PUSUANA

(Exodus)

Thupatna

Pusuana ih ci sia, ‘Ding hi’ cina ahi hi. Hi laibu sungah a ki-at thute Israelte tangthu sungah a thupi bel thupiangte hi a, a saltanna Egypt ngam pan Israel mihingte pusuana thu ahi hi. Hi laibu khen lian li in kikhen hi. 1) Hebrewte saltanna pan a suatakna, 2) Sinai Mual ah a khualhawna, 3) Pathian ii a mihingte taw Sinai Mual ah kiciamna a vawtna, tua sungah ngamtat luheak, ngam sung ki ukna le biakna ngeinate taw nuntakziate kihel hi. 4) Israelte in Pathian a biak natu inn le a sung nazak tu te, thiampite taw kisai thukhamte le Pathian biak natu ngeinate ahi hi.

Tua banah Pathian in, saltang ama mihingte hunin, maisang atu in lametna a nei minam khat in a vawtna thu, hi laibu in hong pualaak hi.

Hi laibu sungah mihing thupibel sia, Egypt ngam pan a mipuite a lampui tu in, Pathian ii a teal Moses ahi hi. Ngual ii heak belna mun sia hi laibu a khanlian 20 na sungah a om Thukham Nam Sawmte ahi hi.

A kihel Thulute
Israelte Egypt pan a suatakna 1:1-15:21
   a. Egypt ah saltang 1:1-22
   b. Moses suana le a nolai thu 2:1-4:31
   c. Moses le Aaron Egypt kumpipa taw a kimuna 5:1-11:10
   d. Paisan Poai le Egypt pan a dinna 12:1-15:21
San Tuipi pan Sinai Mual ah 15:22-18:27
Thukham le thuciamna 19:1-24:18
Thuciamna Biakbuk le Biakpiakzia hilna 25:1-40:38

Pusuana 1

Israelte Egypt ah Kivawtsia

1Egypt ah a innkuan puite tek taw a pai, Jacob tapate sia, 2Reuben, Simeon, Levi, Judah, 3Issachar, Zebulun, Benjamin, 4Dan, Naphtali, Gad le Asher ahi hi. * 5Jacob sung pan a suak mihing a tu le a tate a vekpi in sawmsali pha hi. A tapa Joseph sia Egypt ah om khol zo hi. 6Khua hong ngei va-ial ciang Joseph le a suapuite le a khanngual a omlaite theampo thi siat hi. 7Ahizong amate suan le paal Israelte in tu le ta tam mama nei in a honpui suakin, Egypt ngam sungah dimin thahat mama uh hi. *

8Tua zawkciang Joseph ii thu le la a he ngei ngawl kumpi thak khat Egypt ngamah hong khang hi. * 9Ama in a mihingte tungah, “Hi Israelte tam mama in, thahat ahiciang ei atu in lauhuai hi. 10Ngal om luilam thong le, ei hong sim tu in ih ngalte taw kipawl in, ih ngamsung pan pusuak tha tu hi. Amate hong tam va-ial ngawl natu in, ih khaam zawk natu lampi zong tawng,” ci hi. * 11Tua ahikom, Egyptte in a thinkiam huai mama nasep ham seam sakin, a tungah sila ukte koi hi. Kumpipa an khol natu in Israelte in Pithom le Rameses khuapite sa uh hi. 12Ahizong Egyptte in Israelte a siatvawt va-ial ciang, Israelte pung va-ial in, ngamsung teng ah kizel hi. Egyptte in Israelte kiita in, 13nuntak manh om ngawl za dongin zawthawk vawtin, sal ngimnga suak sak uh hi. 14Amate in inn sakna ah naseam sakin, lo sungah lotho sakin hesuak vet ngawl uh hi.

15Taciang Egypt kumpipa in, Hebrew numeite nau a suak sak syama niite ahi, Shiphrah le Puah tungah thu sonpui hi. 16“Hebrew numeite nau na sua sak uh ciang, tua nau pa ahile, thatlum vun a, ahizong numei ahile nungta sak vun,” kumpipa in syamate tungah ci hi. 17Ahizong syamate in Pathian kiita ahikom kumpipa thu ni ngawlin panote nungta sak hi 18Taciang kumpipa in syamate samin thu donghin, “Banghang hi bang ngamta nu ziam? Banghangin panote nungta sak nu ziam?” ci hi.

19Amate in, “Hebrew numeite Egypt numeite taw kibang ngawlin, ol takin nausuak a, ko thet ma in a nau suak zo uh hi,” ci in zo uh hi. 20-21Syamate in Pathian kiita ahikom, Pathian amate tungah dikin, amate ta tam mama pia hi. Taciang Israelte pung tato in, thahat hi. 22A khakbel ciang kumpipa in a mihingte theampo thupia in,“Hebrew patang suakthak theampo la vun a, Nile ngun sungah vawk vun, ahizong numei theampo nungta sak vun,” ci hi. *

⇑

[Remove Footnotes]