EZRA

Thupatna

Ezra Laibu sia Khang Tangthu laibu a zom ahi bangma, Babylon pan Jew saltangte pawlkhat a cia kikna thu le Jerusalem khua ah nuntakna le biakpiakna kipat kikna thute son hi. A thupiangte a nuai a bangin a ban a ban in kilak hi. (1) Persia ngam uk lianpa Cyrus thupiakna taw Jew saltangte a masa bel pawl Babylonia pan a cia kikna. (2) Biakinn a kisak kikna, a ki aapna le Jerusalem ah Pathian biakna kipat kikna. (3) Kum tam pian zawkciang Israelte ii taanglai pan a, thaa taw kisai a neisa te a kikepcing thei natu in biakna taw kisai ahizong, leitung vai taw kisai ahizong a kipua kik natu a, a hu pa Pathian thukham a telthiang Ezra lampuina taw Jewte a dang pawl khat Jerusalem khua ah cia kik hi.

A kihel Thulute
Saltanna pan a cia kik masate 1:1-2:70
Biakinn kisa kik a, ki aap 3:1-6:22
Saltang dangte taw Ezra a cia kikna 7:1-10:44

Ezra 1

Cyrus in Jewte Cia kik sak

1Persia mi Cyrus in ngam uk lian a sep, a kum khat kumin kamsang Jeremiah tungtawn in, TOPA ii son thute TOPA in tangtung sak hi. TOPA in ama ukna ngamsung theampo ah a nging takin sim tu in a nuai a, a thupiakte at in puak tu in Cyrus sawl hi. * 2“Hi thu sia Persia ngam uk lian Cyrus ii thupiak ahi hi. TOPA Vantung Pathian in kei sia leitung bup uk tu in hong koi zo a, Judah ngam Jerusalem khuapi ah ama atu biakinn khat sa tu in tavuan hong pia zo hi. * 3Ama mihing ahi note theampo taw Pathian omkhawm tahen. Note Jerusalem ah cia tavun a, Jerusalem khuapi ah a kibia Pathian, Israelte Pathian, TOPA ii Biakinn sa kik tavun. 4Saltang a mihingte sung pan a cia kik natu in hu tu a kul a om le, a innpaamte in amate hi bangin hu tu hi. Amate in ngun le kham, nguai an le vanh pua nganhingte, Jerusalem khuapi sung Pathian Biakinn sungah piak tu biakpiaknate taw zong amate tungah pia khawm tu hi,” ci hi.

5Taciang Judah le Benjamin minam sung pan be lutangte, thiampite le Levite, le Pathian ii a thin a phawn sak theampo te in Jerusalem khua ah, TOPA ii biakinn sa kik tu in kithoai uh hi. 6A innpaamte theampo in na tam mama pia in amate hu uh hi: tuate in ngun uum le beal, kham, nguai an, vanh pua nganhingte, na manpha dangte le Biakinn atu in a piak nate ahi hi.

7Cyrus ngam uk lianpa in Nebuchadnezzar Kumpipa ii Jerusalem Biakinn sung pan a laak, a pathiante, biakinn sungah a koi kuang le haite amate pia kik hi. 8Ama in tua vanhte Judah ngam ukpa Sheshbazzar atu in sazian a vawt kumpi sumkeampi pa Mithredath tungah aap hi. 9-10A piak vanhte a nuai a bang ahi hi.

biakpiakna khamkuang 30
biakpiakna ngunkuang 1000
kuang tatuam 29
khamkuang note 30
ngunkuang note 410
uum le beal dang tatuamte 1000

11Kham le ngun taw kivawt kuang le vanh dang tatuamte a vekpi in 5,400 pha a, Babylon a saltanna pan Jerusalem ah a dang saltangte taw a cia uh ciang Sheshbazzar in ciapui hi.

⇑

[Remove Footnotes]