PIANCIILNA

(Genesis)

Thupatna

Pianciilna a kici sia ‘a kipatna’ cina ahi hi. Hi laibu in simlei le vantung a kipiansakna, mihing pianciilna, leitung ah mawna le ngimna kipatna le Pathian in mihingte tungah na hong sepna ziate son hi. Pianciil thubu sia khen nii in, kikhen thei hi:

1. A lian 1 - 11: Leitung a kipiansakna le mihing a piang masate thu ahi hi. Hi sungah Adam le Eve, Cain le Abel, Noah le tuipi liimna le Babylon tausaang thute om hi.

2. A lian 12 - 50: Israelte pianna pute pate thu ahi hi. A masa sia Abraham thu hi a, ama sia Pathian a upna hang le Pathian thu a nitna hangin a minthang hi. Tua zawkciang a tapa Isaac thu in zom a, a tupa Jacob (Israel zongh a kici pa) thu le Jacob ii ta sawm le nii te thute in zom hi. Jacob ii tate sia Israel minam sawm le nii te pianna ahi hi. Hi sungah Jacob ta sawm le nii te sung pan Joseph thu le Jacob ta dangte, a innkuanpui tek uh taw Egypt ngamah teang tu in a paina thu sonbel in nei hi.

Hi thubu in mihingte thu son a, tua sung pan Pathian nasepna bulphu in son hi. Pathian in simlei le vantung bitphua takpi a hina thu taw kipan a, a mihingte a thin nopmawkna a lak paisuak natu in kamciamna khat a piakna thu taw khup hi. Hi thubu bup sungah Pathian sia a seam, a bulbel a hina thu son a, a khial mite tungah thukhenin daan a piakna, a mite lampui in a huna thu le a tangthu lim le meal nei sakin Pathian a hina thute ki at hi. Hi taanghlai laibu sia minam khat ii upna le tua upna a nuntak thei natu a hu tu in a kiciamtee tangthu ahi hi.

A kihel Thulute
Simlei le vantung le mihing bitphuana 1:1 - 2:25
Mawna le ngimna kipatna 3:1 - 24
Adam pan Noah dong 4:1 - 5:32
Noah le tuipi liimna 6:1 - 10:32
Babylon tausaang thu 11:1 - 9
Shem pan Abram dong 11:10 - 32
Pute Pate: Abraham, Isaac, Jacob 12:1 - 35:29
Esau suan le paalte 36:1 - 43
Joseph le a suapuite 37:1 - 45:28
Israelte Egypt ah 46:1 - 50:26

Pianciilna 1

Piansakna Tangthu

1A kipat ciilin Pathian in vantung le leitung bitphua hi. 2Leitung in lim le meal nei ngawlin awngthong hi. Khuazing in tuipi sincip bikbek a, Pathian Thaa sia tui tungah diang hi. 3Taciang Pathian in, “Khuavak om hen” ci in thupia a, khuavak om hi. * 4Pathian in khuavak a mu ciang phasa hi. Taciang ama in khuazing pan khuavak khen a, 5ama in khuavak sia ‘Sun’ ci a, khuazing sia ‘Zan’ ci hi. Nitak bo in zingsang hong theng a, a ni khat ni ahi hi.

6-7Pathian in, “Tuite mun nii a kikhen natu in mun kuampi khat om hen” ci in thu a piak ciang om paih hi. * Pathian in mun kuampi khat vawt a, a tung tui pan a nuai tui khen hi. 8Ama in mun kuampi sia “Van” ci hi. Nitak bo in zingsang hong theng a, a ni nii ni ahi hi.

9Taciang Pathian in, “Leitangh kilangh natu in, vannuai a om tui te mun khat ah kingawm hen” ci in thu a piak ciang kingawm paih hi. 10Pathian in leiko sia “Leitangh” ci a, a kikaikhawm tuite sia “Tuipi” ci hi. Pathian in tuate a mu ciang phasa hi. 11Taciang ama in, “Leitangh in thingkung lopa nam theampo, cii a neite le nga a neite piang hen” ci in thu a piak ciang piang hi. 12Leitangh in thingkung lopa nam theampo a piansakna, Pathian in a mu ciang phasa hi. 13Nitak bo in zingsang hong theng a, a ni thum ni ahi hi.

14Taciang Pathian in, “Sun le zan kikhen natu, ni le tha le kumte khen natu le khua hunte teptee natu in van ah khuavakte om hen a, 15leitung khuavak pia tu in van taang hen” ci in thu a piak ciang taang paih hi. 16taciang Pathian in khuavak a lian zaw nii vawt a, ni in sun teng uk a, tha in zan teng uk hi; ama in aksite zongh vawt hi. 17Ama in leitung a taang sak tu in van ah khuavakte koi a, 18khuazing le khuavakte khenin sun le zante uk sak hi. Pathian in tuate a mu ciang phasa hi. 19Nitak bo in zingsang hong theng a, a ni li ni ahi hi.

20Taciang Pathian in, “Tui sia nganhing nam tatuam tam mama te taw kidim hen a, vui sia vacimte taw kidim hen” ci in thupia hi. 21Taciang Pathian in tuipi nganhing liante, tui sung a nungta nganhing nam theampo le vacim nam theampo piang sak hi. Pathian in tuate pha hi, ci in mu hi. 22Pathian in a bitphua sate theampo thupha pia a, tui sung nganhingte pungin tuipi sung dim hen a, vacimte zongh tam mama pha tahen, ci hi. 23Nitak bo in zingsang hong theng a, a ni nga ni ahi hi.

24Tua zawkciang Pathian in, “Innsa le ngamsa, a lian le a no, nganhing nam theampo leitangh in piang sak hen ” ci in thu a piak ciang piang paih hi. 25Pathian in tuate theampo piang sak a, ama in pha hi ci in mu hi.

26Taciang Pathian in, “Eima taw a kibang, eima hong sunin mihing ih vawt tu hi. Amate in, ngasa, vacim le innsa ngamsa, a lian a note tungah vaangletna nei tu hi,” ci hi. * 27Taciang Pathian in ama taw kibangin mihing bitphua hi. Ama in numei le pasal bitphua a, * 28thupha pia in, “Tu le ta tam mama nei tavun a, na suan na paalte leitung ah dimin, amate thuthu in leitung uk tahen. Keima in ngasate, vacimte le nganhing theampote tungah ukna za kong pia hi. * 29Keima in note neak tu in thaicii nam tatuam le thingnga nam tatuamte kong pia a, 30ahizong ngamsa theampote le vacim theampote ii an tu in, lopa le thingteete ka pia hi,” a ci ciang tabangin piang paih hi. 31Pathian in a vawtsa theampo a et ciang phasa mama hi. Nitak bo in zingsang hong theng a, a ni luk ni ahi hi.

⇑

[Remove Footnotes]