HABAKKUK (The Book of Habakkuk)

Thupatna

Kamsangpa Habakkuk ii kammalte sia kum za sim a salina bo kuan, Babylonte a vaanglet hun lai in hong piang ahi hi. Ama in hi mihing ngilote ii maitatnate hangin a thin na sa ahikom Topa tungah “Tua hi a, amate sangin thutang zawte a thalup ciang banghangin thimdide ni ziam?” (1:13) ci in dongh hi. Topa ii zo kikna pan, Ama ii a hun a cin ciang sepna khat hong om tu a, tua hunsung a “thutangte sia Pathian tungah thumaan ahikom nungta tu hi,” (2:4) ci hi.

Hi thubu sungah a taanglai son kholnate sia thutang ngawlte ii lalna tu hi a, Pathian letna taw kisai pokna late le laphuak pa ii a bomaw upna thute ahi hi.

A kihel Thulute
Habakkuk ii mawsiatna le Topa zo kikna 1:1-2:4
Thutang ngawlte lal natu 2:5-20
Habakkuk ii thungetna 3:1-19

Habakkuk 1

1Hi thu sia Topa ii kamsang Habakkuk tungah a pualaak thu ahi hi.

Thumaan ngawlna hangin Habakkuk Phun

2 Topa awng, nong zaak dong bangtan vei kong biakpui tu a, bang hun ciang ngongtatna pan hong hun tu ni ziam? 3Tabang ngimnate banghangin hong mu sak ni ziam? Tabang tatsiat nate bangbangin en thong thei ni ziam? Siatna le ngongtatnate sia ka kiimkot ah om a, kihauna le kidona mun theampo ah om hi. 4Thukhaam in thu nei zo ngawlin a luithathong suak a, thu a maanin seam ngei ngawl hi. Thutang thute kileekai in mi ngilote in thumaan mite zo zawsap hi.

Topa Zo kikna

5Taciang Topa in a mite tungah “Na kiim na paam a minamte encik vun, tua hile na mu uh thute hangin lamdang na sa tu uh hi. Na zaak ciang zong na up ngawl natu dong bang khat po kong vawt tu hi. * 6Tua a kiitak huai a omthim thei ngawl Babylonte tungah vaangletna ka pia hi. Amate in ngamdangte a zaw natu in leitung theampo ah kuan tu hi. * 7Amate in kiitakna le launa kizel sak a, amate kiphasak in a dei bang thukhen hi.

8“A siphute pawlbeam sang manlang zaw a, a ngilkial ngiapuite sangin kiitak huai zaw hi. A siphu ngalkapte ngam khuala pan hong pai a; a siphute in lei khuat uh hi. Muvanlaite suktun in a mat tute a zap bangin hong pai uh hi.

9“A ngalkap honte in a subong tu in hong pai uh a, amate a thet ciang a kuama po lau vadil hi. A ngal matte, senvui za in tam hi. 10Amate in kumpipate sia zawnsak vawt a, uliante sia nuisan zazan lel hi. Bang kulh po ahizong amate a khaktan zo om ngawl a, amate in a kulhte lei sunnel in la hi. 11Taciang amate vuiva bangin paisuak a, a thahatna sia a pathian za in ngaisun uh hi,” ci hi.

Habakkuk Topa tungah Phun kik

12 Topa awng, a kipatciil a kipan nangma in Pathian na hi hi. Nangma in ka Pathian na hi a, thiangtho in, a tawntung in na om hi. Topa ka Pathian le hong dal pa awng, nangma in Babylonte na teal zo a, daan hong pia tu in amate tha na hat sak hi. 13Ahizong banghangin hi mingilote, a thumaan ngawlte koithong thei ni ziam? Na mittangte sia siatna et natu in thiangtho leih a, ahi ngawl a ngamta mite na mu thei bua hi. Tua ahikom amate sangin a thutang zawte hong suksiat ciangin banghangin omthim thei ni ziam?

14Banghangin mihingte sia amate lam a hil tu ukpa nei ngawl ngasa le lungno hon khat bangin vawt thei ni ziam? 15Babylonte in ngasa tangthak bangin mihingte man uh hi. Amate in ngen taw kaikeak in a ngasa mat te tungtang ah lungdam in au ngawp lai hi! 16Amate in a ngente uh ngawngawn bia in tuate atu sangaw biakpiakna vawt hi, banghangziam cile na theampo sung pan a pha belte tua ngente in nga sak hi.

17Amate in a tawntung in namsau zangh in, hesuakna nei ngawlin minamte thatlum tawntung tu ziam?

⇑

[Remove Footnotes]