia patpuanza vancii le a kaangte taw kizeam a, tua puante a cii pha puankaang neal sannum khau taw marble suangkaang khuamte tungah ngunkualte taw kikhii hi. Huangsung sia suangkaang, suangsan, suangngo le suangengte kipha a, tuate tungah kham le ngun taw kivawt tokhumte kikoi hi. 7Zute khat le khat a kibang ngawl khamhai taw kihawm a, kumpipa in kumpi zute hawm sak vazia hi. 8Zu neak tu za ciangtan om ngawl a, a kuama po in a du za a neak natu in kumpipa in kumpi inn sung naseamte tungah thupia hi.

9Tua poai hun sungin Vashti Kumpinu in kumpi inn sungah numeite atu in anneak poai khat vawt sak hi.

10A poaikhaam ni sali ni in kumpipa zu ne in lungdam ahikom ama aituam naseam cilnge sa sali Mehuman, Biztha, Harbona, Bigtha, Abagtha, Zethar le Carkas te sam hi. 11Kumpipa in amate tungah Vashti Kumpinu a kumpi lukhu khu in ama kungah a paipui natu in thupia hi. Kumpinu sia numei mealpha khat hi a, kumpipa in a kumpi uliante le a leangnate theampo tungah kumpinu meal hoina lak nuam hi. 12Ahizong a naseamte in kumpipa ii sawlna Vashti Kumpinu tungah a son uh ciang kumpinu in nialin pai nuam ngawl hi. Tua hu in kumpipa thin uk hi.

13Tu in kumpi thukham le zui tu ngeina huvau thu khat papo a pian ciang kumpipa in ngaisutna a piate tungah ngaisutna a dok tu sia kumpi ngeina ahi hi. Tua ahiciang ama in bang vawt tu ci a he, ngaisutna a piate sam hi. 14Ama ii ngaisutna a dok tawntung belte sia Carshena, Shethar, Admatha, Tarshish, Meres, Marsena le Memucan te ahi uh hi. Hite sia Persia le Media ngam ulian sali te hi a, kumpi ngam sungah ulian belte ahi uh hi. 15Ama in hi uliante tungah, “Keima Xerxes Kumpipa in ka naseamte sawlin Vashti Kumpinu ka sam sak a, ahizong ama in ka thu ni ngawlin hong nial hi! Ama tungah bang vawt tu ci sia thukham in bang ci ziam,” ci hi.

16Taciang Memucan in kumpipa le a uliante tungah, “Vashti Kumpinu in kumpipa bek hi ngawlin, a uliante a tatak in ci leang ngamsung pasal theampo hong zawngsak hi! 17Kumpinu ngamtatna a zaak papo ciang, ngamsung numei theampo in a pasalte uh nomu paih tu uh hi. Amate in, ‘Xerxes Kumpipa in Vashti Kumpinu thupia napi, nialin ama kungah pai nuam ngawl hi,’ ci tu uh hi. 18Persia le Media ngamsung uliante ii zite in kumpinu ngamtatna teng a zaak uh ciang amate in nitum ma in tua thu a pasalte tungah son tu uh hi. Mun theampo ah zite in a pasalte zakta nawn ngawl tu a, a pasalte sia a zite tungah thin uk tu uh hi. 19Kumpipa na thukim le, Vashti sia kumpipa mai ah a kilak kik ngei nawn ngawl natu in kumpi thu zaaksakna khat vawt in. A kilaih kik thei nawn ngawl tu in tua kumpi thu zaaksakna sia Persia le Mediate thukham sungah at sak in. Taciang ama kumpinu dinmun ah numei pha zaw khat koi in. 20Na thu zaaksakna sia a lian mama na ngamsung theampo ah a kiheak ciang numei theampo in hau kale zawng kale a pasalte tek pha takin zakta tu uh hi,” ci hi.

21Kumpipa le a uliante in hi ngaisutna pha sa a, Memucan ii ngaisutna a piak bangin kumpipa ngamta hi. 22Pasal theampo amate baangkua tek ukpa hi tu a, a pau babang in zui tek tu hi ci in, kumpi ukna ngamsung tek ah ama in a kampau tek le a lai tek taw thu zaaksakna khat puak hi.

⇑

[Remove Footnotes]