Pusuana 28

Thiampite Puante

(Pusuana 39:1-7)

1“Na suapuipa Aaron le a tapa Nadab, Abihu, Eleazar le Ithamar te sam in. Keima tungah thiampi na a sep thei natu in Israel mihingte sung pan tuamkoi in. 2Na u Aaron sia a vaang nei natu le a etlawm natu in thiampi puan vawt sak in. 3Keima atu in a thiangtho thiampi na a sep thei natu in thiamna ka piaksa khutthiamte theampo samin Aaron ii puan khui tu in sawl in. 4Amate in awmdal khat, ephod khat, puantual khat, pha tak kizeam laktong khat, dial khat le kawngkhau khat a vawt natu in sawl in. Amate in ka thiampi na a sep thei natu in khutthiamte in na suapui pa Aaron le a tapate atu in hi thiampi puante khui sak tu ahi hi. 5Khutthiamte in vancii, a sannum, a san samul, khamkhau le puankaang neal puanphate zangh tu hi.

6“Amate in ephod sia vancii, a sannum, le a san samul, khamkhau le puankaang neal puanphate taw vawtin, pha takin zeam tu hi. 7A kisawm thei natu in, a liangko lang le lang ah sawmna khau nii om tu hi. 8A dangte taw a vawtzia a kibang a pha tak a kitak kawngkhau sia ephod taw sakhat tu in a tungah pee tu hi. 9Suangmanpha nii la in, a tungah Jacob tapa sawm le niite min at in, 10amate suana taw kizui in a min lukte suang khat tungah at in, a dang lukte min suang dang khat tungah at in. 11Suang manpha a zeamthiamte khat in hi suangte nii tungah Jacob tapa sawm le niite min at sak in a, tua suangte kham taw a mong tuam in. 12Israel minam sawm le niite taangin ephod liangkhai tungah koi in. Tabangin Aaron in a minte a liangko tungah pua tu a, taciang keima TOPA in ka mihingte ka phawk tawntung tu hi. 13Note in kham awmsuan nii na vawt zawk uh ciangin, 14kham ciitak taw a kivawt zam nii a, a kipheak khawm khi ngui nii vawt in, tua khite sia kham awmsuan taw na khii khawm tu uh hi.

Awmdal

(Pusuana 39:8-21)

15“Pathian deina heak thei natu in, a kizangh awmdal khat Thiampi Saangpa atu in vawt in. Tua in ephod taw kibang in a kivawt a kizeam hi tu hi. 16A tung a phei a kikim thep nii in kithep tu a, letmat kua sau letmat kua zai hi tu hi. 17Tua tungah suangmanpha ngual li in na suan tu a, ngual khatna ah ruby, topaz le garnet suangte hi tu hi. 18Ngual niina ah emerald, saphire le diamond suangte; 19ngual thumna ah turquoise khat, agate khat le amethyst khat; 20le ngual lina ah beryl khat, carnelian khat le jasper khat hi tu hi. Hite kham awmsuan sungah kisuan tu hi. 21Israel minamte taangin Jacob tapa khat tek ii min a ki at suang sawm le nii na koi tu hi. 22Awmdal atu in khauhual taw kibangin a kipheak khawm kham ciitak khi ngui vawt in. 23Khamkual nii vawt in, awmdal tung sang kinghte veve ah suan in. 24Tua kham khauhual te nii sia, a kual te nii tungah khit in. 25A khauhual ii mong te nii sia awmsuan te nii tungah khit in a, taciang ephod ii liangkhai maisang ah thua in. 26Taciang khamkual nii vawt in, awmdal a nuai kingh veve ephod mong sung sangah suan in. 27Khamkual nii vawt in, ephod maisang liangkhai nuai ah khitin pha tak a kitak kawngkhau tungah sawm in. 28Kawngkhau tungah pha tak a om thei natu le awmdal a kol ngawl natu in, awmdal khaute ephod khaute tungah khau vancii khat taw sawm khawm in.

29Keima TOPA in ka mihingte ka phawk tawntung natu in, Thiangtho Mun ah Aaron a tum ciang Israel minamte min a ki at awmdal silh tu hi. 30Tabangin ka omna thiangtho mun ah Aaron hong pai ciang a ken thei tu in ama awmdal sungah Urim le Thummim koi in. Israel mihingte atu in ka deina a heak thei natu in tabang hun ciangin tua awmdal ama in silh tawntung tu hi. *

A Dang Thiampi Puante

(Pusuana 39:22-31)

31“Ephod tungah silh tu puantual sia vancii samul siuseu taw kivawt tu hi. 32Lu thun natu a hawng om tu a, tua a hawng kiimkot sia a ek ngawl natu in a kitak sa khui bangin kikhui khawm tu hi. 33-34A nuai kiimkot vancii, a sannum le a san samul te taw a kivawt talee nga te khamdaak taw a ki thatheak in zeam in. 35Aaron in thiampi na a sep ciang tua puantual silh tu hi. Ka omna Mun Thiangtho ah ama hong pai ciang ahibale a pusua ciang daak nging kiza tu a, ama kithatlum ngawl tu hi.

36“Kham ciitak taw kizepna takma khat vawt in a, a tungah ‘TOPA Atu A thiangtho’ ci in at in. 37Tua takma sia lu tuamna mai ah khau dum khat taw khit in. 38A mihingte in biakpiakna a vawt ciang khialna pawlkhat a vawt hial zong, Israelte ii kei tung hong piak biakna theampo ka san natu in Aron in tua takma sia a tal ah suang tu hi.

39“Puankaang neal khaupha taw Aaron laktong le lu tuamna takin, a pha mama a kizeam kawngkhau khat zongh vawt in.

40“Aaron tapate ii vaang nei natu le etlawm natu in, laktong, kawngkhau le lukhu vawt in. 41Hi puante na upa Aaron le a tapate silh sak in. Taciang amate in ka thiampi na a sep thei natu in kipsakna le aapna in olive thau taw zut in. 42A ci a sa a kimu ngawl natu in a kawng pan a pheizang ciang a pha ngoaipuante khui sak in. 43Aaron le a tapate in a sealno teng a kimu hu in, thalupna a thuak ngawl natu in ka omna Puanbuk ah hong pai ciang ahibale Mun Thiangtho ah thiampi naseam tu in biaktau hong neak ciang tua ngoaipuan teang tawntung tu hi. Tua in Aaron le a suan a paalte atu in a zui tu ngeina kip ahi hi.

⇑

[Remove Footnotes]