EZEKIEL

Thupatna

Kamsang Ezekiel sia BC 586 kum Jerusalem khuapi bo maa le a bo zawk in Babylon khua ah sal in teang hi. Ama ii thupuak teng sia Babylonia ah sal in, a teangte le, Jerusalem mite atu ahi hi. Ezekiel laibu sia khen luk in kikhen hi. (1) Pathian in Ezekiel sia kamsang khat tu in a sapna (2) Hong tung pheang tu Jerusalem lalthap natu le bo natu le mihingte tungah Pathian ii thukhen natu huvau amate kidop khol natu (3) A mite nengcip in lam a khialpui ngam tatuamte tungah ama ii thukhen natu taw kisai TOPA ii thusonna (4) Jerusalem khua bo zawkciang Israel mite a ki heenepna le maisang hun a nop sak zawk natu kamciamna (5) Gog tungtaang son kholna (6) Biakinnpi le ngam kipuaphat kik natu Ezekiel ii muna.

Ezekiel sia upna thuk mama a nei pa le thu tatuam a ngaisun thei pa ahi hi. Ama ii mu kholna thute tam mama sia mu kholna pan veu hi a, taciang ama thupuakte sia a kician sinsen lim taw veu kilak hi. Ezekiel in sungsang lungtang le thaa kithaksua tu thupi sak a, mihing simin, ama ii khialna tungah tavuan a neina thupi son hi. Ama in ngam buppi ii nuntakna a kithaksua natu lametna a nei thu zongh taangko hi. Thiampi khat hi si a, kamsang khat a hi si na taw ama in biakinnpi le thiantho natu a kisapna thu a kin vawt bel pa ahi hi.

A kihel Thulute
Ezekiel a kisapna 1:1-3:27
Jerusalem lalcip natu thupuak 4:1-24:27
Ngam tatuamte tungah Pathian thukhenna 25:1-32:32
A mite tungah Pathian kamciamna 33:1-37:28
Gog huvau son kholna 38:1-39,29
Maisang Biakinnpi le ngam pianzia tu mu kholna 40:1-48:35

Ezekiel 1

Pathian Tokhum

1Kum sawmthum kum a tha li na a ni nga ni in Babylon ngam Chebar ngunhui ah keima Buzi ii tapa thiampi Ezekiel in Judah mi saltangte taw ka teang khawm hi. Vantung kihong a, taciang mu kholna taw Pathian ka mu hi. * ( 2 Tua hun sia Jehoaiachin Kumpipa sal in a ki paipui zawk a kum nga kum ahi hi.) * 3Chebar Ngunhui tua Babylonia ngamah, TOPA hong paupuina ka za a, taciang ama ii vaangletna ka phawk hi. 4Khua ka dakto le saksang pan vuipi suangval hong va ka mu hi. Meeikaai lian pui khat sung pan khualeng hong tee vazua a, a kiimkot van taang hi. Khualeng tee vazalna munah taungo bang khat taang hi. 5Suangval laizang ah mihing pianzia lim bangin nganhing nungta li ka mu hi, * 6ahihang tuate khat simin maitang li le tha li tek nei uh hi. 7A peangte mam a, amate in khuital peangcin bang nei uh hi. Tuate sia taungo nawt thiang bang keakin tee uh hi. 8Maitang li le tha te bek dom ngawlin, amate in, a tha khat tek ii nuai ah mihing khut li tek nei uh hi. 9Nganhingte khat simin, a tha uh nii tek phalin, a thakhui dawn te kipha sakin, kingh li nei suak uh hi. Amate a kikhin uh ciangin, a pumpi uh kiheak ngawlin a vekpi in kikhin uh hi.

10A nungta nganhing khat sim in a kibang ngawl maitang nam li tek nei uh hi; tuate sia a maisang ah mihing maitang, a ziat sangah tawpi maitang , a vei sangah khuital maitang, a nung sangah muvanlai maitang ahi uh hi. * 11Nganhing khat sim ii thakhui niite kilaamto a, a hui ah nganhing dang khat ii thakhui dawnte taw kisi sak hi, taciang amate ii tha a omlai nii tek sia a pum tung tek ah zep uh hi. 12Nganhing li te in, mun khat tek nga ahikomin, lu heak kul ngawlin a uuk na po ah a vekpi in pai thei uh hi.

13Nganhingte sungah meisip kuang bang khat om a, tua meikuang sia a tawntungin kikhin hi. Tua meikuang sia lengkeak in khua leng sak hi. * 14Tua nganhingte sia khualeng manlang za in nung le mai ah tai uh hi.

15Nganhing lite ka et ciangin nganhing khat ii pangh ah leangmui khat tek, leangmui li te in, lei pha in, ka mu hi. * 16Tua leangmui lite khat le khat kibang uh hi; tuate khat simin suangmanpha bang keakin tee hi. Taciang leangmuite khat simin, a sungah leangmui dang khat tang takin a kikimin, kiheang hi. 17Tabangin leangmuite sia a ukna sang papo ah pai thei uh hi. 18Tua leangmuite ii kiilte sia mittang te taw kituam uh hi. * 19Nganhingte a kikhin simin leangte taw kikhin khawm a, nganhingte lei panin a kikhaanto ciangin, leangmuite zongh a kikhaangto uh hi. 20Nganhingte sia amate ukna po ah pai uh a, leangmuite zongh a nganhingte bang tatak ma in pai uh hi, banghangziam cile nganhingte in leangmuite uk uh hi. 21Tua ahikom nganhingte a tuk sim le a tawlngak simin le lei panin a kikhaangto simin leangmuite zongh in tabang tatak ma in zui uh hi.

22Tua nganhingte ii lu tung san ah a tee vazal palaang taw a kivawt bealpeu a ki khumsin a, a kikoi taw a kibang khat om hi. 23Tua ii nuai ah nganhingte dingin, khat simin a thate nii phal to a, a hui a om sia ii thadawn taw kipha sak a, a omlai tha niite taw a pumpi seal hi. 24A len uh ciang a tha kizapte ii aw ka za hi; tua aw sia tuipi hawk bang hi in, ngalkap hon lampai bang, Vaanglianbelpa Pathian ii aw bang ahi hi. A len uh a tawp ciang, amate in a tha uh khup uh hi. 25Ahihang amate lu tungah a om a khuplam a, a kikoi bealpeu taw a kibang sia panin, aw nging khat kiza veve hi.

26Tua ii tungah Sapphire suangmanpha taw a kivawt kumpi tokhum taw a kibang khat om a, tua tokhum tungah mihing taw a kibang lim khat to hi. * 27Tua lim sia meikhuk laizang ah a om tau bangin taang hi. Tua in a kiim a paam theampo nasia takin taangsak hi. * 28Tua ii sungah sangun meal namcin om hi. Tasia in TOPA ii omna a kilangh sak khuataang ziazua sia ahi hi.

Pathian in Kamsang khat tu in Ezekiel Sam

Hisia ka mu ciangin lei ah ka mailam in ka puksuk hi. Taciang aw

⇑

[Remove Footnotes]